黃金視窗:蠟青Laughing霉兄難弟起錨

Laughing×蠟青=《潛行狙擊》二五兄弟幫。

謝天華次次扮 Laughing都 chok神上身,偏偏 100% match,寸寸貢 chok得起,否則梁笑棠不會梅開四度。你可以說他有料到,也可以說他食老本,天華就講到明 Laughing咪變黃飛鴻或者包青天,見好收好過做爛茶渣,咁就謝天謝地謝天華。

戲裏戲外都要向 Laughing嗌聲大佬的蠟青 MC Jin,由當年全球華裔最強 rapper降級電視劇配角, Jin沒所謂,反正大佬華都講過 N年前試過窮剩 5蚊身家。時勢造英雄,今期二五潛行, 200萬人爭睇,狙擊成功!

撰文:朱倬誼、何慧斯

與 Laughing sir融為一體的謝天華今期 chok到行,林峯唔該靠邊站。攝影:陳俊強br/化妝: Eleena Yu of Agogo Image 場地: agnè s b. LE PAIN GRILLÉ

與 Laughing sir融為一體的謝天華今期 chok到行,林峯唔該靠邊站。攝影:陳俊強
化妝: Eleena Yu of Agogo Image 場地: agnè s b. LE PAIN GRILLÉ

謝天華 5蚊潦倒日

人有三衰六旺,謝天華在風火海時期曾經霉到得 5蚊身家,接《古惑仔》電影系列扮大天二令他絕地翻身,衰衰格格、亦正亦邪的角色是他撚手作。到前年於《學警狙擊》演卧底探員 Laughing,天華終於坐正一線,角色梅開四度,《學警》後即開電影《 Laughing Gor之變節》,到今期劇集《潛行狙擊》,下月又開電影, 44歲的謝天華和 Laughing早已連體,角色更成為天華代表作。

「希望見好就收」

謝天華直認 Laughing是他代表作,但希望見好收。

謝天華直認 Laughing是他代表作,但希望見好收。

Laughing最興側頭 45度角配單手插袋,一開口寸過碼頭咕喱;鏡頭後天華 chok神附體,謝天華變了謝囂華。對於被指人紅變囂,天華就說:「我有試過飄飄然,不過呢個階段已經過咗,家係享受成果嘅時候。你之前播嘅種子,開花結果得好靚,你梗係好開心,唔通黑口黑面對住人咩?我唔知道啲人點解會咁諗,我相信佢哋諗多咗。」
天華續說:「家做人同做戲成熟咗,自從 Laughing爆咗出嚟之後,有好多人會留意好細微嘅嘢,一發現就覺得好大件事,好似答問題答遲咗少少,啲人即刻覺得你好寸、好扮嘢。我成日提醒自己,呢個 moment對人要謙虛啲,唔好太過自我膨脹,唔好畀人好囂嘅感覺,因為一個角色嘅成功,唔係靠自己嘅力量,背後仲有好多人出力,唔可以將功勞攬晒上身。如果硬係要話我好寸好囂,硬係都加諸我身上,我冇辦法。」
一個 Laughing玩足兩年,天華也覺得這個角色有極大發展潛力,問他是否想長拍長有,他卻耍手擰頭說:「我梗係希望角色受歡迎,但某程度上都希望有啲嘢見好就收,我唔希望自己一手一腳建立嘅角色,有日會拍到殘、拍到爛晒而冇觀眾睇,我唔想去到呢個地步,所以有陣時都睇吓邊個時間係呢個角色,唔好話終結,係幾時可以留一個最燦爛、光輝嘅時刻畀觀眾。」天華心目中有否訂下時間表?他笑說:「冇,但係我相信唔會好似黃飛鴻或者包青天系列。」

Laughing形象深入民心,抽身洗底甚艱難,天華卻自信地說:「咁我又唔擔心,好似今年播嘅《魚躍在花見》嘅魚至囂,我盡量令觀眾睇嗰陣唔好有 Laughing嘅味道,如果觀眾睇到有 Laughing嘅味道,係我嘅失敗,但係佢哋覺得全新角色,就係我嘅成功。」提到 12月台慶頒獎禮,天華說:「我梗係希望《潛行》有咁嘅實力去競逐獎項,但真係要靠觀眾支持,越多觀眾支持,我咪越大信心。」

被法拉揼到痛

在《潛行》中,天華與陳法拉延續電影未了緣,他笑說:「由開播以來都會睇到啲 Laughing Sir同 Madam Jo(陳法拉)一啲好得意嘅關係位,今次同電影版嘅感情唔同,結局係點留番畀大家睇。」事實上 Laughing和 Madam Jo的對手戲幾好笑, Laughing拉小提琴奏《小明上廣州》、借甲蟲「囂士」玩法拉等,都能博君一粲,難怪天華推介的《潛行》場口,都與 Madam有關,「有場戲話法拉跳落海救我,佢真係好大力,喺個海度拖我上沙灘,跟住同我做急救,做心肺復蘇又好投入咁㩒落去,有幾下直頭聽到肋骨啲嘞嘞聲,之後佢見我唔醒,又一槌一槌打落我心口,雖然拍前有晒默契,叫佢放盡做,不過拍完之後真係好痛。」有高登女神錫錫, Laughing不知恨死幾多網民呀。

