龍小菌真身現形？係咪真o架？係呀，係真o架。

今日下午近6點左右，現真身、冇戴口罩亦冇戴帽嘅蒙面女歌手龍小菌，同經理人兼疑似男友邵子風及一女性友人，一行三人喺圓方現身，正準備走人。因為圓方多狗仔隊「潛伏」，故邵子風亦相當警覺，不時左望右望，睇吓有冇記者喺附近。

之後三人去攞車，兩女坐後座，邵子風負責揸車。此時記者現身，邵子風即刻擋鏡頭，反應極大，急道﹕「影乜嘢!你哋做乜嘢!」呢個時候，坐喺後座嘅龍小菌，已經拿拿聲伏低，攞出隨身準備嘅口罩遮面。

過咗一陣，龍小菌終於冷靜番，同記者講﹕「你哋頭先都影到啦，算啦，唔好影喇。」又要求記者唔好再跟隨，之後即開車離去。

其實龍小菌真面目真係幾靚女，樣子清秀，只可惜要長期遮面，難怪面色都好似特別白。既然依家「真相」已經曝光，不如索性用呢個look示人啦。

今日黃昏時份，龍小菌同經理人男友邵子風現身圓方。

兩人正準備離開。邵子風係咁篤手機。

同行仲有一名女性友人（左一）

停一停，講一講電話。

上車前，記者上前拍照，邵子風慌忙彈出。

龍小菌馬上垂頭，準備戴番口罩。

話咁快已戴咗。

邵子風著記者唔再跟，仲話﹕「你哋頭先都影到啦。」

龍小菌一直不發一言。

準備開車離開。

開車前，龍小菌故意擰轉面避鏡頭。

出道時的龍小菌。

龍小菌包到實 搞到肺花咗

網路歌手出身、由出道開始一直保持冇見人嘅龍小菌，噚晚(15號)同經理人兼緋聞男友邵子風同遊圓方，龍小菌更除罩除帽，真面目示人，令人眼前一亮。雖然之前真身已曾曝光，但龍小菌一直極力否認，依家，唔使再避喇。

龍小菌之前個look，俾網民笑好似「紙紮公仔」咁，大熱天時都由頭包到落腳，仲要落旺角行人專用區唱歌，唔熱就有鬼。當時佢係因為要保住教師正職，所以要蒙面唱歌，就連飲水都要喺「面罩」上篤個窿，整條管入去飲水，認真誇張。

由街頭賣唱到去年正式跳入樂壇、辭去教職，因為長期蒙住面，唔單止焗到面部爆瘡，至去年底發現肺部出事。去年底，龍小菌於facebook貼咗一張肺部X光片，並留言：「肺花了，要再照一次！」為免有性命之虞，龍小菌即改咗個look，唔再包到冚，叫做舒服咗少少。

龍小菌唱歌好聽，而且講明賣歌唔賣樣，以實力取勝，但亦有人覺得呢個gimmick玩得太耐，嗌佢「除罩」之聲不絕；亦有愛護龍小菌嘅歌迷擔心偶像健康，紛紛勸佢「除罩」。事實上，龍小菌去年同經理人一齊加盟吳君如胞弟吳君祥嘅新唱片公司，本以為泊到好碼頭，惜早前傳出小菌嘅經理人兼緋聞男友邵子風同吳君祥意見不合，最後更離職，搞到依家歌唱事業兩頭唔到岸，人氣急跌。

龍小菌曾言考慮喺「適當時候」掀開面罩回復真我。家陣真面目曝光，唔使再等「適當時候」了吧。