張可頤臨危受命執阿佘二攤

佘詩曼原定周一為新劇試造型後投入拍攝，但日前她在大陸返港時不慎跣低跌甩手臼被迫辭演。監製梅小青前日決定邀張可頤充當「雷霆救兵」執二攤頂替阿佘，「臨危受命」的張可頤笑言：「公司專搵我做呢啲急嘢！」

張可頤周一試造型後便投入拍攝《法證先鋒III》。

阿佘原定由大陸趕返港拍攝《法證先鋒III》，但日前她返港期間，不慎跣低跌甩手臼，需打石膏兼休養六星期，被迫辭演新劇。身為女主角的阿佘臨時甩底，新劇亦開始拍攝，監製梅小青急忙找人頂替，最後邀張可頤「執二攤」頂替阿佘。

佘詩曼仆甩臼，被迫辭演新劇。（資料圖片）

放棄登台唔諗損失

前日接旨充當「雷霆救兵」的張可頤周一試造型後便要投入拍攝，張可頤昨日接受電話訪問時笑謂：「公司專搵我做呢啲急嘢，冇法啦大家都好急，但係咁啱又啱機緣。尋日小青姐打畀我，同我傾咗一個鐘，依家劇本都未睇，希望雙方都配合到。」

張可頤原定為賀歲片《我愛HK開心萬歲》宣傳後便返大陸登台搵真銀，但臨時頂替阿佘，難免要推掉工作。她說：「呢啲小意思啦，冇去諗損失，呢套劇會一直開工到四月。」

張可頤自爆當年《法證I》亦有被邀拍攝，但因檔期問題未能參演。她說：「今次都係第一次做法醫，同黎耀祥都好多年冇合作，相信會有火花。」

胡定欣不覺拍攝進度受影響。

胡定欣盼合作愉快

另外，有份演出《法證III》的胡定欣昨日到旺角為賀年節目錄影。她表示新劇雖然臨時易角，但拍攝進度未受影響。此外，胡定欣亦在微博表示首次與「視后」張可頤合作，希望大家合作愉快。

佘詩曼Fans微博安慰偶像

在內地拍劇已一段時間的佘詩曼，日前在杭州準備返港拍攝新劇《法證先峰3》，沒料意外滑倒地上，跌傷左手致甩骹，即時入院打石膏後返港休養，惟受傷勢影響，她無奈辭演該劇。

阿佘的Fans得悉偶像受傷的報道後，紛紛在她的微博留言問候，不少粉絲更表示擔心到哭了起來，叮囑偶像要好好休息，安慰她雖然失掉夥拍黎耀祥演出重頭劇的機會，但最重要是她先要養好身體。

此外，惠英紅得知阿佘不慎受傷，也在微博表示心痛及掛念，叮囑她好好保重，養好病再工作，阿佘則回覆表示：「知道了…痛呀…」