鍾嘉欣不講結婚對象 滿足與男友沙灘看日出

鍾嘉欣穿上藍色性感吊帶裙,今日在將軍澳片廠拍攝護膚品牌新廣告,她透露剛由韓國拍完旅遊節目《度身訂造旅行團》返港,大讚好玩:「佢哋邀請咗我兩位fans去,一男一女,佢哋負責幫我安排行程,俾咗好多驚喜我,詳情唔講得住,但係人生永遠記住回憶。」

嘉欣坦言以前男友不太浪漫,問到男友可有給予難忘回憶?她表示只要對方帶她到沙灘看日出日落已很難忘,就算對方只係自彈自唱,都好滿足。她說:「我很容易滿足和開心,影一輯美麗照片已很開心。(是否裸照?)相信我這生也不會拍裸照。」問到男友伍允龍有否試過自彈自唱?嘉欣冧笑表示:「唔知呀!」嘉欣表示自己不太著重物質,不過結婚時一定要有戒指:「但係粒鑽石幾大粒,就冇乜講究,最緊要錫我!(搵到結婚對象啦!)點答㗎呢啲問題。(求婚未?)暫時以事業為重,依家係衝緊嘅時間。」

鍾嘉欣滿足與男友沙灘看日出日落

談到與嘉欣同屬星煥唱片公司的江若琳約滿離巢,更有指是因為江若琳不滿公司偏重嘉欣,嘉欣對此表示非常無辜:「全公司啲人唔續約,作唔到歌都關我事?我同江若琳私下好friend,冇不和。(爭竉?)又傳我同欣宜爭、同許廷鏗又爭,連新加入嘅謝安琪都爭,個個都爭,點爭?都唔識爭,我淨係希望做好自己。(覺得老闆偏心你?)我覺得佢錫我,但唔係特別偏心我,我自己都有努力,唔想被抹殺,嚟緊8月我會開演唱會。」