雷頌德吹雞開個唱 Kelly由頭唱到尾
真係可以話係紅星雲集，又或者大家可以形容做90年代集體回憶嘅《雷頌德Thank You演唱會》噚晚喺紅館開騷。嗱，數一數部份嘉賓比大家聽先。陳慧琳、陳曉東、Big Four、楊千嬅、古巨基、馮德倫、倫永亮，仲有壓軸嘅黎明，另外仲有一班後輩好似Stephy、方力申同埋JW、衛蘭等等等等。
大堆頭就梗0架喇，但係開頭就已經話冇encore，搞到全場萬幾人一齊「噓」到暈，阿Mark打圓場話個騷係「私房菜」，一定唔會餓親觀眾，好食之餘仲會有甜品，總知就一定會夠喉。最後成12點先散場，算佢啦！
一開場陳慧琳同long time no see嘅陳曉東同一大班Dancers一齊嚟首《打開天空》熱身，之後就到Big Four唱《大四喜》，炒熱氣氛之後，阿Mark出場喇。除咗以往一眾金牌歌手之外，阿Mark都有多謝Paco，仲話冇對方就唔會有自己。另外一位好感激嘅人係黃霑，阿Mark話霑叔教自己做音樂，亦都教自己做君子，直到霑叔過身之後，先醒起收過一個電話，係霑叔話佢編曲差咗，但係好遺憾，最後都冇時間約霑叔再見面，所以前晚全場惟一一首非阿Mark嘅作品，就係霑叔嘅《明星》。
陳慧琳更加係由頭唱到尾，仲同阿Mark、馮德倫再組「Dry」一齊再唱經典歌《紀念日》。貴為大導演嘅Steven上台仍然casual，仲講到明自己死性不改，又講笑話點解當年組合名要改英文「Dry」？用國語「干」(乾字簡寫，唔係粗口呀！)可能仲好喎。阿Mark就話唔明點解大家傳佢哋不和，仲話佢哋兩個當年應該可以叫做男版Twins，吓…
雷頌德開個唱，嘉賓全部巨星級。
陳曉東(右)都有嚟呀！
靚媽Kelly狀態好好。
Kelly唱足全晚。
《紀念日》，噢，好懷念啊~~
點少得黎生呀~
sweet全出場嘅Stephy同方力申。
仲有古巨基添！
呢個陣容，歌迷應該滿意啦。
Big Four三子
倫永亮鋼琴加雷頌德吉他，爽呀！
千嬅上台自爆陀仔肚抽筋 好驚驚！
《雷頌德Thank You演唱會》噚晚喺紅館開騷，除咗陳慧琳、黎明雷頌德(阿Mark)娛賓之外，RubberBand(RB)都係嘉賓，仲唱咗首好激勵士氣嘅《強》。
阿Mark喺台上撐RB：「RubberBand係好多元化嘅樂隊，全部歌都係由香港人出發，希望令大家有共鳴，最近香港氣氛唔係好好，好多大家想爭取嘅訴求都唔可以達到，又得唔到幫助，但係香港人需要自強不息嘅精神。」
楊千嬅就著件透視露背裝出場，咦，演唱會海報冇佢0架喎，千嬅就解釋話，係因為當時自己啱啱生完小朋友坐月要閉關。
千嬅又自爆仲話未生嘅時候公司叫自己錄首歌，點知去到先後悔，因為首歌都好輕快，自己陀住個大肚邊錄邊搖，仲搞到個肚抽搐，真係諗番起都覺得驚。
同場嘅羅敏莊就真係大露背俾大定睇喇，好吸引呀！
千嬅透視裝，引死人喇~
有露背0架，好吸引耶~~
呢啲咪叫氣勢囉！
不過都係要笑吓先得~
話想專心湊仔嘅羅敏莊都落力演出
仲送出名副其實嘅玉背！
衛蘭甜笑最好看。
JW都要唱番兩嘴。
繆浩昌(6號)好跳脫喎
RubberBand雖冇辭演維穩騷，不過阿Mark都力撐。
阿Mark兩公婆。
Mark雷爆料：「方力申同Stephy一齊有7年喇！」
雷頌德(阿Mark)開騷，喺現場爆大鑊，佢話方力申同Stephy雖然唔認拍拖，大家都知道可能係拍咗3、4年，但其實阿Mark已經知道7年咁耐，希望佢哋繼續溫馨同甜蜜喎。阿古Sir古巨基就老貓燒鬚，佢想串阿Mark喺屋企著住條大象孖煙囪周屋行，點知就口快快講錯粗口字，搞到要阿Mark幫佢兜，真係笑死人。
《明星》由壓軸嘉賓黎明唱，有黎生，又點會冇金句呢？佢一出場，又教曉大家一個驚天大秘密：原來講嘢，係唔使用口嘅！
其實黎生係咁講嘅，佢一出台見到阿Mark，就同觀眾講：「大家都知，我哋唔使用口講嘢，用心講」，點知阿Mark再回一個爛Gag話：「係呀，情深說話未曾講吖嘛」。
都…都係唔好講喇，唱歌啦。
雷頌德個唱，粒粒星都有現身。
方力申同Stephy俾阿Mark爆大鑊。
睇Stephy情深款款嘅眼神，7年？大家信唔信？
壓軸嘉賓有黎明，又有金句了…
「我哋唔使用口講嘢，用心講」黎生話嘅。
都係唱歌實際，不過唔好走音呀~