2011年，前「亞視一哥」林韋辰撻着細自己廿三年嘅體育主持李思雅，一段「父女戀」成為娛圈佳話。兩人雖然兩年前分手，李思雅更曾與圈外男友拍拖幾個月，但近日林韋辰頻頻發功箍煲，兩人早前更帶女方父母，合家歡去中環嘉年華。

復合成功，難怪在內地自組公司開戲的林韋辰好風騷咁話：「大家相愛過，又好有默契，分手只係 timing唔啱！」

全程黐實
就算唔係玩自拍，林韋辰同李思雅都係並肩而行，全程黐到實。當日林韋辰為李思雅合共贏到兩隻公仔，難怪佢咁得戚。

連體入場
2月 4日，兩人搭的士去中環嘉年華，一落車，兩人已經攬腰搭膊黐到實。

甜蜜自拍
每次見到景點，李思雅都要林韋辰同佢玩自拍， sweet爆。

現年 52歲的林韋辰，出道多年星運平平，但斯文形象深得師奶 fans愛戴，更曾獲「亞視第一師奶殺手」美譽。事實上，林韋辰雖然離過婚，還有一名女兒，但佢一直鍾情後生女，曾經和 04年亞姐冠軍呂晶晶拍拖六年，之後再火速搭上現年 29歲的無綫體育主持李思雅，更被雜誌拍到他對李思雅管接管送。

多年來，林韋辰拍過唔少劇集，最為人熟悉的，是 99年為亞視拍《南海十三郎》電視版。

一家過海

玩到晚上，林韋辰帶埋李思雅父母搭船過海食飯。李思雅父母都有一齊去嘉年華，不過就刻意俾佢哋二人世界，相當識做。

攬實影相

今年 2月 4日，李思雅同林韋辰一齊以 cap帽 look現身環球嘉年華。同行還有李思雅父母及菲傭，但李思雅同林韋辰形影不離，林韋辰除了全程充當女方私人攝影師，他與李思雅自拍時，仲甜蜜攬到實。見埋家長，以為兩人好事近，點知他們自爆兩年前曾分手。

「 Cindy（李思雅）一心諗住 30歲前結婚生仔，兩年前曾同阿辰講想結婚。不過阿辰份人吊兒郎當，乜表示都冇， Cindy心淡咪同佢分手囉。之後 Cindy有拍拖，不過拍幾個月就散咗，都 dry咗一年。阿辰其實仲鍾意 Cindy，佢呢幾個月再次發功， Cindy就心大心細，欲拒還迎咁囉！」知情者說。

2月 13日，兩人一同出席高爾夫球活動時，異口同聲話已經分手，不過李思雅就緊張到玩手指，唔及老江湖林韋辰咁啖定。

假「兄妹」真復合

2月 13日，林韋辰和李思雅齊齊出席香港高爾夫球會活動，當記者表示拍得他們兩人見晒家長，是否好事近？李思雅堅稱兩人只係「兄妹」：「我同佢（林韋辰）冇一齊都一段時間喇！嗰日係同工人姐姐 farewell，佢都識咗阿辰好耐，所以佢指定要阿辰去。（但見你哋喺嘉年華拖手同攬腰喎？）我哋好 friend?，依家關係好似兄妹咁！」

既然兩人分手，林韋辰點解唔避嫌，仲當住女方家長面前同李思雅咁親密？林韋辰解釋牽強：「凍吖嘛！（會唔會復合？）係未知數嚟！大家相愛過，又好有默契，分手只係 timing唔啱！」擺明留定後路俾自己。
至於李思雅被問到會否復合時，亦甜笑兜圈，一味講今年有好多朋友結婚。女方都已經放晒口風恨結婚，林韋辰今鋪應該冇得再拖。

林韋辰多年來緋聞不多，他曾與 04年亞姐呂晶晶拍拖六年，林韋辰比女方大 21年，似乎佢鍾情嫩口女友。

李思雅是前香港網球代表隊成員，她曾在《天與地》飾演林保怡助手，同林保怡更有情慾場面。

翻撻易結婚

其實不少圈中情侶都試過「翻撻」，當中唔少更可以修成正果。

謝霆鋒　王菲
謝霆鋒和王菲早於 2000年被驚爆姐弟戀，至 03年分手。去年傳媒發現霆鋒與阿菲在北京寓所朝夕共對四日，阿菲更向霆鋒甜蜜送吻。

安仔　 Sammi
鄭秀文與許志安分手多年，直至 2011年，二人被拍到在太平館甜蜜撐枱腳，復合正式曝光，去年更傳兩人已婚。

周慧敏　倪震
周慧敏與倪震拍拖二十年， 08年爆出男方與內地女生張茆激吻，周慧敏高調發分手聲明。但一星期後，二人卻離奇翻撻，更宣布結婚。

陳慧琳　 Alex
天后陳慧琳 92年與圈外男友 Alex拍拖， 99年兩人分手，最終由於雙方家長發功而復合，並於 08年結婚。