離開無綫半年的謝天華，很快已感受到自由的可貴，以往事事以金錢行先，不會有新挑戰，現在可追求前景、講理想，萬事有商量，人在無綫，看似走着，其實困在原地，天華承認說：「無綫對我好好，但我都冇令佢哋失望，大家互惠互利，冇話邊個欠邊個。」

天華去年6月底正式離開無綫，笑言正呼吸自由空氣中，談到為何要離開做了十多年的公司，他日前坦言：「覺得係時間轉換工作環境，拍來拍去變化唔大就要搵新嘢刺激，唔想停喺度，有人覺得好安逸生活或大樹遮陰，做乜要出嚟咁辛苦，我就鍾意挑戰自己，接觸新嘢，呢行梗想有突破嘅新角色，觀眾期待我哋畀新嘢佢，我都期待畀新嘢觀眾，唔想妥協咗一路拍到變甘草演員，拍到冇晒火，出去起碼有預料唔到嘅嘢，亦係好玩嘅地方。」短短半年，天華就感受到自由的好處：「有啲嘢自己想做，平啲冇所謂，但以前公司話咁平梗係唔接啦，就算角色幾好都係咁話，可能錯過機會，會影響以後發展，o依家角色、對手、錢都有得傾，分別喺呢度。」

■喜歡挑戰的謝天華，希望有突破新角色，不想妥協一路拍到做甘草演員，故選擇與無綫和平分手。

■天華前日結婚周年紀念，與太太Tina恩愛慶祝。微博圖片

「冇話邊個欠邊個」

天華形容跟無綫是和平分手，對方曾有誠意傾續約，只是條件談不攏，他承認被無綫合約綁死時確得到很多機會，但自己也有付出：「無綫畀好多機會令香港、內地觀眾識我，亦好在我把握到機會，否則好似劇集後嘅廣告快閃過，簽合約係願者上釣，冇人捉你手簽，唔可以怨人、簽咗又話苛刻，酬勞低全行都知，但機會真係多，睇你能否把握，我一入去唔係男主角，三線尾、四線頭角色，我唔係紅褲子，由低做起，亦從來冇怨，反而將嗰段時間當學嘢，壞人奸人賤人角色照做冇推過，人哋見你咁用心去做表現唔錯。至於無綫待我好唔好？簡單啲講，佢畀好多機會我，我亦冇令佢哋失望，大家互惠互利，冇話邊個欠邊個。」

■天華去年與一眾古惑仔兄弟舉行「歲月友情演唱會」。

天華由三線直上到一線，與無綫關係一直甜蜜蜜，直至09年「Laughing哥」跟視帝擦身而過，被指關係生變，問到離開跟落選視帝是否有關？天華笑說：「每年得一個視帝，又唔係我一個攞唔到，裏面有乜因素乜嘢準則，好多觀眾都知啦！年年同民意唔一樣，大家見怪不怪，做乜咁執着！唔通拉橫額抗議咩，就算失落獎項得到觀眾讚賞你嘅演出，咪贏番晒囉，呢啲係贏真正民意！攞過同冇攞過都知，總之難適應五時花六時變嘅候選規則，簡單啲講句，佢鍾意點咪點囉，你都冇say！」

■天華不排除拍港視劇，他視乎的是好劇本、好角色和好片酬。

不排除拍港視劇

轉做自由身，天華碰到好時機，有兩個新免費電視台，王維基的香港電視也有平台播放，天華也不排除拍港視劇集：「演員角度只考慮好劇本、好角色、好製作團隊、好對手同好片酬，唔會涉及政治，我拍過人哋，你將我拒諸門外都冇辦法，我只想拍觀眾想睇又滿足到自己嘅嘢，亦想香港嘅電視有新景象，可以吸引番年輕人睇番電視。」

只要劇本和對手等條件好，天華也會再替無綫拍劇，有張智霖例子，夠膽做義氣仔女？他說：「唔係義唔義氣，義氣食唔飽個肚，義氣佔有百分比，但有其他因素，唔通唔收錢拍完喺街執麵包碎食咩，你要食飯我都要，所以酬勞會擺到最後。」