由李若彤、李麗珍等主演嘅《女人俱樂部》，噚晚終於喺長沙灣舉行煞科宴，監製曾志偉亦有到場，佢仲帶咗兩袋酒進場，大受歡迎，被一眾人拉住影合照。

志偉話：「今日係慰勞宴，我俾錢，冇公數，好滿意呢部劇，仲剪緊，好多方面都好好，李若彤佢哋又好耐冇見，成班後生女都ok，希望上到位啦，依家又係用人之際，未知幾時會上，應該暑期檔。」講到黃秋生都返嚟拍劇，係咪由志偉拉攏？志偉即話：「唔關我事，可能王晶搵。」

李若彤被問到係咪拍完一身鬆，佢話：「我不嬲都好輕鬆，依家要趕緊執屋換季，等自己多啲時間陪侄女。」

講到噚日係光棍節，佢就煞有介事咁話：「唔好問我呢樣野，我唔在意呢樣嘢。」佢表示若再拍劇的話會選擇合適嘅劇本，身邊亦有好多人問過佢呢個問題，反而電影方面內地就有人搵佢，但因為唔鐘意個角色，所以就推咗，另外一部內地劇亦覺得唔夠吸引而推咗。

問到係咪因為拍呢套劇同李麗珍傳不和而嚇怕咗佢，李若彤話：「我哋有是非咩？我自己都唔知。」講到佢因為坐埋一邊被指孤獨精，佢話:「咁我拍戲要靜啲，要集中精神，大家冇嘢，真係一頭霧水。」佢又透露今次拍劇只係飛咗三場紙仔，劇本基本上已OVER八成，休息時間亦有盡量配合，不過佢自爆曾試過得3個鐘睡眠休息，但就力撐ok，而佢就無意簽長約，反而部頭就會比較合適，覺得自由啲同配合自己性格，綁住會令佢唔開心，現時佢最想學溜冰，因為可以教侄女玩，佢笑言已當對方係自己個女一樣。

李若彤話自己拍戲要靜啲，集中精神。

呂慧儀同香香都有拍o架

成班女主角

果然係《女人俱樂部》，好多女人!