現年26歲的蒙面歌手龍小菌涉盜竊被捕，前日她獨自到鰂魚涌超市購物後，疑未有支付總值約120港元的蔬菜及生果錢便離去，即時被保安截停報警處理，聲稱因感冒病到「吽吓吽吓」的小菌，昨解釋在事件上純粹疏忽，但認錯說：「但疏忽都係唔啱！」她不擔心此事影響前途，因為自己還在讀書，她會完成學位，繼續唱歌作詞。

前日傍晚6時許，龍小菌在鰂魚涌AEON百貨公司超市購物時，將價值約120港元的蔬菜及生果放入環保袋內，懷疑未有付款離開，被保安截停報警處理，將小菌帶往柴灣警署調查。至昨凌晨1時許，獲准保釋的小菌終於離開警署，現保釋候查，下月要返警署報到。

龍小菌前日傍晚6時許，在超市涉盜竊被捕，被帶返柴灣警署調查，昨凌晨1時許保釋離去，下月再返警署報到。2011年，龍小菌以網絡歌手身份出道，並蒙面在街頭獻唱，後被揭是位中學老師。

素顏戴帽的小菌在警署門外接受訪問，她表示近日因感冒「吽吓吽吓」，前日下午打完泰拳後，再去幫母親修理電話，之後往超市買餸，先買了鹵水付款後，因鹵水要加熱，她又往買蔬菜及番茄等，之後將所有食物放入手推車，直接推去出口，她說：「將啲嘢擺入環保袋出咗門口，俾便衣保安截住話有啲嘢未畀錢，佢冇聽我解釋直接帶我去保安室，喺超級市場唔記得畀錢真係第一次。」離開警署後，小菌由一輛四驅車接載，兜勻港九新界欲撇傳媒追訪，約兩個多小時，駛至牛頭角道由一名男親友陪同，轉乘「寶馬」離開成功撇甩記者。

昨午小菌戴口罩往睇中醫，她透過WhatsApp錄音說：「今日收到好多朋友關心，問我需唔需要幫手。因為噚日喺警察局搞咗好耐，大概六七個鐘，好攰，同埋差館比較凍，今日去咗睇醫生，醫生話我患咗流行性感冒。多謝好多朋友都好相信我，喺呢件事上係純粹疏忽，但疏忽都係唔啱，自己以後會小心啲。」問家人擔心她嗎？小菌說：「家人當然好擔心，始終屋企都冇發生過咁嘅事，所以我都唔係好識處理，我哋都係要搵適合嘅人去幫手。」問事件對工作有否影響？她說：「我心態上就冇好大嘅影響，始終我仲讀緊書，我想繼續讀書，完成埋個碩士學位，繼續唱歌寫詞。」

小菌因涉盜竊被捕，昨凌晨獲釋返家後，問有否失眠？她說：「返到屋企之後都好攰好夜，所以都瞓得着，但就唔係好安穩。經歷咗成晚，搞咗好耐，瞓瞓吓又咳醒。希望事件可以盡快雨過天青。」今晚小菌會現身文化中心捧經理人邵子風有份演出的舞台劇《現代馴悍記》。

至於事件警方怎處理？邵子風說：「等下次返警署報到，先知往後係點樣。」前晚他在警署外受訪時，曾說「買嘢唔記得畀錢人之常情」，被網民狠批教壞小孩，他說：「其實但凡唔記得都係一種錯誤，錯咗就要知錯，唔好再冇記性。」

昨記者向梁永鏗律師查詢盜竊罪成的判刑，他在電話說：「最高刑罰十年監禁，但通常唔會，喺舖頭偷嘢可能罰錢，如果佢話唔記得畀錢，睇吓乜嘢原因，控方信佢可能撤銷控罪。如果唔認罪可能短期監禁一兩星期，認罪求情就罰錢幾千元。」

秋生批超市冇人情味

黃秋生在facebook評論龍小菌事件。他寫道﹕「睇下龍小菌去邊間超市買嘢先，咁冇人情味，保安又咁死板××，千祈記住咪×去。（我提醒自己啫）」有網民認為黃秋生的言論不公道，反駁說﹕「偷嘢仲要人情味，去打劫看看有無人情味先……」又有斥「黃秋生言論本末倒置！盲撐！」龍小菌經理人邵子風感謝黃秋生，他稱多謝對方仗義執言。他重申龍小菌是身體不適病懵了而出事，她犯錯是不對的，要負責任。她沒有做過，是很小事，今晚她會到文化中心捧邵子風演出的舞台劇場。

林子祥偷墨鏡留案底

龍小菌前日涉於超市內盜竊被捕，過去亦曾有藝人因盜竊罪成兼留有案底。

99年林子祥偷墨鏡
於夏威夷獨自逛免稅店時，心不在焉將一副600多港元太陽眼鏡拿走，當場被捕。上庭時，林子祥認罪，被判罰款75美元（約600港元）及留案底。

08年曾敏偷雜誌
於銅鑼灣中央圖書館偷取一本英文雜誌《Dolly》，被裁定偷竊罪成立，罰款1,000港元。

99年陳小韻偷內褲
在銅鑼灣時代廣場馬莎百貨內，偷了八條共逾700元的內褲，被百貨公司保安人贓並獲，被判罪成罰款3,000元及留有案底。

01年雲露娜偷衣物
雲露娜維達（Winona Ryder）在比華利山一百貨公司，偷去總值4,760美元（約37,000港元）衣物，判緩刑三年及履行480小時社會服務令。