劉璇武俠心

國家體操隊出身、有「璇美人」之稱的劉璇,自言從未想過在娛樂圈闖出新血路:「細個由父母安排做運動員,退役後做藝人係機會搵到我,唔係我去選擇!運動員退役後嘅生活唔容易,我唔係為咗出名或賺錢,只係想畀其他運動員睇到,運動員係有機會轉型或者發展其他嘢!」其實「璇美人」的傳奇從5歲開始,當時年紀小小的她離鄉別井到國家隊受訓,00年勇奪悉尼奧運平衡木金牌,21歲退役後毅然入讀北京大學新聞系,幾經轉折,08年當上北京奧運特派記者,其後擔任中國運動員基金代言人。大概是因為被指貌似陳慧琳,造就了劉璇加入娛樂圈,展開銀色旅途。

入娛樂圈如重生

電視劇《女拳》是劉璇簽約無綫後首部劇集,並擔大旗做女主角,她謙稱主角其實是黃飛鴻。眼見不少花旦如佘詩曼、廖碧兒及蒙嘉慧等有意離巢北上掘金,她卻沒有視之為上位機會:「可能香港人去內地發展較難,但我一直在內地都有好多工作,來港發展只屬錦上添花!唔係佢哋走我先嚟(TVB),我同佢哋唔同,呢個係我第二個人生!」

劉璇坦言拍劇最大挑戰並非動作場面,而是講廣東話對白,聽得懂廣東話的她笑言,拍劇三個月猶如上了「雞精班」:「有時會唔小心變咗粗口,例如打交個交字,哈哈!」練體操出身的她,想必對功夫場面應付自如,但她卻大呻難頂:「我都係拍劇先學功夫,初頭學真係好難,功夫講剛中帶柔,好難達到標準,但拍完三個月後睇番,又覺得打得幾瀟灑,原來我都可以做好打女呢個角色!」

劉璇形容目前的藝人生涯如重生:「以前一定辛苦,5歲開始練習,長期喺同一個地方練習同一個動作,長期承受比賽嘅壓力!但喺娛樂圈都辛苦,無論精神上或肢體上都冇得瞓!我覺得自己好似有兩個人生咁,依家我好似嬰兒咁重新學習!」她不諱言因盛名所累,倍添壓力:「體操都話有個目標攞冠軍,但係咁多個演員,獎只係得一個,唔可以話冇獎就等於唔好,總之我只知道做到最好、全心去做,咁就可以幫運動員行出一條路。」

愛情靠互相信任

面對轉型的壓力,劉璇選擇低調處理感情,免得被扣上「大話精」的帽子,她坦承現在的運動員相當幸福,起碼可以談戀愛:「當年我同其中一個隊員只係有啲感覺,即刻畀教練訓話同禁止!」難怪相戀八年、在中央音樂學院畢業並任教單簧管的演奏家王弢是劉璇的初戀,亦是她迄今唯一一段戀情:「男朋友依家喺波士頓進修,但我唔想講咁多,話晒佢都係老師同古典藝術家,唔想佢喺學校唔方便或者打擾佢嘅生活!」面對兩地相思,劉璇坦言愛情必須互相信任:「我份人好簡單好易氹,可能因為咁大家相處得好舒服!(幾時結婚?)未知!讀大學嗰陣想25歲前結婚,但依家過咗,真係未計劃!雖然我唔想做高齡產婦,但冇諗過人工受孕,都係自然啲好啲!」

後記:「無辣可吃」˙狂爆瘡

別以為吃辣才會生暗瘡,祖籍湖南長沙的劉璇卻因為在港「無辣可吃」,導致內分泌失調,拍攝當日長了一粒巨瘡,需搽上厚粉左遮右遮,她扁嘴說:「可能因為濕氣太重,我要食辣嘢先可以散出嚟!我試過一日三餐食辣椒,對我嚟講係必需調味料。」

充滿正義感的劉璇,最希望演警察,一圓我的志願。

充滿正義感的劉璇,最希望演警察,一圓我的志願。

「璇美人」如燕子般在平衡木上躍起,令人一見難忘

「璇美人」如燕子般在平衡木上躍起,令人一見難忘。

劉璇與男友王弢雖然兩地相思,但無礙雙方信任

劉璇與男友王弢雖然兩地相思,但無礙雙方信任。

劉璇

「打」救花旦

功夫片近年「翻Hit」,無綫即「食住條水」開拍《女拳》,其實不少花旦亦轉型做打女!

廖碧兒
09年廖碧兒與Maggie Q合演《拳皇》,一心以打女姿態勇闖荷里活,惟電影無緣在美國上映。

陳法拉
法拉參與處女電影中,與謝天華有不少動作場面,並揚言有意轉型做打女。

徐子珊
徐子珊與甄子丹及趙薇在電影《錦衣衛》中惡鬥連場,在內地打足三個月的子珊,有傳因頭暈及發燒入院。

廖碧兒

廖碧兒

陳法拉

陳法拉

徐子珊

徐子珊