娛樂圈總有人愛無風起浪，三哥苗僑偉因有正經事忙，臨時辭演TVB新劇《點金勝手》，隨即被指是獲老死黃日華關照，拉攏過檔HKTV，聯手起TVB飛腳咁話，故事情節有板有眼，難免令當事人失笑，「合作好講緣份，你睇我同御藥堂就知，一拍六年，最緊要開心，我同無綫關係咁好，點會走？最近傾緊個部頭劇，預計明年初開工。」一句到尾，就是要大家咪再亂估，要轉會都明年先吹。

人人話三哥好正，04年回巢無綫拍劇冧死一眾師奶粉，由《學警》系列到早前的《好心作怪》都係收視保證，即係咁，55歲仍keep住型，拍埋班小生都唔會輸，咪講話師奶粉，我都冧啦。

自嘲跳舞白癡

三哥搭黃宗澤，觀眾受，無綫即食住個勢整部《點金勝手》，冷不防三哥臨陣退出，辭演唔玩，令《點》劇監製莊偉健要急改劇本應戰，就在此時，夾啱時間有人放風指三哥得老死黃日華帶摰過檔HKTV，還要寫定個「下把情仇」故事，令事情更添話題性。

問到過檔HKTV一事，三哥坦言未係時候，他說：「未諗呀，都未係時候，我同無綫仲未完約，今次係有點事要先處理，有時合作好講緣份的，你睇我同御藥堂就知，合作六年幾開心，最近個廣告你睇咗未？成個製作好認真，你知嘛，我係跳舞白癡，唔識跳，那天玩得好開心，其實做人最緊要開心，要識正面思考，我同無綫關係咁好，點會走呢？最近仲傾緊個部頭劇，預計明年初開工。」

自爆夜尿斷尾

事實上，55歲的三哥跟57歲的米雪恍如食了防腐劑，難怪被品牌推崇為鑽石健康大使，「55歲唔係好老啫，我份人好百厭，夜瞓又為食，間中又會飲吓酒，當然唔似志偉咁飲到不省人事，但身體都算幾好，可能係食了蟲草，做代言人有樣好，老闆會長期無限量提供，健康產品好講品質，佢哋仲要有大學臨牀及專業品質認證。我都keep住食了六年，以前要成日起身屙夜尿，依家唔使，我都有介紹畀黃日華和Bosco，分享吓囉。」

說到工作，三哥表示有意拍電影，「都要睇機緣，電影揀人時，我又揀吓電影，唔係話揀擇，電影電視愈多愈好?，但都要揀啱角色先去演，這些好講天時地利，我在這行咁多年，好多朋友都未合作過，應該仲會有好多火花。」

三哥55歲仍keep住型，拍埋班小生都唔會輸。