唔介意靠老婆得機會 張繼聰拍劇拍出自信

無綫因小生不足,歌手張繼聰(Louis)亦被羅致簽下兩年藝員合約,頭炮新劇《老表,你好嘢!》叫好叫座,之後還有重頭劇《巨輪》,機會陸續有來。被指撈唔掂歌手要轉型?Louis矢口否認:「唱歌唔係搵食嘅主要工作,要搵食當初就唔讀演藝!」他又坦承,如果靠老婆謝安琪令自己得到更多工作都係好事,至少可以踏出第一步,但自信最後都係要靠自己。

採訪:方騫平 化妝:Pinky Ku

髮型:Jobby@SalonOsmosis 服裝:initial

張繼聰獲港台《十大中文金曲》頒獎禮頒發「全年最佳進步獎」銅獎,信心返晒嚟,他堅定說:「我知道自己喺咩位置,對音樂、演出有信心,做藝人係要有適當嘅自信,咁先可以從容面對工作,所以與其話靠老婆得到機會,不如話係佢哋唔理解我,而且老婆可以幫得我有幾唔好?咁都係一個開始,最後都係要靠我自己嘅能力,一套劇集收視好唔好,係要睇演員做得好唔好,劇本得唔得。」

繼續出碟

他又否認做歌手搵唔到食,要「降呢」轉型:「我唔覺得做歌手尊貴過演員,眼睇演員登台機會比歌星多,我覺得一個人嘅心態好重要,每個人點睇每個人有佢嘅自由,下下咁着緊就會有好多包袱,正如籃球之神嘅Michael Jordan都被網民討論得唔得時,咁我都釋懷啦,今年我會出國語碟同跳舞碟,唔會放棄唱歌。」

張繼聰拍劇拍出自信
張繼聰唔介意被指靠老婆得機會,最緊肯努力,深信用佢的人會覺得佢物超所值。