鍾嘉欣19歲代表溫哥華參選《2004國際華裔小姐競選》，當年不善交際，只懂龜縮佳麗堆中的她，早已打定輸數，偷偷致電回溫哥華說：「冇人訪問我，冇人留意，我諗我應該輸梗！」結果，當年評判陳慧琳眾裏尋她，一手將怕醜又被動的鍾嘉欣揪出來，將她引領到華麗的舞台，燃亮她的演藝生命！
■獲其他花旦競爭對手鼓勵，嘉欣未贏獎先贏友誼。攝影：陳志嵐
入行九年，鍾嘉欣龜縮了七年，過着似有還無的迷失生活，直至去年突然開竅，今年年中遇上《玩嘢王》，跟李思捷一場魔術戲中戲先聲奪人，騙取百萬觀眾喝采聲，榮獲同事們夾道的歡呼聲。論形勢，談演技，得民心，「最佳女主角」鍾嘉欣是大熱之選。可惜！綜藝節目不可以提名最佳女主角，若可破格提名，非嘉欣莫屬。
撰文：楊潔雯
■自比為縮頭烏龜的嘉欣，慢慢爬出信心，視后終點在望。
今年鍾嘉欣大有機會憑劇集《巨輪》提名最佳女主角，形勢雖好，但變數仍在。如白兔般純潔可愛的嘉欣ＢＢ，最喜歡卻是龜。奇怪嘉欣堅持用龜兔賽跑比喻最佳女主角，原來她要做那隻慢跑小烏龜，她說：「覺得自己好似隻烏龜，開頭係縮頭烏龜，慢慢開始冇咁驚，慢慢爬下爬下爬出嚟開始有信心，就到咗終點衝線，我希望我個古仔好似咁樣，我贏嘅目標就係攞視后！」
烏龜目標在望，但卻慘被是非纏身，先後傳出為爭視后與周麗淇、楊怡等鬧不和，幸而其他兔女郎紛紛表態支持和鼓勵，得到對手一致支持，嘉欣受寵若驚：「今年好感動，聽到杏兒話支持我攞視后，楊怡亮燈又話支持鍾嘉欣攞視后，法拉又同傳媒講希望嘉欣攞視后，徐子珊又喺雜誌話撐鍾嘉欣攞視后，我未試過得到咁多人支持，呢種感覺已經開心到極，攞唔攞獎已經唔重要，今年得到嘅禮物超乎想像，個感覺係我呢隻烏龜就嚟爬到喇！」
早前播完的《巨輪》入面，嘉欣主力談情說愛，用心演繹，若果單憑《巨輪》提名，嘉欣抱有一定信心：「呢個角色表現都好滿意，我花好多心機去做造型，搵咗好多以前王祖賢、周海媚、周慧敏，甚至王菲嘅衣着品味、談吐參考，私伙搵咗我媽咪借好多套衫，朋友話我出鏡好有90年代女仔嘅味道，今次我係第一次為套劇設計口頭禪『Oh！My God！』希望觀眾記住鍾嘉欣，記住卓靜呢個角色。」
獲高層稱讚
拍攝前準備充足，拍攝時信心十足，在播映前夕，還得到戲劇製作總監曾勵珍的短訊鼓勵，一支強心針頃刻填滿嘉欣虛空的心，她說：「《巨輪》未播之前，珍姐（曾勵珍）有一日WhatsApp我話：『嘉欣我睇咗《巨輪》你嘅表現，有好明顯進步，我戥你好驕傲，好開心，繼續加油！』一個咁短message睇到我淚水直流，珍姐係好難得會講呢番說話，我記得《隨時候命》收到已係八年前，係我第一套劇，佢話我有潛質，真係好感動，好大鼓勵，我嗰刻喺度諗我係咪得喇！」
■憑《玩嘢王》七情上面的演技，令嘉欣贏盡觀眾掌聲。電視圖片
■嘉欣演喊戲駕輕就熟，料不到早前拍《飛虎II》意外受傷，令她變真喊。資料圖片
乖女求突破
嘉欣續說：「我唔係話要攞最佳女主角，演技進步咗，有信心下一套會再好啲，今年收到好大支持，但唔敢話好有信心，未到最尾唔知㗎！平常心面對，如果方向錯咗，會為咗獎而努力，唔係為咗想做好部戲而努力，演戲嘅路好長，仲有大把嘢要做，呢個可能只係起步！」
時機成熟，嘉欣破繭而出，她要抓緊任何會飛的機會：「近兩三年公司開始比我脫，唔係，哈哈！即係畀我試多啲新嘢，以前好保守，認為只可以做到乖乖女，由Miss Cool到一個創傷後遺症女仔，跟住又畀我做綜藝節目，以前我冇綜藝節目做，又唔會上遊戲節目、旅遊特輯，更加唔會上《玩嘢王》，慢慢畀監製見到我想衝出個框框。」
化妝：Kenny Cheung（K’creative work shop）
髮型：Roy Tse（Hair Corner）
場地：Hair Corner
服裝：Maje、Gat Rimon（Rue Madame）、Ksubi（I.T）、Halston Heritage（net-a-porter.com）
喊出深層次
■外形如白兔般純潔可愛的嘉欣ＢＢ，原來最喜歡的是龜。
「喊」是嘉欣的拿手戲碼，由最初聲嘶力竭地哭，看得人由憐生厭，至近年開竅漸見層次，她笑說：「係㗎！以前啲人成日話我記得鍾嘉欣，係因為佢喊，對我嚟講，就算佢哋話我喊得好靚呀！反而我聽完唔係好開心，希望人哋記得我係識演戲，唔係識喊，喺《巨輪》有好多喊戲，但係我全部用咗唔同處理方法，冇晒嗰種歇斯底里大喊，開始覺得原來喊係可以喺裏面喊，有層次。」
■嘉欣在《點解阿Sir係阿Sir》攬陳豪哭崩一幕，演技獲觀眾激讚。
電視圖片
■嘉欣（右）大有機會憑《巨輪》提名爭視后，她揚言花很多心機設計造型，充滿90年代女仔味道。劇照
令嘉欣一喊而紅，《玩嘢王》功不可沒，她仍然興奮：「最開心係連譚詠麟都話嘉欣演技好好，同埋我未試過返公司入canteen，無啦啦成個canteen嘅人喺度鼓掌起哄，個個喺度恭喜我，好似我攞咗獎咁呀！又有人好似識我廿年咁走過嚟話：『你好好呀！恭喜晒！』唔知以為我宣佈擺酒定結婚，成兩三個月keep住咁，仲勁過最佳女主角，以前常在心同Miss Cool嗰陣效應都好大，但冇o依家咁大，真係好恐怖，嗰種認同感真係好大，真係好開心。」