馬賽負能量爆燈:生存冇意義

無綫小花馬賽去年獲「飛躍進步女藝人」獎後,接劇無停手,更首次於新劇擔正演出,與三料視帝黎耀祥做對手戲「圓夢」。可惜入戲太深,令她悲傷情緒不能抽身,她試過跟其母說:「其實我覺得生存喺呢個世界上冇乜意義!」嚇壞媽咪之餘,更被經理人下令放假休息!

機會不斷 夢想成真

獲獎對很多新人來說無疑是最有效的強化劑,馬賽去年獲「飛躍進步女藝人」獎後,工作機會接踵而來,劇集產量每年遞增。有人說,「飛躍」後下一站,自然是女配、視后,但她已忙到無暇思考「多餘」事。

首次擔正的馬賽認為拍劇如考試,每天要接受不同的挑戰,因此要全情投入。
首次擔正的馬賽認為拍劇如考試,每天要接受不同的挑戰,因此要全情投入。

獎項係一個肯定,舊年攞到個肯定,每一個對手都有我可以學習嘅地方,可以好幸運攞到呢個獎,已經係好大嘅滿足。我唔會特別祈求人哋嘅肯定,好多嘢都係自然而嚟,獎項又好、或者更加好嘅機會都係因為你自己,真係可以勝任到你嘅角色而嚟,最緊要做好本分。我覺得我仲有好多地方需要學習,有好嘅角色、好嘅劇本畀我學習已經係非常滿足嘅一件事。

跟黎耀祥學習

好開心今年有機會第一次擔正劇集《神探高倫布》,之前聽講添哥(李添勝)就嚟退休,我嗰時好希望可以拍,點知諗下諗下,三月就收到消息話畀添哥揀中,仲有得同祥哥(黎耀祥)做對手戲!我之前睇《巾幗梟雄2》嘅時候就諗如果有日可以同呢班好戲之人合作就好!我第一日同佢哋合作,就有種夢想成真嘅感覺!

馬賽
勤力的馬賽表示自己仍有不少地方要學習,最緊要做好演員的本分。
馬賽
去年奪「飛躍進步女藝人」獎的馬賽,工作機會接踵而來。
馬賽
能夠同黎耀祥演對手戲,馬賽笑言夢想成真。
馬賽因入戲太深而情緒受困,幸有母親的安慰與支持
馬賽因入戲太深而情緒受困,幸有母親的安慰與支持。

之前一直對演戲積積埋埋有好多問題,睇咗祥哥《戲劇浮生》本書之後幫咗我好多,未同祥哥合作之前,我仲特登搵佢喺本書度簽名。

接受挑戰 欠缺信心

首次擔正劇集,對馬賽來說是極大的挑戰,她笑言每天拍劇就如考試,努力跳高去觸及一些未知的領域。不過入戲過深的她就算放工都未能放下重擔,被角色的負面情緒纏繞,甚至懷疑自己的生存意義!

拍嘅時候好擔心,冇咁大信心擔咁大套戲,故事線一路跟住我走,我媽咪話我太大壓力,有段時間拍啲好有情感嘅戲我就入戲好深,我跟住個角色情緒好down,媽咪話要放低工作,連導演、幕後都話收工要擲咗個角色,但我嗰段時間真係做唔到,我覺得真係一個好大嘅重擔喺我個身,我要做得好好去回報!

我一得閒,每日拍完劇返去就反省做唔做到,好似每日都係個考試咁,好多嘢都未試過,例如打戲、好多好情深嘅戲,好似每一日都跳高去捉一啲唔知可唔可以掂到嘅嘢,嗰段時間好全情投入!

經理人勸放假

其中有場戲講我喺西貢碼頭,知道畀人呃嘅時候,泊架車喺一邊喊,喊完之後好空洞咁坐喺碼頭,望住出面,我重睇嗰段戲都好震撼,拍完感覺我捉到人物嘅心態。呢個角色令我喺一種情緒出唔返嚟,我知我唔會做傻事,但我同媽咪講:「其實我覺得生存喺呢個世界上冇乜意義,呢個世界都唔係好需要我」,嚇到媽咪好緊張,佢叫我唔好成日諗住!

有啲前輩都話一個好嘅演員會抽離到,可以好快進入、好快抽離,我呢個moment未做到。我講畀經理人知,佢都好驚,拍完快啲放假,之後我去咗美國旅行,放咗假再跳出嚟睇就差好遠。

緋聞練EQ

馬賽今年與同劇對手周志文傳緋聞,她笑言可以鍛煉EQ:「今次唔係第一次傳緋聞,心態相對好過第一次,啱啱入行時好激動,要同家人解釋,今次冇咁大影響,家人已經冇問!感激呢次機會,令我又大個咗啲,下一次再傳乜嘢緋聞我就真係可以一笑置之,EQ高咗,面對緋聞可以一次比一次更堅強!」

服裝:Guess

場地:MM/H(Mix and Match Home Style)

髮型:Sidney@Hair

化妝:Kathy Fung

攝影:黃叔榮

口述:馬賽

筆錄:韋啄

飛躍進步等升呢

攞獎雖然不至於一步登天,但觀乎近年奪「飛躍進步女藝人」獎的女演員,個個到現在仍被無綫重用,曝光率奇高,適逢無綫鬧花旦荒,邊個下一站可以升呢做花旦?

胡定欣
獲獎年份:2008年

胡定欣獲「飛躍」後,分別於前年憑《刑警》及去年憑《法證先鋒III》問鼎「最佳女配角」,並進入最後五強,可惜兩次皆落空。今年她有望再憑《拳王》入面演聾啞人士一角,再獲提名。

陳茵媺
獲獎年份:2009年

港姐出身的陳茵媺最初多參演處境劇, 於《畢打自己人》飾演陳寶拉一角而為人熟悉。近年她開始參演主線角色,再加上與陳豪的戀情令她人氣急升,今年有份參演兩套台慶劇《天梯》及《大太監》,備受重用。

唐詩詠
獲獎年份:2010年

唐詩詠當年奪獎時哭成淚人,並感謝已離世的母親。之後她開始擔任劇集女主角,包括《真相》、《拳王》及《造王者》等。去年憑《真相》飾演見習大律師角色,入圍「最佳女配角」最後五強。