2015出爐港姐是非多多，才貌出眾的10優狀元兼劍橋法律系高材生麥明詩（Louisa）在周日當選港姐冠軍時，沒佳麗上前恭喜，影官方相又沒扮錫，就連前日亞軍龐卓欣、季軍郭嘉文與幾位落選港姐相約食雞蛋仔都沒份，令人懷疑Louisa人緣麻麻。

無敵是最寂寞。麥明詩以高學歷贏了民選，跑贏幾個馬位，卻被形容為無朋友，當晚更未有佳麗主動上前恭喜，難道她被杯葛？或是自視高人一等？無論她是否受到佳麗冷待，不過冠軍后冠早已戴穩，她前幾日在ig亦有感而發，寫下一段英語的得獎感言，主要感謝父母給她動力，以及在她失敗時給予支持，提醒她人生的道理。除了多謝父母，麥明詩亦接連上載與好朋友的照片，多謝朋友捱義氣為她出鏡拍攝，並留言﹕「多謝捱義氣的好朋友……一切在心中！」不過，亞軍龐卓欣就贏盡友誼，與季軍郭嘉文相約其他落選港姐飯敘，更指「見少一日都唔得」，也在ig大曬友情相關照。

當選晚上，麥明詩在無綫接受完連串訪問後，踩到凌晨三點先返到屋企，父母及做醫生的哥哥特地在大廈門口迎接。

麥明詩當選冠軍後，電視直播畫面見到沒有佳麗上前恭喜，只有鄭裕玲、曾志偉上前握手，化解尷尬場面。

訓練期間，亞軍龐卓欣（中）跟季軍郭嘉文（右一）已經傾得埋，會將平日活動合照放上ig。

麥明詩與龐卓欣在週一晚完成工作後，突然友好，落車去餐廳食飯，幾乎全程拖住手。

后冠加冕翌日，四人再出席記者會。

麥明詩贏冠軍卻輸掉友誼，更傳被亞軍龐卓欣和季軍郭嘉文聯手杯葛，三位得獎佳麗昨日在領獎活動上齊聲否認不和。23歲的Louisa還被爆與牛津大學法律系畢業、現職執業大律師的林作（Joe Lam）拍拖兩年，但未知是否擔心影響星途，Louisa昨日竟然將男友「降呢」做朋友，還有點嫌棄說：「我覺得佢唔夠成熟。」

其實麥明詩天生愛才，在英國劍橋讀書期間，幾個男友幾乎全部是法律系學生，包括劍橋同學四眼Derek，之後跟斯文靚仔Jason撻着，不過兩男都好快被她叮走。之後，麥明詩認識了來自牛津的林作，二人至今已拍拖兩年，在朋友圈已是公開的一對。做得十優高材生的男友，林作來頭亦不小。住半山，家境相當富裕；此外，他更是大律師清洪的高徒，畢業不久，已考到牌，尖子料。

麥明詩跟 Joe媽咪關係不錯，三人在慶祝派對合照兼有傾有講。

「Joe讀書好叻，喺英國貴族學校哈羅公校讀書嗰時考到獎學金，佢喺牛津讀完數學，再轉讀法律，舊年又得到香港大律師公會獎學金，今年已經成功考牌，係執業大律師。Louisa（麥明詩）好欣賞佢，Joe副修哲學，好重視獨立思考，佢好支持Louisa追尋自己理想，完全唔介意佢選港姐。選美初期，Louisa壓力大到匿埋屋企喊，瘦到得番唔夠一百磅，好彩有 Joe做佢後盾。」知情人說。

陶傑曾經邀請Joe Lam（左一）上他的網台做節目嘉賓，大讚他年輕有為，其間更暗示他有個猛料女友。

陶傑在 fb大讚麥明詩，又暗示她的男友一定要牛津畢業才合襯。

被稱才子的陶傑，亦好欣賞林作，曾邀請對方為其網上清談節目《青英會》做嘉賓。節目中，陶傑漏口風：「你（Joe）女友正在崛起，成為一個知名人士。」 Joe小心保護女友，只笑說：「好似係！」好得體。

今年四月，林作在香港舉行派對，慶祝進身大律師行列，麥明詩以女友身份出席，更同Joe媽一起，幫手招呼賓客。當日到賀的來賓，包括何猷亨、周嘉儀、陶傑、寇鴻萍等，猷亨更留足全場，相當俾面。

