無綫花旦楊思琦上月底單方面宣佈跟李家鼎兒子李泳豪分手，有指思琦搭上香港跳水隊前成員吳帥，新歡曝光隨即被起底，吳帥先後被揭欠落周身債。思琦日前接受訪問時透露，為讓豪仔死心才訛稱有BB，可是傳聞卻惹來豪仔全家開腔鬧爆，豪仔孖生兄長泳漢護弟心切數臭思琦，李家鼎昨日更狂數思琦媽。

豪琦戀分手一直有指女尊男自卑，鼎爺昨日在將軍澳接受本報專訪時，說得激動再次爆粗之餘，還爆料指思琦媽嫌棄豪仔真有其事。（記：記者　鼎：李家鼎）

記：思琦投訴豪仔及其家人，並嫌豪仔同女家關係唔夠密切？

鼎：佢哋拍拖九年，我只係見過思琦爸爸一次，見佢阿媽四次。

記：覺唔覺思琦媽嫌豪仔窮？

鼎：佢哋分手，最錯係我個仔窮，雖然我哋窮，但窮得有骨氣，有件事好傷豪仔心，我好想講出嚟。早前一次思琦同佢媽咪同阿姨去食飯，豪仔負責做司機，到咗就先放低佢哋，自己揸去附近泊車，點知就接到思琦打嚟話佢阿媽叫豪仔唔好上去，係咪怕豪仔失禮佢哋，定只係當豪仔係柴可夫？我聽到個仔咁講好㷫，佢（指思琦）屋係又係乜嘢新絲蘿蔔皮咁巴閉，我真係忍無可忍，唔滿意我個仔冇錢，做乜唔一早反對個女同佢拍拖？開始咪逼佢斬纜，點解拍咗九年仲嫌棄？

李家鼎昨日鬧爆楊思琦母親嫌棄豪仔。

「我錫住個女仔呀」

記：豪仔5月時食生日飯，思琦以女友身份出席，但近日卻暗示是豪仔向傳媒放料。
鼎：嗰日食飯係臨時決定，嗰晚食完飯仲有記者問我佢兩個係咪好事近，其實佢哋食生日飯前仲喺我屋企講過計劃結婚，點諗到上月28日思琦就爆分手，我接到消息呆咗，玩乜×，戇×，黐×線，×佢係咪幫《寵愛有加》（楊思琦主持的新節目）搞宣傳？我打畀個仔問，佢立即喊到開晒水喉，我都唔信係真。
記：豪仔愛思琦話唔介意養埋佢個BB？
鼎：我睇到呢段嘢暈咁滯，我真係接受唔到，我個仔對思琦嘅愛真係百分之二百，呢個儍仔家仲係關心緊佢，豪仔知我今日出嚟做訪問，仲叫我要錫住佢（楊思琦），到家冇唱過佢，我幫理不幫親，家搞到單嘢咁，你話我唔唔係人。到今日都陰聲細氣講，我唔係錫住個仔，我錫住個女仔呀，佢好陰功，我唔做落井下石嘅嘢。

「夠種同我面對面講」

記：事發後可有聯絡思琦雙親？
鼎：冇，好奇怪點解佢老母唔出嚟幫個女講句說話，咪辛苦個女。
記：思琦爆分手後曾與媽咪揸車出去，但一泊完車，思琦媽即彈開火速撇甩女兒。
鼎：我聽講佢跳車走，咁勇喎，撈埋我哋嗰行做武師！
記：思琦同新歡吳帥好朋友、港隊跳水隊前成員俞越揶揄泳漢護弟言論，話佢冇受過高等教育，搽晒粉做大龍鳳，又話佢冇上鏡機會。
鼎（臉色一沉和㷫爆）：幾時輪到佢（俞越）講嘢，我係受害人個阿爸都未敢下評論，佢又受過乜嘢高等教育？泳漢係阿哥，幫細佬講嘢係應該，啲人最好收聲，係男人嘅夠種同我面對面講。
記：豪仔會唔會因為呢段感情重創，經一事長一智？
鼎：我個仔真係好有情有義，呢啲係佢優點，又係缺點，同我一樣有打死人咁嘅面口，但個心好軟。

愛子心切的鼎爺希望豪仔可以早日放下心結，忘記思琦才再開始另一段新戀情，否則對另一半都不公平。

吳帥被爆賭船搏命

楊思琦和李泳豪九年情斷纜，新歡吳帥（Andy Ng）亦遭人起底，吳帥曾是香港跳水隊代表，並得前港隊跳水隊成員俞越介紹下認識思琦，俞越日前接受本報訪問時就爆吳帥曾住數千萬元的堅尼地道御花園，又指吳父是高官、做礦產生意，力證吳家底不錯，但思琦早前開腔卻指吳帥僅屬小康之家，即時踢爆思琦又再講大話。

其實吳帥是富是貧令人成疑，昨日他又被踢爆於05、06及07年拖欠房協公屋租金，房協更於07年向Ng Sui追討$3,190租金，欠債紀錄成本簿厚。

未知吳帥是否因小三形象深入民心，所以接二連三被人踢爆負債纍纍，繼日前本報獲一份小額錢債審裁處入稟追討吳帥三萬元欠債後，昨日繼續有讀者爆吳帥經常問人借錢唔還，每逢星期三下班後即飛撲上賭船豪賭，難怪思琦的友人都擔心她又揀錯郎。

坐姿如暴發戶

此外，日前吳帥陪思琦和楊母到南京的shopping照在網上瘋傳，吳帥的軟皮蛇坐姿更成為網友的攻擊對象。坐到腰肢無力的吳帥被轟無教養，坐姿如暴發戶，十足十到夜店消遣一樣，加上見未來外母都唔讓坐，擺明唔多識尊重長輩。

鼎爺撩俞越當面對質

李泳豪與楊思琦分手，二人各執一詞，李家上下憤怒非常，儘管思琦怎樣說自己委屈，但就被李家上下揭瘡疤，昨日記者致電給泳豪父親李家鼎，他指思琦怎樣講不會理，現時只希望事件快些告一段落，他不諱言：「我唔係怕影響佢，係怕影響我個仔情緒，（有指施明對佢不好！）我只係知施明待佢好似女咁，嗰次買咗啲餸唔識煮，仲打嚟叫我上去幫佢煮，四餸一湯仲話驚思琦唔夠食。」有指吳帥好友俞越指李泳漢出言博上鏡，鼎爺聞言謂：「叫佢夠膽出嚟同我講呀！」