同期出道 結怨20年 梁思浩咒周星馳 落十八層地獄

網上近日流傳一篇文章《為甚麼這麼多人黑周星馳?》導致經常令觀眾發笑的周星馳,成為圍插箭靶,尤其向華強太太陳嵐鬧爆星爺,不少曾跟他合作過的人如林小明﹑邵音音等都聲討。

一向敢言的梁思浩也入戰團,思浩表示力撐向太,他前晚一連兩日連環發炮數臭星爺。前晚先爆星爺賤買思浩古董車,昨日思浩在尖沙嘴,出席有線節目《怪談.落你降頭》時,更揶揄星爺要落十八層地獄。

思浩和星爺識於微時,當年合作無綫綜藝節目《歡樂今宵》,兩人同撈同煲,兄弟一場,思浩前晚錄影now節目《娛樂審死官》時,還跟李麗蕊唱雙簧寸星爺。

思浩回想88年跟星爺、林穎嫺受力捧開劇,當時思浩和星爺扮兩兄弟而稔熟,星爺看中思浩駕駛返工的古董車,思浩說:「當時呢架係我第二架車,我都好鍾意,佢(周星馳)問我幾時賣,佢話好鍾意,佢話我哋咁好朋友,你賣畀我啦,我話平五萬唔得,佢話自己冇錢唔掂,我話平兩萬啦,我買架車返嚟都12萬幾,佢話下次賣番畀我,於是我當擺喺度畀佢用,結果兩萬賣咗架車畀佢,佢當時答應遲啲兩萬賣番畀我,佢就揸走咗,之後我哋分開發展,又冇乜聯絡。」

其後星爺星運越撈越好,兩兄弟94年在電影《國產凌凌漆》片場再見,思浩興奮大叫「星仔」:「佢黑我面黑咗成日,我就知道原來佢就唔係以前嘅佢,呢件事令我幾傷心,我從來冇同人講過呢件事(指賣車),我傷心在佢hurt咗我個心。」

對於圈中人鬧爆星爺,思浩說:「佢唔介意喎,佢最緊要係有錢,佢唔介意有冇朋友,叫我評價佢,佢對係一個有才華、而冇品格嘅人。」

思浩昨日出席有線活動,更請來師傅以蜘蛛、蛇、蠍子等五毒物,為王寶寶(春卷)即場示範解降頭。春卷大爆節目中曾受鬼降兼遊地獄,甚至撞鬼。

思浩竟抵死叫春卷把地獄情況轉述星爺,他說:「希望佢知地獄係點,等佢改過,知道將自己性格改番好啲,對人好啲。佢聽完知驚㗎,咁唔好啦。呢個世界,睇吓落邊層,佢可能十八,我可能四,大家唔同,我冇話我上天堂,我都係落地獄嗰批,大家層數唔同。」

思浩指現在肯撐星爺的只有兩種人,他說:「第一種搵緊佢錢或打緊佢工,第二種係同佢臭味相投。」

同期出道 結怨20年 梁思浩咒星爺 落十八層地獄
思浩咒星爺落十八層地獄。

思浩玩大咗 曾得罪人遭掌摑

梁思浩多年來都表現出位,試過得罪人遭掌摑,又試過與白韻琹爆罵戰,今次更咒周星馳落十八層地獄。

玩出火被摑
01年在《歡樂今宵》因模仿容祖兒玩出火,最終遇襲被掌摑,要報警求助。

含淚訴被虐
12年於now節目含淚控訴拍周星馳電影《國產凌凌漆》時被虐待,誓言「乞食都不會再拍周星馳的電影」。

鬧白韻琹老
13年,因不滿白韻琹在其節目遊花園不談婚變,在微博鬧爆白姐姐:「罵你便罵你!管你是白韻琹!」又指她是老女人。

欲娶翁美玲
13年計劃與岑寶兒在節目《怪談》,與已故藝人翁美玲及鍾保羅冥婚,遭外界狂轟,翁生前男友湯鎮業怒斥是娛樂圈恥辱。