李泳漢挺弟:楊思琦或懷泳豪骨肉 怒斥思琦促還清白

斥思琦自打嘴巴 泳漢:還我李家清白

楊思琦與李泳豪分手後形象插水,直至本報踢爆新歡身份,思琦突開腔承認戀情,更數臭李家上下。泳豪兄長李泳漢昨挺身接受本報獨家訪問,直斥思琦自打嘴巴,更怒吼謂:「我要佢還我哋李家一個清白。」

李泳漢強調由始至終李家只是想說出事實真相,相反思琦為保形象,每次版本都不同,今次的指控更是存心靠害,完全沒有事實根據。

記:點解咁肯定豪仔同思琦最近先分手?

漢:今年一、二月,思琦仲好甜蜜翹住豪仔話要結婚,婚紗、蜜月、酒席全家一齊傾,佢仲同我講要一百圍酒席。

記:你點知嗰次搬走唔係因為分手?

漢:佢之前搬出去話想同佢阿哥團聚,但一直有返嚟瞓,佢仲有好多濕碎嘢喺我屋企。

同房瞓叫畀面?

記:今年五月佢出席豪仔生日會時,係咪畀面才以女友身份亮相?

漢:嗰日完咗生日派對,佢仲去我哋屋企過夜,同豪仔瞓埋一間房,咁樣叫畀面?

對於思琦指曾要出錢修補天台,泳漢直指大話連篇,根本事情五年前搬入去已經發生,依家仲同業主立案法團打官司,思琦冇可能有付款。

記:佢話你哋對佢差,實情係點?

漢:有樣嘢我本來唔想講,有晚凌晨兩點幾,思琦喺廚房食緊火龍果,我阿媽咁啱又想入廚房,佢唔讓條走廊畀我阿媽不特止,仲好似嫌我阿媽阻住佢,竟然發晦氣叫老人家食屎。佢有大部分時間都係order我細佬做嘢。好似成日開完工返嚟,一句我好肚餓,就要我細佬煮杯麵佢食;做嘢整親隻腳,又要我細佬幫佢煲中藥同按腳。平時錄嘢又要我細佬,電腦有啲咩又呱呱嘈要我細佬搞,連佢表妹瑩瑩,都話佢當我細佬賓賓。

食人住人仲唱人

記:有冇試過喺你哋面前胡亂發脾氣?

漢:有一次我哋喺屋企食緊安格斯牛扒,佢突然好大力放低刀叉,衝入房同我細佬嘈:「話連麵包同菜都冇,你點養得起我。」第二日仲同工人講,話我媽有心害佢,明知佢生暗瘡都要佢食牛扒,你話佢講嘢幾過分。

泳漢最後有感而發說:「希望楊思琦憑良心同讀者講出事實,唔好用下三流手段,以家醜轉移視線,食人住人仲要唱人,還我李家一個清白。」

泳漢與媽咪施明接受本報專訪,力數思琦大話連篇。

泳漢與媽咪施明接受本報專訪,力數思琦大話連篇。

泳豪心痛 家人受傷害

被楊思琦大爆常被母親施明及哥哥李泳漢欺負的李泳豪,昨日親自駕車接載接受訪問的母親及哥哥到場,似乎他跟家人的關係未有如思琦所指惡劣。明顯比前更頹喪的李泳豪,說要趕去開工而婉拒受訪,但當被追問有否看過楊思琦力數李家的訪問?他雙眼通紅說:「有,既然佢承認有第三者,佢對我嘅傷害已經好深,我希望佢唔好再講落去,唔好連我屋企人都傷害埋。」

對於被思琦指險遭哥哥打斷手一事,泳豪篤爆舊愛講大話:「唔係事實,係練拳整傷,完全唔關哥哥事。(話你欠卡數、唔打算結婚?)一齊九年,點會冇打算結婚?我多次同佢傾結婚,但佢每次都係話要遲啲,話怕影響事業。我為結婚仲儲咗筆錢,最近又多咗嘢做,點會爭卡數?」

李家鼎:辣興我佢就富貴

楊思琦受訪時表示為李家出錢出力,令舊愛李泳豪父親李家鼎再次「興過辣雞」,聲言對方「擘大眼講大話」!提到思琦表示與李家唔夾,鼎爺說:「咁又唔搬出去?我有問過佢,當時佢冇反應,依家又講咁多嘢,當我低B!」他又狂數往事力證自己有記性:「佢有請我食嘢!有幾次,六十一個半一餐飯,十六個半買雜物同一包煙,最貴係七百幾蚊多謝我教功夫,不過佢同我學騎馬都冇交學費啦!為咗幫佢搭狗屋,我仲畀人抄兩次牌,都冇同佢計!」

