古惑佬《消失的光陰》MV首播 陳小春童子尿顏射鄭伊健

鄭伊健、陳小春、錢嘉樂、謝天華同林曉峰(阿Lo)一班「古惑佬」今日喺灣仔為11月嘅演唱會主題曲《消失的光陰》舉行MV首播會。伊健因為拍電影《忠烈楊家將》同吳尊熟咗,佢表示今日睇到報道先知對方已婚仲有個女,伊健話:「佢解釋得幾好,保護屋企人,其實之前有諗過去汶萊玩同埋探佢。」

此外,為慶祝阿Lo上月28日同伊健後日生日,現場特別進行切生日蛋糕儀式,活動尾聲時,小春突然拎住一枝黃色液體淋落伊健身到,嘉樂笑住話係小春囝囝嘅童子尿,叫伊健快啲生BB。

問伊健有冇嬲先﹖佢笑住話:「玩下啫,不過呢個仇我會報。」生番個出來報仇﹖伊健笑住講唔會,然後又即刻轉話題,反問記者有冇留意生日蛋糕冇蠟燭,佢話:「有次同阿Lo一齊慶祝,點知我吹熄咗佢支蠟燭,跟住嗰年佢就結婚生仔。」阿Lo即話:「今年到我吹熄佢支蠟燭,佢嬲到將枝85年香檳倒瀉咗,仲嬲到話唔排舞。」


大會送蛋糕畀阿Lo同伊健,但係上面冇蠟燭喎,點解呢?

原來佢地兩個有同蠟燭有關嘅恩怨情仇。

小春手上果支就係佢口中所講嘅「童子尿」。

至於係唔係真係尿,真係小春先知喇。