據報道，被封為男神的馬國明（馬明）自與胡定欣分手後，感情一直未有着落，但「唐僧肉個個爭住食」，原來馬明近日唔聲唔聲，在朋友介紹下秘戀來自上海兼貌似「千億新抱」徐子淇的寰宇小花徐佳琦。
男神終於出貨，馬明為保愛苗扭盡六壬玩低調，搵屋企人護花之餘，連日做「柴可夫」都要車換車圖掩人耳目。但紙包唔住火，日前兩口子同車煙韌返劏房斷正，馬明即變「騰雞明」，口窒窒焗認戀情！
現年40歲的馬國明是圈中出名筍盤，被網友封為極品男神，可是自與無綫姐仔胡定欣分手後，儘管緋聞不絕，但冇個係真，男神變「和尚仔」，一直守Dry。貴為城中筍盤自然多女爭，據知馬明兩個多月前在朋友聚會中結識從上海來港發展的寰宇小花徐佳琦（Jackie），二人年紀相差14年，可是「宅男」遇上「宅女」，一見鍾情，一撻即着。
現年26歲的「上海徐子淇」徐佳琦樣子甜美可人，擁有驕人C Cup身材，據知馬明與她拍拖兩個月已打得火熱，但為免戀情早曝光早謝，兩口子惟有愛得低調，知情人士說：「佢哋拍拖兩個月，已經好識保護對方，極之珍惜呢段戀情，為避開耳目，佢哋通常都係深宵出動，仲要係遊車河居多，唔知係咪正值熱戀期，馬明開完工就算幾辛苦，都會漏夜揸車去會女友，呢啲咪愛得癡纏囉！」
查實馬明近期頻頻揸車到尖沙咀一幢舊樓附近接載索女出入，該索女不是他人，正是其真命女友徐佳琦，原來她來港後一直居於劏房！本月8日凌晨二時許，馬明座駕駛經尖沙咀，坐在司機位隔籬正是徐佳琦。雖然已是凌晨時分，但馬明仍表現得十分鬼祟，全程沒有落車之餘，只把座駕駛至女友寓所附近便停低讓女友落車自行返回香閨，但他又未有即時離去，僅把座駕駛前少少，原來要等女友回家後致電報平安，他才安心返歸。
紙始終包唔住火，更何況熊熊愛火，馬明戀徐佳琦果然百密一疏，終於當場斷正！日前（本月17日），徐佳琦悉心打扮會情郎，穿上一襲碎花短裙的她從寓所步出，先會合一名女友人，據知該名女友人正是馬明家人，特意過來照顧徐佳琦，二人其後步入附近一間商場Shopping，但見徐佳琦全程心不在焉，猛篤電話，又不時補妝Chok靚個樣，似乎正心急等待之後與馬明的約會。
約一小時後，馬明另一座駕駛到商場門口，可是司機並非馬明，相信是他委派護花二人組，車女友過海到其太古城寓所附近開餐。夜幕低垂，馬明的家人見晚飯過後即醒目離開，讓馬明和徐佳琦過二人世界，浪漫直到深夜。
據知，這對小情人雖然正值熱戀期，但絕少玩「宿一宵」到對方家中留宿，當晚馬明一如以往，車女友返回尖沙咀香閨，當記者上前拍照，二人同車當場斷正！此時見鎂光燈猛閃，二人如驚弓之鳥誠惶誠恐，不約而同露出一副愕然表情，馬明更變成「騰雞明」，一時手指指，一時又變「天然呆」，一時又嘟嘴不知所措，為免女友被嚇親，又不時望實掩面的徐佳琦，又打手勢着記者不要再影，總之護女情溢於言表！
馬明見勢色唔對，立即踩油圖撇記者，先後帶記者在尖沙咀、何文田及旺角遊花園，再過海到大坑，但也未能撇甩採訪車，見撇記者不果，他惟有鼓起勇氣做男人該做的事，準備落車焗認戀情，交代一切。當記者上前問徐佳琦是否其女友及為何要迴避？馬明沒有回答，即手指指示意轉燈，再問是否與女友出街？在旁的徐佳琦即尷尬地擰頭，不停撥弄頭髮，然後馬明落車，扮鎮定除下眼鏡狂抹，一人獨自面對記者提問。
馬：馬國明 記：記者
記：你女友？
馬：呢個女仔係朋友介紹認識，今日係4個人一齊去食飯，食完車兩個朋友返屋企，我就再車佢返屋企。
記：點解你哋要走？
馬：（顯得護花心切）佢真係好驚，你哋真係嚇親佢，佢係咁叫我開車。
記：你哋識咗幾耐？
馬：（口窒窒）啱啱呢排識，係朋友介紹。
記：有發展空間？
馬：你哋依家嚇親佢，真係唔知喇！
記：公開會唔會好啲呀？
馬：er……你哋嚇到佢咁，佢頭先真係好驚，你哋突然閃出嚟，真係嚇親佢！
記：你哋會去邊？
馬：想送佢返屋企，我哋都係第二次出街，你哋頭先都影到其他人一齊o架！
記：不如一齊影張相？
馬：你哋真係嚇親佢（連講三次）！不如下次有機會先再影啦！
說畢，馬明立即返回座駕，車女友過海返尖沙咀寓所，然後再揸車折返太古城，為保愛苗來回港九幾次，踩油都踩到腳軟。為了徐佳琦，馬明真係去到好盡，車換車掩人耳目之餘，又派屋企人護花，一於將愛進行到底！
東窗事發，馬明出街已謹慎好多，翌日在尖沙咀折返電視城開工，即使女友不在身邊，也不時游目四顧，（目及）實有沒有被跟蹤，周日擔任港姐準決賽做星級選民時，還爆響口與女生約會，並指女伴被記者嚇到病，為戀情打定底。
徐佳琦勁慳家宅到爆
新「明嫂」徐佳琦儘管得男神馬國明寵幸，但徐佳琦並沒有恃寵生驕，純過蒸餾水的她既重友情又慳家，名副其實宅女一名。獨個兒住尖沙咀舊式唐樓劏房的她，白天不時留在家，就算出街都係跟同性朋友一起，乖到無倫。女仔總愛打扮，可是連日來見她大多數都是穿同一件「36」Tee，真係日又着、夜又着都唔換。
日前徐佳琦又從寓所出發，由尖沙咀乘港鐵到旺角會合女友人，未上車前邊行邊捱麵包醫肚，已經慳到暈。見到女友人後，二人先到商場行一陣，然後送走女友，獨自從旺角沿彌敦道徒步到佐敦食燒味。見唔夠飽，再踏「11號車」（步行）到油麻地隊多個甜品先滿足，餵飽五臟廟後再行路當散步返尖沙咀買護膚品和日用品，最後抽着一抽廁紙返屋企。
