因為無綫節目《最佳男主角》的出現，令主持兒童節目出身、入行近30年的黎芷珊捱出頭，為她帶來最佳節目主持獎，得到公司和觀眾認同，是她的人生轉捩點。事隔一年，《最佳女主角》挾着餘威登場，但正正因為有第一輯的口碑，令她更添壓力，雖然芷珊在工作上沒太大野心，但她仍然希望keep住好成績，因為有人讚有人認同，是她的工作推動力！
撰文：何慧斯
因為要宣傳無綫節目《最佳女主角》，令黎芷珊由訪問者變成受訪者，訪問一個接一個，雖然與當日《最佳男主角》的宣傳攻勢不遑多讓，但今次好像見證了一個人的成長，再沒有上次那種鋤強扶弱和戥人心酸的心態。對於事業上的轉變，被笑稱「升咗呢」的芷珊說：「唔可以話係成就，但比起以前係好咗，以前都冇自己嘅節目，o依家好好真係開心，不過壓力就大啲。」
■入行近30年的黎芷珊憑《最佳男主角》捱出頭，今次乘勢推出《最佳女主角》，對她來說是有點壓力。
攝影：黃文偉
■黎芷珊坦言知道自己的位置，故不想浪費時間走去拍劇。
■黎芷珊在《最佳女主角》訪問鄭秀文（左），令她盡爆感情生活。
搵女嘉賓遇阻滯
芷珊口中所講的壓力，原來是指這年來的轉變令工作上有利有弊，她說：「第一輯《男主角》人哋從來冇睇過同冇期望，直到睇咗後反應好好，呢次我諗啲人一定會有期望，所以壓力大咗好多，就算唔超越，都想有番咁上下成績。」她坦言請女嘉賓的確有點難，是否因訪問內容太坦白，令嘉賓有所避忌？她笑說：「唔可以咁講，可能係佢哋冇一個理由點解要坐喺度，上次有好多人係幫我一把，甚至覺得你咁慘，撈到o依家都係咁嘅樣，自不然會有個大啲嘅理由，但o依家會覺得你OK咗，變咗冇呢個咁大嘅理由，做乜要幫你呀？反而今次係可以有個say no嘅藉口㖭！」
問芷珊會否覺得慘？她坦言：「我又唔係覺得慘，雖然我唔係大富大貴，但我都唔使問人借錢度日，只係際遇冇人哋咁好。不過我明白人哋會點諗，因為我同佢哋啲年紀差唔多，佢哋個個都上晒神枱，但你仲要喺度跑嚟跑去，覺得你幾辛苦，所以見到你可以有個好啲嘅際遇，點解唔幫呢？」她續說：「其實有好多嘉賓喺pay台（收費電視）都訪問過，我哋pay台個個都好畀心機做，好多節目都唔錯，但呢個可能係平台嘅問題，有時咪係唔公平，今次你問我我會覺得係好彩，運氣佔咗好大部份，成件事做咗出嚟，有人讚有人認同，滿足感係大過之後得到啲乜嘢。」
■梁詠琪不避忌向同是伊健舊愛的芷珊講戀情。
難忘訪問梁詠琪
在幸運之神眷顧下，再加上後天努力，今次《最佳女主角》的嘉賓陣容及集數都比前多，直到目前為止，已經去到35集，芷珊說：「今次我哋唔想局限一定攞過獎嘅人，好似梁詠琪同鄭秀文，佢哋都好獨當一面係女主角，成班同事會坐低傾吓，原來好多人想睇羅蘭姐，所以佢都係我哋嘉賓之一。」她還有感而發說：「集埋啲conclusion，發覺好多女人對感情都覺得係整定，大家不約而同跟眼前呢個人曾經發生過啲嘢，跟住有種覺得就係佢嘅感覺，女人都係感性啲，好容易眼濕濕，所以今次深情好多。」最令大家感興趣的，相信是她與梁詠琪的訪問，這兩個都先後戀上鄭伊健的女人，面對面說戀情，難免會尷尬，誰不知芷珊說：「冇呀，原來我從來冇同佢做過專訪，一直以嚟只係隊咪做訪問，今次係第一次。但初頭都有啲驚會怪，呢個話題一定要講，係喺佢身上發生嘅最大一件事，開頭我仲以為唔會想講，因為我哋開頭會畀定啲問題佢，佢助手話唔係咁想講，點知到訪問嗰日佢又冇嘢，真係講咗。」
■黎芷珊去年奪台慶頒獎禮的最佳節目主持獎，吐氣揚眉。資料圖片
談換主持：冇可能
芷珊從入行至今，主力做主持，甚少拍劇，她說：「做主持度期拍劇係好困難嘅事，呢個唔係我強項，好阿Q精神咁諗，做主持嗰part都係主呀，冇年齡限制，又可以控制到件事。我明知自己乜嘢位，拍劇一定唔係做主角，我就係唔想做人阿媽，年紀咁大，真係唔想嘥時間。」對於這個姍姍來遲的機會，芷珊稱沒灰心過：「o依家有咪盡力做好啲，我一直都唔係有野心嘅人，當一個人冇野心，自然唔會覺得好失望、懷才不遇，最緊要工作環境開心就得，你問我梗係希望可以keep住成績，所以今次係睇個節目反應，緊張大家鍾唔鍾意呢個新形式。」當日曾盛傳有其他藝人頂替她主持《最佳女主角》，芷珊對此笑說：「冇可能係第二個，嗰個人做係會死㗎，啲人會覺得你咁樣都好意思攞佢嘅？所以唔會有人願意冒呢個險。」
服裝提供：Johanna Ho
場地提供：The Grand
愛情空窗期
■現在單身的黎芷珊，表示現在寧願專注事業。
■黎芷珊雖與張達倫分手，但兩人再見亦是朋友。資料圖片
黎芷珊自從與無綫藝人張達倫分手後，感情生活一直未有好消息傳出，未知是否與「升呢」有關？她笑笑口說：「自從舊年到o依家，我未試過有呢件事發生，所以講唔到有乜嘢唔同，唯一嘅唔同咪係冇囉，我o依家同以前冇變，只係事業上嘅轉變，我仲可以行街拮魚蛋！」
問芷珊會否希望將好運轉投少許往感情方面？她說：「唔知呀，啲人話啲桃花去晒工作度，講真係冇時間，一路都做嘢，如果拍拖另一個係一定會投訴，反正又唔急，我覺得OK喇，唔可以樣樣嘢都有晒。」那會否繼續姊弟戀？她笑說：「相士話我條命係整定有啲唔正常嘅桃花，唔會同啲大我一至十年嘅人拍拖，反而係細過我或異地，又唔係啲有婦之夫，冇咪衝吓事業先喇，反正我真係唔趕。」