黃智雯（左）的母親經營化妝品店，扮靚用品任攞，其姊 Cathy更是英皇教育補習天后（小圖）。

剛播完的無綫劇集《搜下留情》中彈出的「鵪鶉妹」黃智雯，被網友熱捧演技了得，但同時卻被爆喜歡稱呼人為 Baby，並被大起底，她否認有猛料演藝學院前校長祖父，但直認胞姊是巴閉的補習天后。

黃智雯（ Mandy）為 07年落選港姐，她先後在無綫劇集《巴不得爸爸…》和《搜下留情》中有突出表現，近日讓觀眾注意。尤其《搜》劇中演「鵪鶉妹」，令她在觀眾心中加分，日內將動筆簽約成為無綫親生女。升呢同時，是非也接踵而來。

黃智雯在微博上載了跟伯樂潘嘉德等吃飯敍舊的合照。

黃智雯在《搜下留情》與陳慧珊（左）演兩姊妹，鏡頭後也相處融洽。劇照

單親家庭長大

有讀者向本報踢爆 Mandy的祖父是演藝學院前校長，與無綫幕後人稔熟，令她落選港姐後即不斷有演出機會。讀者又爆料指 Mandy性格開放，對台前幕後都稱呼為 Baby及愛攬抱。
Mandy前日趁着空檔到母親位於灣仔的化妝品店拿護膚品，兩母女在店中非常好傾。據知 Mandy自幼在單親家庭長大，除了 Mandy逐漸在幕前打出知名度，其姊 Cathy也非常巴閉，是英皇教育英文科補習天后。
問 Mandy是否因為有個演藝學院前校長爺爺，背後有人撐腰？她說：「唔係，我自細喺單親家庭長大，我係讀過演藝學院，但爺爺唔係演藝學院以前嘅校長，況且我爺爺早幾年都過咗身。其實呢幾年好多監製選用我拍劇，我諗佢哋係睇咗我啲演出，特別係德哥（潘嘉德），佢因為睇咗《巴不得爸爸…》先再搵我拍《搜下留情》，完全係我好畀心機鑽研劇本。」
Mandy強調不會逢人叫 Baby：「我好慢熱，同好好朋友見面打招呼有時都會 hug（擁抱）吓，我只係女仔朋友先叫 Baby，男仔除咗我隻狗。」 Mandy更細數與同屆港姐冠軍張嘉兒和胡杏兒投緣，有叫過她們做 Baby。
採訪、攝影：比華利

黃智雯同羅仲謙咀嘴 零尷尬

在劇集《搜下留情》中演「鵪鶉妹」的黃智雯，與羅仲謙首次合作飾演情侶，劇中二人有不少感情戲，當中更有咀嘴鏡頭，令黃智雯十分難忘，她表示：「今次係我螢幕初吻，原本劇本冇呢場戲，係導演臨時加插，所以事前都冇乜準備工夫，只係心情有啲緊張。（尷唔尷尬？）唔會，羅仲謙係好拍檔，佢仲叫我放膽咀落佢度，當時好專注拍呢場戲，所以都唔識得尷尬，感覺幾自然。」

黃智雯與羅仲謙在劇中有不少感情戲，當中更有咀嘴鏡頭。

此外，黃智雯表示與馬德鐘、陳敏之、陳慧珊及石修等前輩首次合作，她說：「佢哋都教識我好多嘢，同陳慧珊比較多對手戲，佢分享咗好多之前拍戲嘅經驗畀我，我好想學佢咁做戲咁自然。」