百年修得同船渡，千年修得共枕眠。緣分是上天注定，曾幾何時，胡杏兒與黃宗澤這對公仔箱金童玉女，被認定打風打唔甩，2011年杏兒封視后時更發表冧爆「互頂」宣言，不料最終敵不過七年之癢，分手收場。表面看似甜蜜，原來背負不少枷鎖，七年來未曾公開拖過一次手出街，更遑論於人前溫馨！漸從情傷康復的她，近日坦承有追求者，更鐵定日後會把感情事公開，即使於街頭Kiss也冇有怕！

前車可鑑，杏兒斷言下不為例，對「新戀情」亦有要求：「一定要拖手行街，要公諸於世，第時大家唔好介意我太開放，就算當眾Kiss都唔理，一於做自己鍾意做嘅事。」由於個性獨立，容易惹來強勢感覺，杏兒笑言亦有意稍後轉換一下當小鳥依人滋味，又認為生兒育女才能美滿人生，不過當下是要找到一個合適對象。

娛樂圈、是非圈，花旦之爭良性定惡性？則取決於當事人。楊怡、徐子珊、陳法拉、鍾嘉欣等同Grade花旦，杏兒認為各有特色，但性格開朗的她偏偏與文靜的嘉欣最啱Key：「《耀舞長安》係第一次合作，嘉欣好純，有次佢打電話畀我話覺得Confuse，我有畀意見佢。工作上，嘉欣似小妹妹，阿怡算係同我一個Level一齊起，拍《再生緣》時同一間房。（講心底話？）會，大家有Keep住，佢有咩事都會Send短訊撐，識於微時就一切在心中，同子珊冇合作過，大家風格唔同。」雖然不會與花旦談太深入的話題，但杏兒說：「咁唔代表不和，成日傳我爭戲份，如果（傳聞）太過分會講，之前同法拉都有講番，我想大家開心，唔想冷戰。」