張國榮做霸王別姬，汪明荃演慈禧太后，最好不過。汪明荃聰明能幹，霸氣十足，懾人的氣勢好像慈禧一樣，令人肅然起敬。慈禧有榮祿做忠心男友，汪明荃當然也有一個對她愛護有加的羅家英。阿姐和家英哥性格，南轅北轍，一緊一鬆，一剛一柔，原來都可以好夾。更難得的是，二人婚後互不管束，間中同枱食飯，又可以各自修行，他們就是過着 21世紀至潮至 in的自由式婚姻生活，認真不簡單。

羅家英和汪明荃拍拖 20年，結婚兩年， 60歲後才結束愛情長跑，他們沒有年輕夫婦的衝動和浪漫，婚姻建立於尊重和互信之間，是一個實在而恒久的關係。當大家以為他們之間是女尊男卑，其實阿姐對家英哥服侍周到，家英哥做訪問時，阿姐還會不時斟茶備水啊！

阿姐和家英哥一剛一柔的性格，互補不足，又互相影響，生活好調和。攝影：葉君海

家英哥和汪阿姐 09年結婚時已是花甲之年，但他們的婚姻是自由和無拘無束的。

阿姐和羅家英合演的大型粵劇《德齡與慈禧》已公演過兩次，下月將作第三度公演。資料圖片

各適其適最潮婚姻

對住硬繃繃的阿姐，家英哥從來都是從容不迫，他說：「佢要話事，又有潔癖，間屋要好乾淨、好整齊，唔能夠摸亂佢嘅嘢，但係我個人比較亂，咁我自己嘅嘢咪放埋一邊，我又唔需要好多地方，我嘅嘢佢唔好搞，我又唔會去搞亂佢嘅嘢。佢坐梳化又係要執番好個枕頭，我就唔會做呢啲，我就係是是旦旦，隨隨便便。」
河水不犯井水，你有你生活，我有我忙碌，是 21世紀最潮的婚姻生活，阿姐表示從不會逼羅生（指羅家英）做任何事，她說：「佢有自己做人處世一套，係值得我哋學習，不過同我完全唔同，佢好放鬆，唔勉強，佢又生活得好開心。佢都成日話我，但係我會用我方法，呢個係我性格問題，我做唔到佢，我知道佢咁樣 OK，我接受，其他唔係咁緊要，大家相處到，都係一個伴，都化啦。好似佢返嚟冇幾耐又話要去打 golf，我都由佢去，呢個運動對身體好，我困住佢喺屋企仲悶，日對夜對又冇嘢講，仲辛苦，所以我哋好自由 o架！」

以柔制剛萬試萬靈

對於阿姐來說，除了年齡影響思想和行為，她近年對人對事的態度，都有很大的轉變，家英哥的出現是重要的一環，家英哥說：「幾好呀！以前都有啲拗撬，家冇，佢個人輕鬆咗，幽默咗，應該係我影響到佢，不過佢好口硬，唔會認。」無錯，阿姐認定自己的改變是因為做了港區人大代表和全國政協委員，她說：「以前我係專注自己嘅演出，做咗人大，接觸群眾，關心社會，甚至國家，好多嘢唔識要主動問人、聯絡，我覺得呢個係一個好大轉變。」
家英哥深明相處之道，對付阿姐，絕對不可以硬碰硬，太極拳以柔制剛，這一招萬試萬靈，家英哥說：「我就等佢自己慢慢感覺，即刻要求佢唔到，要佢自己做完佢就知，唔好 argue，有時旁敲側擊囉！每樣嘢改變係有個過程，我唔會命令佢，我做唔到呢樣嘢，我覺得咁樣係唔 work，咁如果佢真係講極唔聽我咪黑面囉！走咗去，唔睬佢，我嘅底線就係咁，但係我唔會同佢嗌交！」難怪阿姐冇你符，家英哥你係得嘅！
談到阿姐和家英哥將於下月在演藝學院演出的粵劇《德齡與慈禧》，阿姐一口氣買了這劇 10年版權，因為她一直渴望做慈禧太后，還指令要家英哥將話劇改編做粵劇版，家英哥又編又導又演「榮祿」一角，為阿姐勞心又勞力，他說：「咁佢想做咪做囉！咁我又編過兩、三個劇，呢個都係新嘗試，我辛苦，完全冇問題。」

