王祖藍主演的真人版《情人眼裏高一 D》，女主角是李亞男。亞男高祖藍 6吋，長短腳之戀曝光頓成熱話，但她眼裏又出西施，大讚祖藍風趣、孝順、有愛心，易服夠索，真身夠 man，雌雄同體都勁掂。男友百樣好，難怪亞男愛得癡心，希望 35歲前「登、登、登、登」入教堂。　撰文：王崇穎

身為 2005年國際華裔小姐冠軍的李亞男，身高 5呎 9吋，來自加拿大的她大學畢業，有姿色有學歷，雖然她入行後在工作上未有太大突破，但早前與王祖藍公開長短腳之戀卻大受注目。雖讓不少人跌爛眼鏡，但愛情無界限，她眼中的祖藍樣樣好，兩人拍拖又開心，夫復何求。
剛度過 26歲生日的亞男，和 30歲的祖藍秘戀年半，至近日才公開情侶關係，亞男還大讚男友靚仔又心地好，所以每次提起他總笑不停，那管旁人「 O嘴」，亞男日前在將軍澳接受訪問時說：「其實我哋真係好夾，喺性格方面都 OK，加上我哋有共同信仰，大家只係喺外形方面有少少驚訝啫。」

李亞男樣靚身材正，但她揀男友重視內在美多過外在美。　攝影：林德雄

李亞男大讚男友王祖藍有愛心，更盼望在 35歲前與他拉埋天窗。

王祖藍和李亞男的長短腳之戀，一度成為全城熱話。　資料圖片

男友優點數不完

亞男直言當初選擇祖藍的時候，已有心理準備面對高度問題，她笑說：「一早已經預咗俾人咁樣寫，我只係覺得人哋唔了解我哋，以後大家多啲了解我哋就會明白。」
揀男友，亞男會欣賞對方的內在多於外在，她說：「外形會隨年紀而改變，反而內在就比較永恒，我相信佢係鍾意我內在多過外在。」原來今次是她第二次拍拖，對上一次已是入行前於加拿大讀大學的時候，至於祖藍有何吸引之處，她就滔滔不絕：「我哋有共同信仰，佢係一個好有愛心，好孝順同對身邊每一個人都好好嘅人，而且佢好風趣，會得我好開心，有時工作好攰嘅時候，互相對方開心係好重要，但係其實平時私底下係我佢開心。」
亞男揚言除了常帶歡樂給男友外，相處期間也令他學懂如何去愛，她說：「佢都話識咗我之後，令佢識得乜嘢叫愛，雖然大家仲係學習中，不過大家喺呢方面可以互勵互勉。」

「想 35歲前結婚」

現時不必隱藏戀事，亞男承認很開心，感情上的點滴也可以好好分享，她說：「家最開心係唔使偷偷摸摸，大家可以公開咁一齊出去食餐飯，始終大家都好忙，所以都會好珍惜。」
亞男和祖藍拍拖年半，彼此也算互相了解，至於是否已認定祖藍為結婚對象時，亞男不諱言說：「大家都希望有好嘅將來，不過家唔會去諗呢樣嘢住，都係專注工作先，目前真係先叫有啲空間畀大家去拍拖，咁始終都會有個盼望，都會想喺 35歲之前結婚。」
服裝提供： club monaco

怕男友反串太索

王祖藍扮女人雖幾可亂真，不過無論如何不及 05年華姐冠軍李亞男（右圖）索。資料圖片

祖藍在《荃加福祿壽》的演出十分成功，當中更以反串女人令人拍爛手掌，但祖藍曾指女友抱怨他經常扮女人，亞男則謂很明白男友的工作性質，只是每當見祖藍扮女人出色時會令她有點不快，她打趣說：「我絕對由得佢做自己喜歡做嘅工作，不過我有時會好羨慕，如果佢只係我妹妹我 OK，但如果我男朋友扮女人仲索過我嘅話，就唔係太好，所以我都叫佢食肥啲，可唔可以唔好咁索？不過佢食極都唔肥。」

絕無易服癖

王祖藍扮女人雖幾可亂真，不過無論如何不及 05年華姐冠軍李亞男（圖）索。　資料圖片

問到亞男曾否懷疑祖藍有易服癖，她說：「完全唔會，佢都係為咗節目同劇情需要，佢平時好少刻意打扮，完全一啲女人感覺都冇，佢好簡單，佢連扮靚都唔會。」