呢邊廂傳黃宗澤（Bosco）火速收回仿古車，馬上同楊崢斬纜，「姊弟戀」過唔到三個月試用期就玩完；那邊廂，前度胡杏兒喺微博玩嘢貼攬仔相玩死全世界，延續新歡舊愛「愛情劇本」，好有趣！雖然Bosco冇親證「分訊」，只係猛叫記者畀條生路行，但老友兼前輩苗僑偉（三哥）就爆料，坦承Bosco有向佢訴苦，至於內容係乜？三哥梗係口密啦，只係「醒」記者一句：「講來講去咪講果啲！」睇嚟Bosco真係俾有「趕客feel」嘅戀情煩死，分咗手有幾奇！

日前苗僑偉（三哥）、林峯、佘詩曼、梁烈唯、梁靖琪（Toby）喺新蒲崗工業區拍攝TVB新劇《使徒行者》外景，場口係講梁烈唯同抱住o靚仔嘅林峯逃離火場，而三哥同回復單身嘅梁靖琪就有場同車戲，外景現場人流唔算多，拍咗幾個鐘頭都係得三兩名粉絲路過要求影相「集郵」，所以打頭陣演出嘅苗僑偉、梁烈唯、梁靖琪樂得清閒。

林峯風騷派紅衫魚

新婚梁烈唯o氹細路玩，三哥就周圍搵人「吹水」，仲主動同記者打招呼，被問到老友黃宗澤煩爆戀情，他都戥Bosco無奈：「本身係一件開心嘅事，佢就搞成咁，仲乜要提人哋嘅舊事呢？真係慘啦，好戥佢不值！」至於Bosco有冇同佢「訴苦」？三哥冇否認，只爆咗句：「講來講去咪講果啲！」及至傍晚到林峯同阿佘歸位，Chok峯心情大靚，主動派紅底開工利是。阿佘同樣風騷，現場仲有師奶兵團送上禮物，阿佘回敬合照一張，大家禮尚往來。

苗僑偉在現場有Fans埋身索合照。

林峯抱小演員拍逃出火場戲。

梁烈唯和林峯輪流抱小演員。

見唯唯抱細路咁多人影，林峯又抱抱。