人妻周家蔚High爆 摸謝天華腹肌
7月1日係無綫高層樂易玲54歲生日，一眾無綫藝人及其他賓客，噚晚提早為樂小姐賀壽，出席藝人星光熠熠，包括視后佘詩曼﹑胡杏兒、陳百祥同黃杏秀、黃宗澤、謝天華、吳卓羲同女友傅嘉莉(女方已經喺專訪中認咗「發展中」)、朱璇、湯盈盈、王祖藍同女友李亞男、洪天明同老婆周家蔚、梁烈唯、丁子高、苟芸慧、王君馨等等，星光之多足以媲美台慶，更完勝早前嘅大晒冷影合影啦！
噚晚大家都玩得好高興，起初周家蔚同謝天華合照時，家蔚唔知因乜事笑到彎腰；影大合照時，周家蔚同洪天明分開企，家蔚就企喺謝天華同沈震軒中間，家蔚鬧着玩一時摸天華腹部，一時又翹住沈震軒隻手，疑似抽水。老公洪天明就唔敢亂嚟，最多都只係搭住苟芸慧及周志康膊頭。
至於唯唯亦好亢奮，唔知係咪飲大咗兩杯，佢搭住王敏慧膊頭，好似幾好傾啵。同樣有份出席嘅黃柏高（Paco），離去時要由唯唯及另一男子攙扶離開，相信Paco都應該飲咗唔少喇！
周家蔚因乜事咁High，仲要摸住謝天華個腹呢？
黃柏高離去時要由唯唯（右）及另一男子扶住。
其實唯唯（左二）都好high啵，搭住王敏慧（左一）膊頭。
周家蔚（左）開心到彎腰，構圖有趣。
大合照時，周家蔚又翹住沈震軒隻手。
洪天明（右）同老婆周家蔚分開企。
左起：周家蔚﹑湯盈盈﹑佘詩曼及梁靖琪，以四美姿態賀樂易玲生日。
愛將林峯冇影 吳卓羲「女友」喪谷胸
吳卓羲同傅嘉莉先後到場，傅嘉莉仲谷胸兼露背。
無綫製作資源部總監樂易玲，噚晚喺中環包場提早慶祝生日，近百藝人到賀，群星雲集，當中王祖藍同女友李亞男﹑張堅庭夫婦﹑苗僑偉同戚美珍夫婦﹑洪天明及周家蔚夫婦等等，一雙一對拍拖到賀。就連離巢嘅佘詩曼，與及喺清遠拍劇都趕返嚟嘅胡杏兒都有出席，甚至老闆陳國強亦係座上客，場面熱鬧，但樂小姐愛將林峯就冇影，不過林峯堂妹林夏薇就有到場。
無綫小生吳卓羲同「另一半」傅嘉莉亦前後腳到場，傅嘉莉仲搏到盡，着住白色上衣喪谷胸露三吋事業線，兼露出大玉背賀壽，認真識做，唔知吳卓羲高唔高興呢？至於人妻呂慧儀身穿性感透視裝同老公黃文迪出席，不過黃文迪似乎發福唔少喎。
林夏薇（左）同敖嘉年
丁子高似乎帶咗生日禮物嚟喎﹗
王君馨
李璧琦
陳國強都有出席
傅嘉莉的玉背，係咪好搏先？
呂慧儀同老公黃文迪拍拖賀壽。
李亞男及朱璇BB
全黑苟芸彗，不過仍然「圓」美。
香香公主岑麗香
田蕊妮都幾Sexy喎﹗
李詩韻
佘詩曼與同事聚舊 杏兒遇「翻版黃宗澤」
兩位視后佘詩曼及胡杏兒，噚晚都有出席樂易玲生日派對，杏兒舊愛黃宗澤冇嚟，但「翻版黃宗澤」就喺現場喎，唔知杏兒有冇認錯呢？杏兒話最近喺清遠拍劇，專誠趕返港賀壽，認真有心。
至於已離開無綫嘅佘詩曼，就同好姊妹周家蔚﹑湯盈盈及梁靖琪到場，阿佘話今次係同舊同事聚舊，佢話：「拍完劇0依家留喺香港休息，閒時拍內地廣告，內地好熱，所以唔拍劇住。」
胡杏兒同「翻版黃宗澤」同場，唔知杏兒會唔會認錯呢？
杏兒由清遠趕返港同樂小姐賀壽，認真有心。
周家蔚﹑佘詩曼﹑梁靖琪同湯盈盈結伴到賀。
各具美態﹗
陳百祥同黃杏秀以及徐少強到場。
梁靖琪及苗僑偉
沈大師沈卓盈
馬德鐘單拖赴會 否認老婆同樂易玲不和
除咗胡杏兒同佘詩曼出席樂易玲生日派對外，同無綫快將約滿嘅謝天華，以及同無綫轉部頭合約嘅馬德鐘都有出席，猶記得馬德鐘太太張筱蘭曾同樂小姐鬧不和，張筱蘭仲係網上開火鬧爆樂易玲，咁啱張筱蘭噚晚真係冇到，只係見馬德鐘出現，樂小姐受訪時就話：「馬德鐘鐵腳嚟啦，我同佢太太冇嘢呀。」
而馬德鐘對老婆同樂小姐不和傳聞，佢認為係舊聞一則，佢笑言：「咁耐嘅嘢唔講喇，0依家拍緊《飛虎II》，如果有好劇本，每年幫無綫拍5部都得。」哇﹗有冇咁誇呀？話時話，噚晚出席賓客仲有陳嘉桓，唔知佢兩個有冇打招呼呢？
另外，樂小姐喺酒吧門外受訪，佢話生日正日要陪囝囝上暑假班，所以要預早慶祝：「7月1日先係正日，每年都會同班同事慶祝吓，當慰勞佢哋。我叫佢哋唔好買禮物。」
馬德鐘否認太太同樂易玲鬧不和。
樂易玲叫同事唔使買生日禮物。
