上帝很蠱惑，揮指播弄我們人生，以古天樂為例，生得靚仔又有錢，可惜本性愛孤獨，到頭來四十幾歲人一支公，夠浪費吧！古仔昂藏六呎四肢發達，卻被整定天生腦部缺氧，曾遊走生死關卡：「我有病，腦有瘀血，醫番好都會失憶！」失憶也有好處，起碼被問到感情問題，大可聳聳肩説：「唔記得，唔回應！」既然真的有上帝之手整定一切，又何須事事錙銖必較，何況終生大事？原來能盡孝道為雙親報劬勞便已足夠，古仔，其實是一位幸運兒。

出世缺氧 一度失明

古天樂從不信命，只知能擺布自己人生的就只有自己，可是冥冥中自有上帝主宰，給你好處，又褫奪你某些東西。有一個秘密，古仔從未公開，當大家以為他是失憶界刂女王，原來失憶是因為有病：「其實我出世唔係順產，喺胎裏面已經缺氧，所以腦裏面有瘀血，到十幾歲先發現呢個問題，有時坐喺度唔知點解冇啦啦定咗格，甚至有五至六秒會睇唔到嘢，個畫面光晒，乜都睇唔到！細個唔知呢個係病，大個先知有問題，睇醫生話我個腦缺氧，加上中學時撞過車，畀架車撞到飛起，個腦有瘀血，兩樣嘢加埋就令我睇唔到嘢！經長期食藥後，依家好番晒，真係託賴。」

是福不是禍，是禍躲不過，雨過天青後原來問題仍未解決，就是無故失憶，開心不開心的，也容易瞬間流失：「呢個病唔係後天造成，係先天嘅，只要克服到唔係一個大問題。唔知係咪咁，令我患上失憶症，醫生都唔知點解！譬如我同阿Sa(蔡卓妍）拍《鎗王之王》，我話同佢拍咗兩、三部戲，佢就話：『乜嘢呀？我哋合作過九部！』佢仲逐一數番出嚟，係喎！真係九部！有時就係會失憶，你問我有冇情緒問題？好就好在我會Delete—啲嘢，擺喺腦裏面幾年就會Delete，好處係演戲唔會令自己有太大壓力，反而覺得係上天畀我嘅禮物。」這半杯水的道理，儘管半滿已夠心足，古仔似乎了然於胸。

可是作為長子，要老土地為古家繼後香燈，42歲的古仔連半滴水都冇，遑論是結婚？哈！他反過來指喜歡孤獨：「孤獨？都慣啦！反而最重要係休息，孤獨對我嚟講唔係問題，好多事係須要自己去面對，只係有啲人諗埋一邊話自己孤獨，有啲人好想有人陪傾偈先至有安全感，我就不嬲唔使傾，由細到大都好少嘢，有問題都係自己解決。」

習慣孤獨拍拖衰硬

有些人，天生就不喜歡被管，寧願做隻無腳雀仔，是否説穿古仔心聲？但他繼續死口唔認：「唔係！由細到大畀人管慣，冇話過唔鍾意畀人管，自己應該有自己生活態度，最緊要聽同肯聽，唔好啱聽就聽，唔啱聽就唔聽，咁係錯嘅，乜都要聽，聽完自己消化。」

可能，古仔細細個就鍾意睇港產漫畫《中華英雄》，做天煞孤星，拍拖這碼子事，對24小時都不夠用的他來説，簡直九牛一毛，平日寡言的古仔，竟拋出黎明式金句：「乜都要時間去經營，冇時間情況下，再重要、再重要嘅情況下都產生唔出嘢出嚟，係，愛情係重要，但須要時間去經營，不如專心做好一件事先，嚟緊我要連拍四部戲，就算依家經營到，最後都慘淡收場。」

父母恩情 無以為報

對，雖然很多事好整定，但不信命的人喜歡博弈，回顧古仔人生頭廿年，略帶江湖味風雨親搖，可是自選擇入行後就順風順水，一直當男主角。然而，帶他來這世界坐過山車的父母卻是冇得選擇，所以古仔鐵定去愛他們。

「我冇乜嘢可以畀到佢哋（父母），佢哋畀我嘅嘢就多，依家我更加珍惜相聚時間。佢哋年紀大咗，會盡量滿足，依家嘅感覺係我阿爸變咗細路，可能係佢中風後好多嘢都唔記得；阿媽就似百厭星，成日唔喺屋企，成日問佢點解朝早出去，夜晚又出去，有冇搞錯！」

尤其是古媽，花光一生青春在古仔與他弟弟身上，英語世界常説「Give & Take」，古仔「Take」到的，這一生無以為報：「阿爸真係畀咗好多嘢我，佢一畢業冇耐就結婚，然後就生咗我同細佬，其實佢都唔係好知呢個世界發生乜事！換句話説，佢一生就係對住我同我細佬。喺佢角度嚟睇起碼有自己家庭，已經令佢好開心，依家至少佢想學乜、做乜都做到，但佢依家最鍾意嘅嘢，我就係最唔鍾意，就係學大戲！你知啦，大佬呀，我返到屋企已經好攰，返到嚟鍊喉咁嘅聲，唱到呱呱叫，我就同佢講細聲啲得唔得呀？我要一早起身o架！我覺得呢啲點滴幾好笑。仲有我阿爸依家做埋時裝界猛人，日日好似Fashion TV咁，其實佢都唔知自己着乜衫，只係覺得好得意，突然變咗時裝逹人，你話頂唔頂癮？」