工作嚴謹公私分明

即將第三度公演，大導演家英哥公私分明，如今他對這位慈禧仍然有所保留，他說：「咁佢一路都有改進，每次都有進步，不過佢都係貪靚。」兩度公演阿姐一直不肯現場錄影，家英哥抵死地說：「佢話要做到比較安全先可以錄影，咁樣要做到 70歲喎！」
力臻完美是阿姐的風格，不過靚樣大過天，所以阿姐和家英哥在慈禧的外觀上是有一番角力，阿姐對於家英哥矛頭直指她的慈禧造型太靚，甚少做軟皮蛇的阿姐，突然賴皮說：「咁人靚冇辦法 o架！咁我覺得呢個慈禧係靚得有道理。」
很快阿姐又回過氣，伶牙利齒再反擊說：「佢食好住好，你估係一個賓妹呀！佢應該唔會係太過勞累嗰班，養尊處優，人哋磨面用珍珠粉，食係人參，比起一般人後生有乜嘢出奇！我都 64歲，不過喺戲行嚟講又唔覺得我好老，咁慈禧真人係唔靚，咁唔通叫我加幾條紋，咁好核突喎！」
講到尾，大家都是為了一件事好，所以阿姐和家英哥一定是床頭鬧交床尾和，因為他們深信一個經典的作品，一個出色的演出家，是要經過歷練，阿姐說：「一套成功嘅劇本，真係要做過一百場，就好似仙姐同任姐嘅劇，先至叫做樣板戲，先可以叫做經典，我哋仲有好多進步的空間，家先至係起步。」

汪阿姐威震電視城

阿姐電視台起家， 1967年麗的至今，跟香港人一齊成長，獨當一面，地位崇高，冠以電視城慈禧太后之名，當之無愧，聽到這個比喻，阿姐都忍不住笑，還謙虛地說：「唔係，唔係，電視城我係一個藝員，不過可能一路都係有個威嚴，唔講嘢都知我個樣喇！所以好多人見到我慈禧個樣，望到我都驚驚哋。」

楊門女將汪明荃強悍勇猛，最終都是敵不過太極高手羅家英，一招以柔制剛，令阿姐心服口服。

阿姐跟無數資深男演員合作過，視帝夏雨是其中一個。《居家兵團》劇照

夫婦期待合演劇

家英哥在電視界年資尚淺，至今仍然未有機會跟阿姐合作，原來他一直期待這個機會，見到他手指指不停數阿姐的拍檔，似乎有人醋意大發，他說：「係我從來冇同佢合作過一部電視劇，佢就同好多人合作過，夏雨、劉松仁、石修、郭峰，係冇人要求過，咁我又唔會求 TVB俾我同佢拍。」家英哥此言一出， TVB應該無任歡迎喇！家英哥有機會和阿姐合作，不知想做甚麼角色？他笑說：「搵我做佢上司，鬧佢，好呀！好呀！」

家英哥演粵劇大晒

羅家英出身粵劇世家， 8歲開始學習粵劇，他對粵劇的執着，連阿姐都敬佩萬分，家英哥說：「如果你唔係鍾意粵劇，同我一齊係冇乜味道，我同阿姐講好多粵劇！」 88年家英哥和阿姐組成福陞粵劇團，平日位高權重的阿姐，對住粵劇大老倌羅家英，都要唯命是從，阿姐說：「咁佢係叔父，梗係要尊重佢，咁佢又係《德齡與慈禧》嘅導演，我哋有好多意見，不過最後決定係佢話事。」

家英哥覺得自己跟阿姐臭味相投，共通點是大家都好硬淨，而且做人有節氣，對藝術非常執着。

家英哥在粵劇界享負盛名，近年致力推動粵劇不遺餘力。資料圖片

互相提點求進步

家英哥輩份高，資歷深，對阿姐和粵劇的要求一樣高，他笑說：「佢要求高，我咪要求高啲囉！佢有要求，你冇要求，佢睇你唔起 o架！」家英哥和阿姐對藝術同樣執着，他希望阿姐繼續進步：「佢梗係需要進步，不過佢唔聽我講，聽我講佢會進步得快啲，呢個都係佢性格問題，電視台學嘢方式係快餐店方式，粵劇唔係呢種，係超級市場方式，要入定好多貨，隨時拎出來。」