梁嘉琪加入無綫多年，工作由拍劇、主持甚至DJ都涉足得到；而黃翠如轉會不到一年，便一躍成多套劇集的女主角，更是大家力捧的翠如BB。兩人看似互不相干、截然不同，但原來私底下，她們卻是互相扶持的好姊妹。

撰文：Crystal 攝影：Daima

梁：梁嘉琪 黃：黃翠如 都：都市日報

村姑相遇

能由同事變成好朋友，當中一定有些特別的原因，亦要有其中一方願意踏出第一步，她們表示，能成好友只因兩人的性格配合得好，爭執可謂少之又少。

都： 甚麼原因令你們成為好友？

梁： 我們會做朋友全因她在打扮上夠Hea，甚至比我更誇張，所以在她身邊會好舒服，正如我出街不化妝，亦不會希望隔籬的朋友濃妝登場。

黃： 我們的生活態度，思考方式相似，都很喜歡踏實的生活，而且我們都不喜歡行街，每次出街都只是為了食。

梁： 即是喜歡耕田的生活，我們私底下好似村姑。

黃： 我們會一起去旅行，兩個人會好快達成共識。

梁： 我們去旅行時好多嘢都唔需要特別去傾，因為佢好就得人，而我就最緊要食。

黃： 其實係我無性格，去邊度，食咩都無所謂，而嘉琪就最緊要有得食，其他嘢佢都OK！

梁： 有部分女仔會口中話無所謂，但心底其實會介意，好彩她是真的咩都無所謂！

黃： 因為我都鍾意食，而且我真係好懶。

梁： 所以主要都係我話晒事……好煩！哈哈！

都： 既然兩人感情深厚，要講出對方的缺點，應該完全無問題？

梁： 黃翠如真係太無性格。

黃： 無錯，這個是我的優點亦是缺點。

梁： 同埋佢好無記性，有時同佢講嘢會好勞氣，佢又係一個路痴，但係佢又真係表現出好無辜，又嬲佢唔落。

黃： 哈哈，佢有時真係會好勞氣，而梁嘉琪最衰的就是成日唔聽電話，可能她知道我會講廢話，所以特登唔聽。

梁： 其實我係一隻無腳的雀仔，我好忙。

黃： 她周圍都有朋友，成日都唔得閒，我冇朋友，但又成日約不到她，我唔鍾意。

梁： 實情是佢想私有化我。

享受當下

兩人同樣由有線轉會到無綫，同樣以主持起家，理應遭遇相近，但近年兩人的星途卻差天共地，有人會替嘉琪不值，但亦有人會覺得翠如紅得有道理。

都： 眼看好姊妹第一套劇就一炮而紅，多年來都做綠葉，會否有點眼紅？

梁： 我好明白我應該走的路線，我不是女主角的料子，除非有一套真的好適合我的劇，否則畀我做我都不太敢。而且我不是走黃翠如般靚女的路線，做配角反而更適合。大家在為我不值實在有點抬舉我，哈哈。

黃： 玩嘢啊梁嘉琪！就算能成為女主角，我都每日在擔心，因為我很容易無自信。而且娛樂圈就好似海鮮一樣，今日是我做女主角，但明天可能己經不再是，我都只能做好分內事，享受當下。

都： 不論配角主角，都總會收到網友的負評，會否刻意去看？

梁： 黃翠如會睇㗎，我成日都叫佢唔好去睇，因為我都經歷過不停被人鬧的時期，只會令自己更唔開心。

黃： 我依家不會看了，因為太多人只是為鬧而鬧，劇集都未播映已經有人開始鬧我，所以現在都學會唔放上心。

梁： 我都曾經去留意，尤其是當初拍《學警雄心》的時候，有理性的意見我好樂意睇到接受，但好多人會人身攻擊，有時我都會抵唔住氣回覆。

黃： 佢痴線㗎！當時佢睇到鬧得太過分時，會鬧番人轉頭，咪中咗人地計囉！好彩她現在不會了。

為角色下苦工

兩人老友鬼鬼，合作拍劇應當得心應手，而正在播映的《師父，明白了》，就是她們第二套合作的劇集。雖然能與好姊妹開工實在可喜可賀，但兩人的角色充滿挑戰，拍攝時亦並非想像般容易。

都： 今次的角色有否特別困難的地方？

梁： 我於劇中做一個啞妹，大家都以為我最辛苦，其實我主要是做口形或設計出部分自創的手勢，反而大家要背埋我的對白仲辛苦，當然我亦要花時間去融入，做一個好真實的啞妹。

黃： 拍劇的時候我真的當嘉琪是啞的，哈哈！而我則做一個劫富濟貧的小偷，內心戲很多，我需要時間去消化。相對上次的《心路GPS》，今次的角色與自己性格有頗大的分別， 我要花的時間更多。

雖然兩人都為劇中的角色下過一番苦工，但播出至今不但收視和口碑不俗，甚至連周潤發都公開大讚翠如BB做得好，令她不禁笑言有一種好甜的感覺。付出心力辛苦拍攝，都總算有所回報。