現年三十二歲的李逸朗在香港發展時，雖未算大紅大紫，但曾拍電視劇、還出過幾張唱片；沒想過離開英皇後，一個人返內地發展凡事要力親為。
Don日前在尖沙嘴接受訪問時，直言初時不懂從何入手，他說：「記得第一次去北京一間平價酒店入面面試，唔同劇有成廿幾組人喺度，畀演員送資料過去。但我完全唔知要放低個人資料，之後就自製咗一份有六、七頁紙嘅自我介紹，一次過印咗二百份走去派，呢個係我嘅開始。」
派資料派足大半年，Don終於等到第一個機會，拍《張小五的春天》做男二號，Don說：「我算好運，套戲喺央視一台播，反應好好，全國播咗好多次，畀機會我打開內地巿場。」
Don稱香港演員到內地發展，並非如外間想像般無限風光，有時都要吃點苦頭，他記得二○一○年拍張智霖主演的《終結杉計劃》，捱完冰冷河水，又要游臭屎河，Don說：「其中一場戲我要孭住支槍游過條河。嗰時喺十二月，天氣好凍，導演問我要唔要用替身，我一口就答話『不用』。嗰時我用保鮮紙包住個身嚟保暖，但因為要拍特寫鏡頭，唔可以用木槍代替，一路游一路沉底，墜到我個人都游唔郁，好似遇溺咁。」
Don擔心自己表現不濟，當導演要求他游臭屎河，Don都不敢拒絕：「嗰條河喺橫店好出名，兩邊有公廁，可能有啲嘢（排洩物）流出嚟。我攞出勇氣落去游，游完真係想喊，因為上水後成個人都好臭，o依家諗起都覺得臭。咁啱附近有一張劉亦菲着古裝衫喺河上面吊威吔飛過嘅相，嗰刻真係好想同導演講條河係用來飛，唔係游㗎。」Don直言重頭再來，未必有這樣的勇氣。也因為香港跟北京天氣有別，其間一度患病，他說：「有段時間我隻手舉唔起，睇中醫要針灸，話南方人去到北方好易有關節炎。」
長居北京的Don，衣食住行通通都要自己支付，他透露最初只有能力租住約一百八十元人民幣的賓館，後來為慳錢更寄居朋友家，他說：「有啲比我早去發展嘅香港朋友，同佢哋坦白講我唔掂，佢哋就留咗張L形嘅七人梳化畀我，一瞓就瞓咗兩年幾，張梳化由直板俾我瞓到U字形。」
由於當時身無分文，Don更怕回香港見朋友，他解釋：「怕遇到後輩要派利是嘛，寧願留喺北京進修吓。」他現在的經濟環境較以前好，已搬離朋友家獨居，搬往月租五千元人民幣的七百呎新居，他笑說：「o依家屋苑樓下有人工湖，仲有錢買架單車代步。」
Don現在不再追求名牌靚衫，只追求心靈快樂，他笑謂：「唔要喇！其實環境好、食住好，咪又係一個皮囊，我離開屋企冇養家出嚟打拼，憑乜食好住好吖？以前間中會喺朋友衣櫃攞衫嚟着，所以搬屋時行李都唔多，一個大膠箱拉住就走。」真的很瀟灑！
李逸朗哭腔唱《儍女》
李逸朗Don，一個本來已被遺忘的名字，一篇專訪，才令人知道，原來Don喺同蔣雅文拆檔後、北上發展的日子，冬天游屎河，瞓足兩年梳化，最初只有能力租住約一百八十元人民幣嘅賓館，後來就連賓館都住唔起，令人鼻酸。
幸好如今Don谷底反彈，投資開設製作公司，去年底更圓夢，花六位數自資出版唱碟《Fly Me To The Earth》，隻碟本月推出，有樂評人話，「五年光陰磨一劍，於是有了《Fly me to the earth》這樣一張專輯，專輯裡的每一首歌都是他這五年生活體驗的『見證者』，是這位從香港來的『北漂』獨有的記憶味道。」咁究竟係乜嘢味道？不如聽下呢首收錄喺碟中嘅經典金曲：《儍女》。
陳慧嫻版本嘅《儍女》，深情無限；李逸朗版本嘅《儍女》，分別不在於女聲變男聲，而係……嗰隻「哭腔」，真係唔係個個消化得了。《儍女》首歌本來已經慘豬，好儍好天真嘅feel，而李逸朗呢隻哭腔，有人話，好似「哭墳」。有網民話:「聽左10秒，果斷熄咗佢=_=」，但似乎好多人連10秒都頂唔到，仲有人衰到話:「大酒店專用？」。
網民評價：
「最後十秒笑死我」
「仲《越難越愛》？快聽新歌啦！」
「首歌做乜嘢⋯btw真係無笑，因為唔知佢唱緊乜lol」
「唱歌都要有戲劇張力呢家嘢，我哋平凡人識條鐵咩？」
「佢好有guts~竟然可放在碟中～這就是arts～_～（雖然我不懂欣賞～)」
《Fly me to the earth》曲目:
1.《是不是這樣的夜晚你才會這樣的想起我》
2.《十個女仔》
3.《梅蘭梅蘭我愛你》
4.《城裏的月光》
5.《流菲飛》
6.《愛的箴言》
7.《十個女仔》os版
8.《唯獨你是不可取替》
9.《儍女》