藝人汪明荃位於將軍澳銀湖路的獨立屋昨晚遭人爆竊，損失約300萬元現金及珠寶。

汪明荃說，賊人昨晚9時許，趁她的外傭帶狗散步時，撬窗進入她的房間爆竊，連較重的保險箱都搬走，內有加元、人民幣、港元及珠寶首飾，估計總值至少300萬元。她說，外傭很快已返回單位，中間大約20分鐘，所以賊人停留在屋內的時間相當短。

汪明荃又說，因為即將外遊，所以放了一些外幣在家中。她說，賊人似乎相當熟悉屋苑的環境，屋內安裝的閉路電視鏡頭的角度亦被轉移至拍攝不到的單位走廊。屋苑最近有部分單位搭棚裝修，可能賊人有機可乘。而最令她心痛的，是存放夾萬內甚有紀念價值的結婚戒指失去，丈夫羅家英答應再買一隻送給她。她慨嘆，這是多年來第三次遭爆竊。

汪明荃亦於微博寫道：「昨晚9:30分liza jie 家中有贼入屋,行动迅速,20分鈡內,抬走了保險箱,帶走了现金鑽飾结緍介指特區護照,捐失很大,幸好当時冇人在家,亦冇受傷,朋友不用担心!这是20年內第3次贼人入屋,比中六合彩的机会率還高!唉 !大佬呀,嗰啲係我血汗錢嚟架,要嚟養老架,真係冇陰公 !希望警察做嘢,保蘐市民性命财產,唔該晒!」

據警方稱，昨晚10時許，接到65歲女住戶報案，指寓所遭爆竊。警員到場調查，發現屋內一窗戶被撬開，有被搜掠過的痕迹。

案件交觀塘警區刑事調查隊第八隊跟進，暫無人被捕。

藝人汪明荃位於將軍澳銀湖路的獨立屋昨晚遭人爆竊，損失約300萬元現金及珠寶，今早她向傳媒講述情況。

「連中三元」 91年、99年曾遭爆竊

翻查資料，阿姐位於銀線灣嘅別墅，分別於91年及99年遭匪徒撬窗潛入爆竊。91年損失財物逾百萬元，99年再遭爆竊，失去一隻鑽石勞力士手表、一隻Tiffany鑽石手表，另首飾及現金共近七十萬元。汪明荃昨晚在接受記者電話訪問時表示，失物中包括母親及亡姊留俾佢嘅兩樣物件，令阿姐心痛不已。

當年阿姐受訪時表示：「媽咪畀我的物件係一個鑽石心口針，我經常戴住參加宴會，而家姐畀我嘅遺物，係兩條養珠鏈，雖然價值都唔昂貴，但呢啲係屋企人留畀我嘅物件，係最珍貴同最有紀念價值嘅，我好心痛！」當時阿姐更將有關飾物嘅相片交俾傳媒，希望盡快尋回。

（資料圖片）

（資料圖片）

銀線灣三層高別墅 87年270萬購入

阿姐三度遭竊匪爆竊嘅寓所，位於西貢銀線灣銀湖路彩濤花園其中一座三層高別墅，面積三千多呎，面向清水灣無敵海景，環境清幽雅致，係阿姐87年以270萬購下，97年曾花費百幾萬裝修，曾一度升值十幾倍，但阿姐仍不肯割愛。

阿姐所住嘅花園別墅，最低一層係車房，拾級而上係花園，阿姐曾表示最鍾意喺呢度望海，亦因為咁所以一直唔捨得賣。

99年第二度遭爆竊前，彩濤花園已聘請看更定時巡樓，圍牆亦加設鐵絲網，花園外更設有警員簽到簿，警員定時到上址巡邏，門外並有保安更亭，阿姐亦養咗三隻狗護身，惜仍遭竊匪「光顧」，今次更是第三次。

99年阿姐寓所遭爆竊時，別墅嘅大門同二樓窗戶被打開、有被撬過痕跡，單位內遭人搜掠。阿姐第二次遭洗劫時，曾投訴花園嘅保安不足，98年11月鄰居亦遭人爆竊，上址保安設施絲毫沒有加強。當時阿姐話:「屋企只有我同女傭一齊住，0依家咁多非法入境者，我諗啲保安當然要加強，我希望警方能多啲派員巡邏，保障居民嘅安全。」

連環爆竊熱點 疑犯案者多為非法入境者

阿姐位於西貢銀線灣銀湖路彩濤花園嘅別墅又遭竊匪爆竊，阿姐本人已經曾「連中三元」，其實該處除咗係名人明星熱居地點，亦係竊匪落手熱點。2000年12月20日，彩濤別墅揭發連環爆竊案，其中一座屬前特首董建華特別顧問葉國華名下別墅，另一幢則屬曾志偉名下物業，皆已租出。幸損失唔算嚴重。

據報道指，葉國華名下別墅，當時由一名意大利籍男戶主租住。案發時，賊人由廚房潛入爆竊，戶主夫婦被驚醒，當時只能靜靜鎖上房門，等賊人離開後先敢報警，警方搜捕疑匪無果。

名導演張堅庭亦曾租住附近嘅碧沙別墅，其住所亦遭爆竊，損失80萬元財物。

西貢豪宅成賊人光顧熱點，特別係年近歲晚之時，更經常發生連環爆竊案，皆因該區屬豪宅區，住客非富則貴，吸引非法入境者犯案，更屬犯罪集團眼中「肥肉」，最猖獗時幾乎每晚就有一宗入屋打劫或爆竊案發生。警方曾指因為彩濤別墅依山傍海，竊匪由山邊爬越圍欄再潛入，得手後沿山坡向阿公灣海邊逃走。

去年8月，清水灣銀線灣銀臺路近銀泉徑嘅「海天灣」，亦發生連環爆竊。據報道指，上址依山而建，有二十多幢兩層高獨立別墅式洋房。屋苑裝有閉路電視監察，四圍亦設有高約兩米鐵絲網，但仍吸引竊匪潛入。其中一戶被爆竊女戶主一覺瞓醒見成間屋摷到亂晒，先至知被賊人打劫。警方調查後，懷疑賊匪由銀臺路邊爬落十米山坡，破壞鐵絲網潛入，再撬窗入屋爆竊。

西貢之友姚瑩瑩 熟睡遭賊撬門爆竊

除咗阿姐成賊匪目標外，居於西貢清水灣茅莆村嘅姚瑩瑩，06年新居入伙僅三日，就遭賊人撬開露台玻璃門入內爆竊。當時姚瑩瑩一個人喺房內熟睡，好彩冇被賊人「滋擾」。直至姚瑩瑩瞓醒之後，先發現失竊報警，損失一批財物同二千元現金。

當年姚瑩瑩係住喺清水灣龍蝦灣路茅莆村一幢三層高村屋，瑩瑩住二樓一個700呎單位。事後懷疑賊人係撬毀露台嘅門潛入偷竊，事後瑩瑩憶述:「個賊喺間屋度行嚟行去我都唔知，你話驚唔驚呀……。」又謂樓下單位較早前亦曾發生爆竊案，今次輪到佢。

06年，姚瑩瑩位於西貢嘅寓所，遭賊人潛入爆竊，其寓所位於二樓（亮燈單位）。（資料圖片）