來自澳洲的梅施麗，60年代至80年代尾在無綫任職舞蹈組主管，由《歡樂今宵》到港姐各大型綜藝節目，也由梅施麗負責。當年所有殿堂級歌手如許冠傑、羅文、徐小鳳、譚詠麟和張學友等，幾乎全都跟梅施麗合作。至於天王郭富城、謝天華和著名排舞師Sunny Wong（黃國榮）等也是梅施麗的徒孫。而這位殿堂級排舞師，大前日（11日）於澳洲家鄉病逝，其夫Tim Williams前日在facebook向各方好友泣：「我很難過地跟大家說，Michelle已於昨日離世。和平地於睡夢中與世長辭，離世時Emma（女兒）、Zac與我一直在她身旁。」

當年深得梅施麗痛鍚的城城，目前在上海拍攝新片，他昨獲悉師祖離逝時深表難過，他透過微信說：「我知道呢個消息十分難過，我哋都尊稱梅施麗做阿嫲，佢對好多舞蹈藝員都好用心栽培，真係桃李滿門，佢堪稱舞蹈界嘅一代宗師。我當年人生第一次出門去外地表演，就係她負責排舞，佢好用心教我，亦教曉我乜嘢叫做舞蹈，乜嘢叫表演藝術。阿嫲喺每一個舞者心中，都係極傑出嘅藝術家。我好榮幸當年受過佢嚴格栽培，我永遠唔會忘記佢嘅教導，希望佢安息，我永遠都會懷念梅施麗。」

另一徒孫徒孫謝天華昨在電話中表示：「當年佢教我哋時好認真，一啲都唔惡，對我哋好好，真係好可惜。」而Sunny接獲消息時亦感到震驚難過，他昨說：「知佢健康唔係幾好，本來諗住今年初同師姐去澳洲探佢，但時間夾唔到。佢推動舞蹈界，為我哋爭取權利。記得1986年，加拿大博覽會，搵香港dancer代表香港做表演，佢搵咗我同Aaron（城城）過去兩、三個月。我哋都諗住幫阿嫲搞追悼會。」

至於許冠傑和小鳳姐的個唱也曾由梅施麗排舞，許冠傑昨說：「佢做事作風係非常之嚴謹，要求好高，佢最大貢獻係為舞蹈界培養好多新人才，我聽到佢嘅消息都非常惋惜同難過，希望佢安息。」小鳳昨則在電話說：「呢個真係唔係幾好嘅消息，佢係非常好㗎。以前演唱會佢做晒，佢幫我排舞好簡單，就係排我點樣唔好阻住佢哋！」

當年招攬梅施麗來港的蔡和平昨在電話中說：「佢好受人尊重，好本事，《歡樂今宵》好感謝佢，當年佢每晚排一個舞，後來歌星唱歌，佢又幫佢哋編排埋舞蹈。」前無綫監製曾國強昔日與梅施麗合作過不少港姐選美等大型活動，他昨慨嘆說：「係佢將modern dance帶入香港，60年代到70年代，香港人唔知乜嘢係modern dance，係佢開創歌星有舞蹈員伴舞呢個潮流，好巴閉。我同佢合作好多，好多時佢會幫我哋製作揀埋音樂，真係好可惜。」此外，露雲娜前晚於facebook留言悼念梅施麗，大讚她是一位極出色的舞蹈指導。