對於思琦表示兩家人沒有傾過婚事,鼎爺再次激動:「佢仲話阿媽要求擺幾多圍酒!(見過佢父母?)見過佢阿媽四次,佢阿爸一次,2002年!」對於思琦的感覺,鼎爺說:「佢最叻,我打滾幾十年都畀佢呃咗!不過,唔好辣興我,唔係佢就富貴。」

思琦認新歡護「帥」非小三

楊思琦決絕與李泳豪分手,昨日終證實本報所指的新歡吳帥的男友身份,正式予對方一個「名分」。對於與李家的爭拗,思琦希望盡快平息,但最掛念留在李家的六隻愛犬,揚言攞唔番都願意畀「飼養費」

「思豪戀」分手搞到一團糟,思琦為令豪仔死心,竟然用上「同第二個男人有BB」做分手藉口,她強調有BB是假的,但對本報踢爆新歡吳帥(Andy Ng)身份曝光,卻不敢再隱瞞,但澄清對方並非第三者,她說:「未入行前已識佢,去年朋友聚會上撞番,但今年五月先發展。」據知思琦去年參與舞台劇演出,Andy亦有撐場及到後台為她打氣。有指做貿易生意的Andy曾欠債不還,思琦沒好氣說:「知道呢個唔係事實,所以唔回應,但我相信佢。」問到是否年底結婚?她說:「唔講住,如果係會話畀大家知,但現階段仲要努力搵錢,想專注事業。」

與李家冇偈傾

思琦和李泳豪分手已成定局,但爭拗仍未平息,連日來被李家上下狂數不是,她承認與豪仔分手主因是與對方家人關係差,至今已達「冇偈傾」地步。有指思琦在李家居住期間沒有畀過一分一毫,李泳豪母親施明更揚言不會交還六隻狗仔予思琦,認為她沒有盡做主人的責任好好照顧牠們。

爭六犬撫養權

思琦反駁說:「我第一隻買嘅八哥係『懵懵豬』,佢話我冇負責任,但其實一直以嚟帶狗睇醫生、沖涼同狗糧都係由我出錢,我唔想畀人覺得分咗手就唔理啲狗。」思琦表示一直視愛犬如子女,未能帶走亦覺得好可惜,問到會否爭取「撫養權」?她無奈地說:「想等件事平息咗再傾,相信有解決辦法。(最想爭番『懵懵豬』?)隻隻我都想要,即使最後佢哋唔畀番我,我仍希望佢哋會對班狗仔好啲,我願意繼續負責畀錢養佢哋。」

施明親撰佛偈勸導過氣新抱

一直視楊思琦為新抱看待的施明,面對被思琦公開力數不是,包括在家中被施明等人視作透明等指摘,施明大感委屈,向來信佛的她決定親撰四字佛偈的書信給思琦,以抒發心中鬱結,亦作為這位「過氣奶奶」對她的最後勸告。在信中提及的「心惡心毒,好變不好。誰是誰非,天知就好。」似有所指,不過她亦勸思琦「堅持執着,放下最好。心好行好,命能改好。」

施明昨日受訪時表示與思琦共處九年,當她如親生女看待,對得住天地良心:「我連屋企嘅狗都咁錫,何況係人?思琦佢口口聲聲話錫狗,但當日佢一走了之,完全無理到啲狗,無返過嚟探啲狗,連電話或者SMS都無打嚟話接番佢哋。雖然係咁,但我哋都依然照顧啲狗。」

施明寫信
「明」醒佛偈
施明寫信時疑激動過度,誤寫「思琦」為「思其」。

吳帥微博「連根拔起」

思琦新歡吳帥於微博化名「cthk118」,由於經常跟思琦在微博傳情而被踢爆其身份,更被不少童鞋在微博狂轟,他亦即時將之刪除,未知是否怕節外生枝,昨日他竟離奇將所有留言統統刪除!吳帥早前曾在微博高調宣布:「十一年的感情終於有了結果。」但傳是「小三」後,他即刪走該留言。而他過往亦曾在微博留過不少出位「名言」,包括於思琦接受電視訪問當日,於微博暗撐思琦:「有人故意歪曲事實的真相,而所有人一定只會同情弱者……真相公諸大眾的時候,再評論對與錯也不為過。」

另外,已向外交代戀情的思琦似乎心情大好,昨晚九時更在微博上載母親下廚照,並一口氣吃了七隻「愛心雞翼」!

明報周刊 第2226期:楊思琦剖白大肚真相 公開新男友背景