馬賽今日到電視城見完樂易玲後，即於電視城由曾醒明拖著她出來舉行記招，期間見馬賽眼濕濕想哭，起初一直都喊唔出，最後終於流咗大大滴眼淚。
馬賽說:「首先要多謝大家，其實我都係第一次見到咁多同行喺度。我知道大家都好辛苦，由噚日開始一直都好多人喺樓下等，頭先入停車場都有好多人等，你哋應該等咗好耐，多謝你哋。」
入正題，馬賽表示:「我係一個成年人，我要為自己負責任，所以公司暫停我所有工作呢個安排，我係好接受。 因為每一個人都要為自己行為負責任。」開始哽咽了。
至於有冇講到暫停到幾時，馬賽表示:「冇。」再謂:「其實……我都好感謝公司一路好支持我，呢個行為(指停工)亦都係好保護我，因為我確實需要自己靜下，休息下。」
馬賽承認仲有其他影片 憂已被發送予傳媒
被傳媒問及流出之影片究竟係幾時拍，馬賽就話:「條片係舊年拍，已經過咗一段幾長時間。」舊年幾時？馬賽表示:「噚日報警後，重案組亦上我家錄口供，我將最詳細口供同資料都交咗俾警方，所以有啲Detail唔方便講，我相信警察會處理。」
馬賽續道:「條片唔係我拍嘅，我亦都從來冇呢條片copy，我諗警方會幫我追查到條片係點樣嚟。」但拍片嗰個是誰？佢就話:「咁佢當然係我曾經非常親密嘅一個人，咁呀……好似我聲明入面講，其實……曾經好麻木咁信任一個人，同埋我相信好多人喺愛情中都係好麻木，但其實我想講番係，希望經過呢件事之後，所有女仔識得保護自己，即係無論你其實……其實係有好多可以引以為鑑嘅例子，但當你好投入一段感情，好愛一個人嘅時候，你會覺得呢啲事情永遠唔會發生喺自己身上，你會覺得對方會保護你，我依家知道只有自己先至可以保護自己，所以女仔千祈唔好影啲相或者片。」
除咗0依家流出嘅片同相之外，是否仲拍咗其他？馬賽謂:「其實我真係唔知，咁……但係……無論係再有啲乜嘢情況，我知道自己都要好堅強去面對。係好難嘅……。」
追問佢再影過啲乜？馬賽表示:「應該仲有，應該仲有……其實都係我好私人嘅嘢，請允許我唔答呢個問題，但係我唔知……我知道咩人有嘅，我自己係冇呢啲，我亦都唔知係咪有傳媒已經有咗相或者片，我0依家可以做嘅就係平伏自己嘅心情。」馬賽又以私密為由，拒透露更多。
重申：啲片唔係我自己拍，亦冇保存
問到如今汪子琦同富婆Laura都否認由佢哋流出影片，馬賽表示:「我知道條片係邊個拍嘅，亦都知道邊個有呢條片，究竟由咩途徑放出嚟，呢個要由警方查證。」
談到汪子琦噚晚於微博發聲明，指馬賽不時透過微信向佢發放類似已流出嘅片同相，更指自己一早已經刪除晒。對此馬賽表示:「佢講嘅嘢，我唔回應喇。但呢啲片唔係我自己拍，我亦都冇保存到。」
咁馬賽是否曾經向汪子琦發送過呢啲相同片？馬賽就以私隱為由不願多談:「希望你可以俾我唔答。我唔可以講到條片由咩方式流出，最真實嘅嘢我已經交咗俾警方處理，我亦都唔知……所以我冇得去評論人哋有咩目的，但係我可以講，因為呢啲嘢，其實令我非常之堅強咁，今日可以依家坐喺度，同埋我好感恩，由噚日到依家，好多人，好多人send msg俾我，鼓勵我支持我，我感受到好多嘅愛同支持，所以……無論係點解會流出嚟，或者人哋想做乜嘢，我唔知……但係我係要堅強去面對，同埋我係一個成年人，我要為自己做嘅嘢負責任，承擔後果。同埋我作為我爹哋媽咪嘅女，都要好堅強咁企出嚟，俾屋企人一個交代，因為我知道佢哋更加難受。」說到後段，馬賽已經禁不住痛哭。
拒談會否再轉性向：呢個世界冇後悔呢樣嘢
有傳媒於馬賽記招上，問到馬賽會否考慮退出娛樂圈，佢話:「今日我可以坐喺度面對大家，其實我冇諗以後。因為我知道好多記者朋友都有send msg俾我，或者關心我打俾我。我冇諗過以後仲可唔可以做呢份我喜愛嘅職業，以後會從事乜嘢工作，我冇諗過呢個問題，但係我作為一個女仔，我要為自己講幾句說話，同埋我真係要保護自己，所以我交咗俾重案組。」
