呂慧儀港女上身放到盡

呂慧儀有新挑戰，在處境劇中扮演性感小秘書，性格、行徑鮮明，充滿「港女」氣質，為演好角色，她更花了不少時間上網學做「港女」。

呂慧儀奉旨騷招牌長腿。

呂慧儀在處境劇《女王辦公室》中演秘書仔「初敏」，是典型港女，起初慧儀也擔心角色討人厭，但想通後反而覺得發揮空間很大，她說：「事前花咗唔少時間上網搵資料，只要打『港女』呢兩個字，就有好多『港女』嘅特質彈出嚟，不外乎貪錢、貪名牌、鍾意使男友、嗲聲嗲氣、拜金等等，自己消化咗呢啲資料後，再加埋觀察自己啲『港女』朋友，戲裏面又會成日講一句口頭禪『我唔搭巴士！』又不時補粉、照鏡，希望啲細節位更神似。」

約會男友免接送

呂慧儀被問到可覺得自己似「港女」﹖她笑說：「喺爹哋、媽咪面前就有時會刁蠻啲，反而對男朋友就唔會有，以前都唔會要求男朋友送禮物，大家因為住得遠，連返屋企都唔使佢送添。」

《女王辦公室》是呂慧儀與汪明荃的首次合作，問她可有得到阿姐的「指導」？呂慧儀說：「合作得好開心喎，阿姐係對自己要求高，其實佢好肯教人，係個好好嘅前輩。」

呂慧儀在新劇中扮演貪錢「港女」。

呂慧儀事前花了不少時間上網搜尋「港女」資料。

攝影：李柏儒　場地：Island Seafood & Oyster Bar

服裝：Max & Co　化妝：Emily Ng　髮型：Steve Shek@HAiR

陳爽終極目標擸視后

華姐出身的陳爽獲無綫力捧，影視雙線發展，但原來初入行時她曾受父母阻攔，幾經游說才能在香港置業展開新生活。而她揚言要以視后佘詩曼為奮鬥目標！

陳爽游說父母讓她入娛樂圈，她慶幸現在得到父母支持。

近年華姐崛起，陳爽是其中一位被無綫力捧的新星，早前她在《女王辦公室》的索爆師奶形象引死不少宅男，但阿爽坦言起初對角色有點抗拒：「始終自己仲後生，要我演師奶好似有啲怪，好彩觀眾都接受。」她表示最開心可以從前輩身上學習，她說：「杜汶澤好有演員天分，設計好多搞笑對白，氹到大家好開心。」

早前陳爽亦有份參與新片《翡翠明珠》演出，她自言是一次珍貴的演出經驗：「原來拍劇同拍電影好唔同，拍電影時試過等足七個鐘，但只係拍半個鐘就收工，而電視劇就比較趕。」

陳爽被無綫力捧，有機會影視雙線發展。

努力搵錢供樓

除演戲外，陳爽亦有做主持工作，她直言當初為加入娛樂圈亦要放棄很多事，她說：「我嘅經濟學系學位仲差一年先畢業，屋企人最初都唔想我加入娛樂圈，但我係獨女，屋企人最終畀我說服咗，仲好支持我，早前佢哋畀首期我買咗間屋，令我好感動。」早前被指是慳妹，陳爽直言要努力搵錢供樓，她說：「之前新年媽咪嚟咗香港，佢專登派咗十封利是畀我，其實都係擔心我唔夠錢使。」

明白成功不易

得到家人的支持，陳爽坦言要在娛樂圈成功不容易，但仍會以視后佘詩曼為奮鬥目標，她解釋：「我係07年華裔小姐，當年係阿佘同郭晉安嚟多倫多做評判，當時已覺得阿佘好靚，我就好似小fans見偶像，緊張到唔知做乜，佢為氹我仲幫我簽名。依家大家係同事，感覺close咗，希望將來有機會合作拍劇。」

文：專案組

攝：吳文聰

服裝及場地：GUESS

髮型：Patrick So @ HH Hair Nail