做住家男人陪兩老

待在家中可能受盡「折磨」，那又何干，能看到兩老返老還童，反而更甜蜜。為何古仔絕迹夜場？他亦沒有假大空，在家千日好：「唔出埠就一定喺屋企，所以有啲朋友未必有我手提冧巴，但一定有我屋企電話，因為佢哋知我唔開工就喺屋企，喺屋企食吓飯咪仲好，同佢哋傾吓偈。」

更重要的是父母身教，自小灌輸做人要知慳識儉：「兩老仲有教識我一樣嘢，就係慳家！要有衣食，食飯就唔好食剩。有時打包返屋企，擺雪櫃兩日冇變都會食，我知道做人唔可以亂揮霍，呢樣係爸媽一直由細教到我大。」但講到會否把這美德薪火相傅，古仔繼續推莊，暗示暫時結婚冇打算：「冇諗過！譬如我朋友生咗個仔，我試過叫佢契我，等我教佢哋，朋友猛話唔好，可能佢哋覺得我平日時間唔穩定，點教細路呀？」

戲屎開竅 全靠體驗

從事業來看，老實説，古仔一直受幸運之神的眷顧，是男主角不二之選，可是千篇一律的面部表情，用來用去的演戲方式，惹來不少詬病。有一類演員演極都是「戲屎」，幸運地，他好快開竅：「我覺得演每部戲都有不同表達方法，冇一個標準話好定唔好，係講自己點應付同運用出嚟，又或者用一個創新方法去演。有人講演戲係體驗人生，人生經驗豐富咗，演戲嘅材料就愈多。有啲人會接少啲戲，令自己有時間去不同地方體驗生活上唔同事物，令自己可以沉澱放入戲中，另一方面係拍多啲戲，令自己攞到不同體驗，接觸唔同角色，對演技增長係幾好，而我就係後者，我會揀接多啲戲！」

古仔突然變成好戲之人，是否靈光一閃的開竅，他也沒有肯定的答案：「點為之靈光一閃？開竅？係冇定義！有啲演員會話演某一個角色好特別，突然茅塞頓開，但每個人開竅嘅時間有長短，我覺得開竅唔係重點，最緊要係明白自己做乜。我唔係拍開一某類型嘅戲，喜劇、動作到文藝都有，每部戲都有唔同嘅分水嶺，文藝片最滿意可能係第一部嘅《甜言蜜語》，因為成套戲都冇對白，動作戲可能係《柔道龍虎榜》，因為所有動作親身上陣，冇花冇假。」

挑戰影帝時也命也

的確，刻下古仔逐漸衝破演技的幽冥地帶，能駕馭的角色自然多。然而，能力愈大責任愈大，到底有甚麽戲種，古仔還想挑戰？他説：「接戲要搞清自己出發點，係因為片酬定自己鍾意！我覺得由《無間道》到《寒戰》，都係香港手到拿來嘅警匪片，要拍到唔同感覺先係挑戰，你話做一啲特別角色，係好大挑戰，但係有幾多觀眾接受？好似一啲特殊病例或特殊職業，可能係拍太空人好新鮮，但係觀眾會唔會信呢？所以我覺得最大挑戰係還原基本步，做成日做開，但做到唔同感覺先最難，最簡單先係最難！」

可惜，影帝總是與古仔擦身而過，但他卻不以為然：「攞獎就等於問我目標係咪中六合彩一樣，依個唔係我可以控制嘅事，唔會特別去諗，盡力去做套戲就已經完成使命。其實每部戲都有自己嘅生命、走向，要配合天時地利人和，有時嗰屆有好多好戲之人提名，咁真係爭崩頭，有時嗰屆冇乜對手，你又有好戲上，唔想攞都唔得啦！我覺得做嘢係要令自己開心。」

有人話賺的錢不是你，使的錢才是你的，有傳一年搵一億的古仔絕對認同，錢向來都是數字遊戲：「錢用嗰時就存在，唔用嗰時就唔存在！唔係叫你一嘢用鬼晒，但要搞清楚錢對自己嚟講係乜嘢，唔係多就有用，最緊要係知道點去用。我唔多時間去使錢，最多應該係食，買衫就因工作先買，平時着來着去都嗰幾款，我又唔買車，又唔好買樓，都係自住嘅！」沒錯，這就是古仔Style，任命運如何播弄，女人多、錢多，又如何？

後記：Everything Under Control

訪問當日，古仔，回港幾天，日日忙到不似人形，連飯連冇得食，做完訪問還要趕機飛泰國開工，多麼陰功！當晚我們約了在中菜廳傾偈，古仔早已預滋補花膠湯、片皮鴨三食、膶腸瓦煲煲仔飯等美食，我説：「你餓，食完先傾！」古仔説：「傾咗先，做完安心食！」看見侍應端上瓦煲飯，古仔沒有廢話落柯打：「侷多兩條膶腸，要熱！」、「好，繼續傾！」這就是古仔Style，命運，信咪有囉！