現年37歲的人妻林雅詩(Grace)後日舉行寫真發佈會,外間一直盛傳Grace和丈夫溫文英婚姻亮起紅燈,昨日有報道指林雅詩五年來跟丈夫沒有性生活,更被精神虐待嗌離婚,Grace昨接受電話訪問,她直認最近跟老公因寫真集嗌交,她說:「因為寫真集問題都有啲拗撬,其實一路冇同佢講,我冇講大話,我係冇講過畀佢聽出寫真,因為最近太多報道,佢知道嚟問我,跟住佢講啲唔係咁好聽嘅嘢。」
Grace指老公對寫真一知半解,她說:「因為佢乜都唔知,淨係知係寫真,佢好師奶,淨係覺得寫真就有啲乜睇,或者可能露點呀!啲思想好古板,我有同佢講冇乜特別嘢,到時你睇到咪知囉,當然我自己知道個底線係邊!」新書發佈會不會邀請老公出席?她說:「我會問佢嚟唔嚟,佢未必嚟,我都會問聲,得閒就嚟喇!」
林雅詩和丈夫關係似乎名存實亡,她說:「我諗?家好多兩公婆嘅關係都係咁,所以好難講。」Grace直認跟老公分房瞓五年,至於是不是沒有性生活?她不置可否:「分房瞓真係五年,性生活又冇刻意話點樣計過,我呢段時間係同囝囝瞓。」講到離婚,Grace表示最近一次鬧離婚是一年前的事,如今是不是仍然想離婚?她說:「如果往好嗰方面睇,我都係想挽救,唔想去到咁盡,我爹哋、媽咪都係離婚,我唔想行番佢哋條路,想有個happy family,但係好多嘢未去到最後唔知,可能離咗婚會更加好。」Grace今次復出推出寫真集,強調是想擁有自己事業,她說:「咁啱係有人搵我出寫真,我想返內地登台,可以做吓其他嘢,其實我最主要唔係香港,我想話畀人知我返出嚟。」