「天兔」來犯，51歲嘅亞視藝人劉錫賢，一早揀咗呢一個吉日，同37歲女友陳麗娜共偕連理，於灣仔W Square舉行酒會，真真正正係打風都打唔甩喇!

新娘子係圈外人，來自珠海，喺澳門工作。一對新人今午喺灣仔舉行酒會，切蛋糕飲香檳，一眾亞視好友、幕前幕後，包括馮雪冰、林紫君、張家瑩同六合彩之子蔡國威等齊來到賀，至於兄弟就有馮家俊、甄思羽、顧冠忠、蔡國威同梁浩楷，熱鬧過台慶喎!

一對新人身穿鮮紅禮服，肥仔賢套火紅西裝，同新娘子嘅紅tube dress襯絕，肥仔賢親吻老婆嘴仔同面珠仔，全程任影。但劉太始終唔係圈中人，難免有啲「生硬」，但就非常感動。現場眾人起哄叫勆佢哋咀嘴，結果連咀三次。好事成三，恭喜恭喜!

原來兩人去年先至認識，今年年初劉錫賢已火速求婚，佢話:「多得黃樹棠介紹，見我孤家寡人，緊張我，介紹俾我識。」咁點樣答謝呢個大媒人先？劉錫賢話:「今晚佢就知，本來請佢做兄弟，但佢話自己年紀大，唔制。」至於劉錫賢點樣打動佢？新娘子有啲怕醜話:「你哋問佢啦。」

劉錫賢都五字頭喇，依家終於成家立室，咁幾時生番個B呢？劉太就好含蓄咁話生一個，反而劉錫賢就話：「隨緣啦!」

講番今早接新娘嗰陣，劉錫賢話冇乜特別儀式，但就補充謂:「都係正常斟茶，有玩兄弟，但玩唔到我!一早帶定鐵筆鐵鎚鐵鏈，佢哋(姊妹團)唔開，我就撞門囉，正所謂人才濟濟，唱歌武打都得，叫我三個後空翻都冇問題!」

覺唔覺得…劉太個樣，有少少似賭王四太梁安琪？

劉父病重 結婚沖喜

早前曾有報道指，劉錫賢急於結婚，係因為劉媽媽希望可借婚事沖喜。當時劉錫賢接受訪問時直認不諱，指85歲嘅爸爸因為去年患重病，且早前更有輕微腦退化，故劉媽媽希望兩人結婚沖喜。

今日酒會上，劉錫賢亦坦認:「太太好得爸爸歡心。去年爸爸重病入院，講唔到兄弟名，只叫得出女友個名，話佢未嚟，所以我都想同佢結婚。新年喺醫院團年飯嗰陣，已經問准父母，仲直頭喺醫院團年飯求婚，太太即刻應承我。」

劉錫賢身形「敦厚」，成個「浪子」咁款。問新娘子可有要求老公許下乜乜承諾？劉錫賢即代答：「老婆最緊要我錫佢，你哋唔好整喊佢呀!」但劉太一聽到已經眼濕濕喇。

一對新人嘅爸爸做證婚人。

人逢喜事精神爽，劉爸爸同劉媽媽直頭由心底笑出嚟!

簽咗，劉錫賢笑得幾開心!!!!