談到經過此事後，會否影響到其性取向，馬賽表示:「我覺得愛情裡面係冇分男女，其實戀愛係一件好平等嘅事，係兩個人嘅事，我曾經係一個……曾經係一個，可以話係為愛情不顧一切嘅人，但係經過一連串嘅事之後，真係要成熟啲，成長。」
續問到是否曾後悔拍呢啲片，馬賽斬釘截鐵謂:「呢個世界冇後悔呢樣嘢。冇得後悔，冇得後悔，呢個世界係冇後悔呢樣嘢，做過就要承擔，錯咗就要認。我好肯定我愛錯咗人，亦都好肯定我曾經唔聽人講，任性嘅行為係好錯，傷害咗人，包括係……呢一年發生好多嘢，我諗令好多人都好失望，無論公司、長輩、朋友，令好多人都好失望。我錯咗，我承擔後果，我放低咗，我希望堅強面對我嘅過失。」此時馬賽又哽咽。
馬賽靠宗教救贖：我依家係佛教徒
馬賽於記招中，被問到道方才樂小姐講咗乜？佢就話係將事件原本交代解釋，至於現階段，正如噚日講，暫時將手上工作停止，部門要時間商討。會否休息去旅行散心？馬賽表示:「我依家係佛教徒，每日都聽經，噚日好難捱一日，都有不斷聽佛經同佛音，信仰幫到我好多。」
對上一次馬賽被雪，曾傳有經濟困難，今日問馬賽是否再有壓力？佢就開始再度痛哭:「噚日發生呢件事一直唔敢同屋企人講，佢哋喺內地未必可以香港知咁快，最開始諗住佢哋會唔會接受唔到，內地好多網站轉載，我同爸爸講對唔住，爸爸話：『女，唔使驚，天榻落嚟都幫你撐住。』我真係好多謝佢哋，有佢哋保護、愛，冇嘢係過唔到。」
自爆曾患抑鬱：有人群恐懼症
馬賽於記招後段，再被問及拍片時最激係點？可記得所穿的服飾？馬賽謂：「我唔知人哋拍過乜，兩個人之間好私隱嘢，可唔可以唔喺度對全世界人講？我同警方講得好清楚。」對於網上流傳消息指仲有片同相，可擔心會有更激片或相流出？馬賽話:「其實舊年年尾到依家，每日都過得唔容易，中間患過抑鬱症，有睇精神科醫生、有食藥，有人群恐懼症，好多情緒都經歷過，所以我覺得擔心都係冇用，冇嘢需要去驚。」
馬賽續道:「其實過去呢段時間，難聽說話、所有嘲諷我已經好習慣，所以沉默到依家。令到我最想喊最難受係收到好多鼓勵說話，發現好多人真心愛錫我，我唔可以被打倒，我要幾難跨過都要跨過呢個關口，唔可以活喺陰影當中，要堅強面對。」
傳媒問馬賽何以會患抑鬱？是否擔心片會流出？佢話:「唔係擔心，你同一個好親密人有親密行為，你相信佢一定會保護你，唔會由嗰時開始擔心，而係嗰段時間好多報道令我分唔清楚，自己係咪理解能力係咪有問題或有病，好驚見到人食唔落飯，半夜醒，好驚，我諗嗰段時間情緒問題。」
聲稱拍片曾少醉 點解拍：盡量滿足佢嘅要求
記招上，馬賽被問及之前可有人拎之前拍攝的片威脅佢，馬賽避忌地謂：「關於片嘅嘢已經同警方講咗，講太多可能妨礙處理。」有指馬賽於流出之影片中眼神「好迷」，佢即謂:「我就冇食藥，但關於條片希望大家手下留情。」咁有冇飲酒？佢話:「我可能有少少微醉。呢段時間患過抑鬱症，醫生叫最難過要忘記，我決定唔再諗番，放下咗向前行。」
續問到同汪子琦、Laura幾耐冇聯絡？馬賽表示:「由舊年年尾到依家都冇聯絡。」會唔會做第三者？馬賽說:「no comment。」咁噚日有冇聯絡好親密人？馬賽話:「冇。」
此外，馬賽亦有接受《東張西望》訪問，之前素顏入電視城嘅佢化咗淡妝，搽咗啡色眼影，一開頭已經木無表情，臉有憂色。精神還可以，但疲態盡現。佢話噚日知道成為封面人物及有片同相流出之後，佢都覺得好尷尬:「重案同我講，已經減少左好多喇。」
至於點解拍？馬賽就話:「其實大家應該都試過好愛一個人，好想一個人對你好。喺真心愛一個人時，就希望盡量滿足佢嘅要求。但我想同其他女仔講，唔好咁樣。」