4月中， Joe Lam正式成為大律師，舉行慶祝派對，媽咪及女友麥明詩以及好友何猷亨都有出席。

昨日眾出爐港姐在佐敦出席珠寶領獎活動，有報道指Louisa與牛津法律系畢業，並已於今年4月考到牌做執業大律師的男朋友Joe Lam拍拖兩年，兩人經常結伴出席派對，並於男友畢業禮上與未來奶奶一齊合照。不過，Louisa昨日就細細聲否認謂：「好朋友。」好到甚麼程度？她說：「幾好。」問到一個讀牛津，一個讀劍橋，為何會認識成為好友？她解釋：「英國大學朋友圈好細，而且比較多聯校活動，就係咁識。」覺得Joe怎樣？她說：「好叻仔，同埋我都喜歡叻嘅人。」何以不能進一步發展？她想了想後說：「我覺得佢唔夠成熟。」

談到陶傑上月底邀請Joe到其網上節目《青英會》，不點名公開Joe的女友與他好登對，Louisa對此謂：「可能佢想塑造我哋做一對金童玉女。」陶傑昨日在電話中直認，訪問中所指的「Joe女友」是Louisa，他說：「係！」可覺得Louisa否認是受壓力？陶傑說：「可能㗎，你知喺八婆是非社會，你有男友啲人又眼紅，男友出色又妒忌，冇男友又話有好多闊少爭住想識，中間有少少矛盾，我諗佢handle到。」

但其實Louisa與Joe早有交流，Louisa去年曾在Instagram貼上一張獨坐的夜空相，發問：「你願意為將來的可能，放棄一點的從前嗎？」Joe立即回覆：「我願意我願意」足見二人默契十足。

對於被指人緣差，在冠軍寶座前無人吼，Louisa有備而來說：「其實係畫面問題，只係嗰一刻，之後同班佳麗都有傾有講，選美完咗之後我哋要錄影節目，都有互相擁抱同恭喜。」是否沒被邀食雞蛋仔？她似有官方解釋：「我哋一路有個港姐group，如果有人提出想去邊度，你覆就代表會去。」三人齊聲否認不和，龐卓欣同說有港姐group，誰去誰覆，問可知Louisa有男友？她避忌說：「如果佢有男朋友，我梗係戥佢開心啦。」

麥明詩今日出席護膚品贊助商頒獎活動。

麥明詩的是非可謂日日新鮮，今日又再傳她介入蔡思貝與排舞師麥秋成的戀情，當談及此事時，她自言也預料到。問可認識麥秋成？麥明詩反應甚大：「吓？都係姓麥囉，他是港姐排舞師之一。」被指撬蔡思貝牆腳，她聞言後狂笑：「吓？大家同姓啫，好好笑。」麥明詩指與麥秋成除排舞外，私下無任何溝通。他未符合資格？麥明詩指對方也是跳舞方面的狀元。自言不會做搶人男朋友的事，並笑謂：「我淨係畀人搶。（試過？）唔係，我只係覺得毋須將事件複雜化，生活簡單、開心便可。」問之後見到蔡思貝會否尷尬？麥明詩說不會，與對方在化妝間有過一面之緣：「佢唔『寸』，畀我感覺好真性情。」

陶傑踢爆她和林作（Joe）是拖友，麥明詩說知陶傑是誰，但不熟：「係咪嗰個才子？可能他跟同那個男仔（林作）較熟，加上他日理萬機，可能搞錯了。（有男友也不會講？）這個問題不知怎答你。」麥明詩曾自爆讀書時拍過拖，問是否就是這位讀牛津的Joe，她指當時男友是讀劍橋的：「我鍾意劍橋多啲，劍橋的人好啲。」見她昨日一副倦容，問是否因近排新聞困擾？她直言：「當自娛！攰係攰，因我面對考驗會付出100%精力，之後就鬆弛。」

對於麥明詩被指撬蔡思貝牆腳，龐卓欣聽後一臉愕然稱不相信，指麥秋成是港姐排舞老師，大家是師生關係，不見對方對某一位特別照顧，亦留意不到兩人有特別關係。但她卻無意大爆有時見到麥秋成和蔡思貝兩個一齊在餐廳食飯。男友可擔心你當選後多狂蜂浪碟？龐卓欣笑言不會亂把電話號碼給人，又指與拍拖兩年的男友感情穩定，互相信任對方，也很專一，但未諗結婚：「太早，我才23歲，到26、7歲再考慮。」