內地富豪男友慫恿 瞞老公炒天價豪宅 變心栢芝 榨乾霆鋒

「鋒芝變」新聞日日有新發展，經過半個多月來傳媒地毯式的報道後，三姑六婆皆認定栢芝為「吸血貴利王」，人心不足地陰乾老公霆鋒的身家。其實查小欣早前大爆「鋒芝變」始於4月17日金像獎前，原來這位被謝賢叫收聲的資深傳媒人並無吹水。日前，地產界傳出一則驚天秘聞，3月8日，有內地富豪獨自到中半山梅道的MayFair睇一層樓價過億的2,800呎樓盤，一切皆合心水的他對經紀說：「待女朋友看後才作決定。」至3月15日，張栢芝在胞弟陪同下，抱着Lucas拉隊到達該單位，一切謎底均已解開了。

因為貪錢，謝太辛苦經營多年的好媽媽形象一舖清袋，不過，栢芝並非省油燈，眼見自己形象跌至谷底即時做嘢，其後便有所謂霆鋒音樂人好友向網站爆料，指栢芝跟霆鋒已和好如初，還每日一電，更說女方在聯名戶口提取霆鋒過億現金及主動提出分手一事全屬流料，但同時，又有消息指霆鋒透過電話向麻煩栢芝爆粗，隨即換來霆鋒助手錶哥的回應：「當然冇啦！都冇傾過偈，點爆粗呀？」噢，無傾過偈又何來每日一電，那位所謂音樂人好友屬何門何派，確實不用明言。

富豪男友助睇樓

早前查小欣寸爆栢芝昔日如何愛霆鋒，如今變得很陌生，更狠下判語，指栢芝不斷吞食霆鋒的資產︰「好似栢芝要一舖清霆鋒嘅袋。」原來令栢芝要錢唔要佬的原因，全因她跟大陸一富豪秘密撻着。日前，地產界傳出一則驚天秘聞，指今年3月8日，當時栢芝正於廣西北海市替王晶執導的《無價之寶》趕戲，期間，一中年男子透過地產公司獨自到位於中半山梅道一號的MayFair睇樓，得他垂青的是位於高層2,800呎，樓價1億的單位，男子看樓期間一直非常細心，最後還向經紀拋下一句：「我很滿意，但還要待女朋友看後才作決定。」

栢芝唔貴唔買

3月15日，富豪口中的女朋友出現了，當日，栢芝抱着Lucas及栢文、豪龍兄弟及兩人女友到達上址，富豪卻沒有出現，在上址逗留一會後，栢芝再度詢問經紀樓價，得知該層單位只需1億後便離開。至4月27日，栢芝便以她佔99%股份的便利捷有限公司的名義，以1.28億購入同區另一豪宅世紀大廈2座連天台及車位的住宅物業，據知栢芝簽下臨時買賣合約後即支付訂金，並必須於7月11日或之前支付餘下過億款項。但有傳栢芝因不夠現金周轉而向財務公司撲水半億，老婆好勝貪玩又「掏空」自己身家，難怪有傳霆鋒今舖勢在必「離」。

霆鋒與栢芝手拖手出席金像獎頒獎禮，但有傳二人感情一早有變。

位於半山梅道的MayFair是傳統的豪宅。

栢芝近年拖住Lucas周圍去，估唔到連睇樓都有份。

栢芝顧家就係人都知，對兩個細佬都照顧周到，所以都預埋一齊睇樓。

霆鋒及栢芝分別在大馬及深圳拍戲，有指二人日日一電維持感情，大家信唔信呢？

栢芝炒上癮

張栢芝購入的世紀大廈（見圖），面積3,663方呎，連超過2,000呎天台，以成交價1.28億元計算，平均呎價34,944元，創大廈新高。單位屬4房間隔，由於物業位於極高層，單位左邊享中環煙花維港景，而右邊面望山頂凌霄閣，景觀一流；另物業屬一梯一伙設計，要進入大廈，必須路經一條加設大閘的私家斜路，私隱度極高，保安亦不成問題，相信被偷拍的機會不大。