Laughing在《潛行狙擊》拉小提琴奏《小明上廣州》,令人驚喜。電視圖片

Laughing在《潛行狙擊》拉小提琴奏《小明上廣州》,令人驚喜。電視圖片

有高登女神陳法拉濕身攬攬,天華不知恨死幾多宅男。劇照

有高登女神陳法拉濕身攬攬,天華不知恨死幾多宅男。劇照

MC Jin:喺美國 dup dup哋

MC Jin由知名 rapper變電視劇綠葉,表面降 grade,實質賺到觀眾支持。攝影:陳俊強

MC Jin由知名 rapper變電視劇綠葉,表面降 grade,實質賺到觀眾支持。攝影:陳俊強

正如謝天華所講,霉到爛都試過,相比下 29歲的 MC Jin(歐陽靖),所謂的霉是小巫見大巫,最少他最潦倒時,都未至窮到冇飯開。 Jin在港發展 3年,在處男電視劇《潛行狙擊》中扮卧底探員蠟青,首次拍劇的他表現有點生硬,好彩具小聰明又有情義的蠟青角色夠可愛,加上有 Laughing帶住,總括都算討好。

自爆仰慕天華

MC Jin在《潛行》中扮 Laughing下屬蠟青,反應不俗。劇照

MC Jin在《潛行》中扮 Laughing下屬蠟青,反應不俗。劇照

有一幕蠟青意圖嗒妓女,到便利店買避孕袋卻撞正 Laughing,被他「的」上天台兜巴星,效果好盞, Jin憶起這幕也笑說:「嗰日係我第一日拍戲,我覺得每日拍戲都係上堂學嘢。其實套劇嘅故事同現實生活好相似,蠟青同 Laughing本來三唔識七, Laughing覺得蠟青呢條友仔寸寸貢,又適合做卧底,但蠟青唔 buy佢想揼佢,每一次報仇都唔成功都俾佢打,後來蠟青留意當冇人 buy佢嘅時候,唯一撐佢就係 Laughing,所以佢好撐 Laughing。現實生活相似嘅係,我同天華未合作前未係熟識,接觸佢時有個佢係上司我係下屬、一個大佬哥哥嘅感覺,我會睇大佬頭,大佬講 gag我咪講 gag,大佬好嚴肅拍緊嘢,我就唔好開口啦。」
不過天華和 Laughing都 chok, Jin笑說:「呢套劇深入民心,個個都嗌天華做 Laughing,忘記咗佢係謝天華,但我覺得有分別,我會睇到天華嘅一面,有 gag、有溫柔、有風度,當然 Laughing哥上身時無可否認係 chok嘅。」兩人拍對手戲時, Jin會否爆笑?「點會?唔知幾崇拜佢,幾仰慕佢,天華 chok得嚟係型。」
倒帶, 2001年 Jin是全美華裔最強 rapper,如今做電視劇配角,他不只沒 hard feeling,反而 enjoy, Jin豁然開朗事出有因。
Jin憶述說:「我 08年嚟香港時,因為之前我喺美國嘅黑人圈子鬥 rap贏咗,啲人誤會我喺美國風生水起,事實上 08年我喺美國 dup dup哋,我最 fit係 01到 05年,一出道啲媒體就話全球第一個華人 rap嘅,實會超勁,講到我飛晒天。佢哋抬我越高, 06年我跌落嚟真係應。」

太太陪過低潮

來港三年的 MC Jin嘗盡由天跌落地的滋味,不得不嘆句社會現實。

來港三年的 MC Jin嘗盡由天跌落地的滋味,不得不嘆句社會現實。

Jin續說:「之後嗰兩年最低潮,匿喺屋企唔想見人,同公司完咗合作,我由 20個 job變兩個 job,有啲旁觀者咪話呢條友原來冇料到,我當正係真。家睇番我有個體驗,呢個世界有幾現實,嗰一刻邊個喺旁邊鼓勵我?爸爸媽媽,仲有 Carol(太太),佢唔單止冇閃,反而會『你起身啦,醒啦!』用唔同方法鬧我、激我。呢個女仔陪我一齊經歷喜事、最低潮、最灰都有,係佢啦,所以我要儲錢買戒指。」
提到價值觀轉變, Jin說:「呢 3年無論工作同私人上,都 feel到向好方面改進。有人覺得我冇咗以前嘅控訴,冇咗團火,但我覺得我團火從未試過咁勁,只不過去咗第二個方向,我家追求唔係用 rap battle晒全宇宙嘅人,而係照顧屋企人。」