因為天生愛冒險，謝天華毅然結束多年來與無綫的親生仔關係，嘗試呼吸另一國度的空氣；對於事業上這一趟新旅程，天華坦言：「心情好興奮，嗰種患得患失嘅感覺，好似去番初出道嘅時候，唔知嚟緊會發生乜事，好多未知之數會發生，我唔想錯過呢個機會而後悔，得同唔得都叫試過，一定要畀自己試吓。」

撰文：何慧斯

謝天華在無綫的告別作《神鎗狙擊》正在播映中，今次他飾演亦正亦邪的角色李浩揚，自從宣佈約滿無綫不續約後，坊間曾經為他的去留有不少揣測，正當大家以為他會泊大碼頭拓展事業之際，原來他先開設Laughing Workshop（拉風工作室）做老闆。

■對於事業上這一趟新旅程，愛冒險的謝天華坦言不想將來為錯過機會而後悔。攝影：陳慧安

失獎零挫敗

天華當年因為《學警狙擊》的Laughing哥角色走紅，雖然先後狙擊了不少電視和電影的演出機會，事業上的確名利雙收，可惜狙擊不到公司的獎項，亦有傳天華因此而離開。天華淡然地說：「大家睇咗咁多年啲頒獎禮，有時係同民意啱啱相反，呢個已經唔係好新鮮嘅事，啲觀眾已經見慣，民意高同呼聲高，公司未必覺得係，反而有另一種睇法。我自己覺得真係冇嘢，呢啲係遊戲規則。」

正所謂輸人唔輸陣，重提在前年台慶頒獎禮大熱倒灶後，翌日他與陳法拉齊齊出席活動，被追問落選的感受，真的替他們難受，天華卻堅稱：「冇事呀，當然係自己同自己講冇事，又唔係個天跌落嚟，又唔係世界末日，諗通咗呢點，快啲投入番個工作，我要話畀自己聽，呢啲嘢唔會影響我，我一定要撐番自己先，我唔會俾人睇到我一蹶不振個樣，呢樣嘢我自己都接受唔到，我相信有好多人樂意睇我呢個樣，所以我更加唔想畀佢哋預期去睇到呢樣嘢，我要話畀你聽，我好tough，可以即刻起番身面對所有嘢，我冇理由即刻謝晒㗎！」

■在告別作《神鎗狙擊》中，天華飾演亦正亦邪的李浩揚，他刻意加插動作令角色更型。劇照

■狙擊系列長拍長有，天華把握多年來每個演出機會。《潛行狙擊》劇照

言談間天華不禁說：「不過其實真係好諷刺，同一年裏面，就係呢個角色，我喺國內啲網站同電視台，已經攞咗四、五個獎。當國內有咁多觀眾接受、認同呢個角色嘅時候，惟獨係你自己嘅公司唔認同你，我覺得冇所謂，如果公司係有咁決定，好自然我都會有決定。」
事實上天華早期的《古惑仔》系列、《舞動奇跡》系列以及《狙擊》系列，的確為他的事業打開方便之門，他說：「我試過有啲30零歲嘅觀眾走埋嚟，同我講話細個睇過你嘅電影，佢哋講嘅應該係《古惑仔》時期，之後再俾內地觀眾認識，咪就係跳舞比賽，有啲人睇《古惑仔》電影嘅時候，完全唔知我識得跳舞，所以到我上去比賽，佢哋喺鏡頭面前，睇到原來以前個大天二跳舞跳到咁嘅樣，又多一份驚喜！呢幾個階段加埋，令到我覺得好似變咗一張可以入內地嘅車飛，如果呢張飛係得來不易嘅話，點解我唔好好去試吓？冇理由掟低唔理㗎？」他續說：「有樣嘢好公平，你嘅演技好與壞，會留喺觀眾腦海，唔會因為你攞咗好多個獎，啲演技就會出神入化，乜都好好睇。o依家我覺得轉咗去另一階段，如果唔攞張飛去試，到老咗一定會鬧自己，我唔想錯過呢個機會而後悔，得同唔得都叫試過，一定要畀自己試吓。」

■當年《古惑仔》系列中，天華飾演「大天二」一角入型入格。
《古惑仔2之猛龍過江》劇照

■天華在《舞動奇跡》的表現，令不少內地觀眾大為讚賞。資料圖片

摸索新範疇

天華稱明年才正式投入新工作，現在先享受假期，但他已很期待未來的工作，他興奮說：「心情好興奮，嗰種患得患失嘅感覺，好似去番初出道嘅時候，唔知嚟緊會發生乜事，好多未知之數會發生，呢個係娛樂圈最好玩嘅地方，所以好多人做咗走唔甩。我會當係上咗架帶你周圍去探險嘅車，希望喺呢架車度，撞到一個好導遊，帶我去遊歷，睇吓有冇啲新奇又好玩嘅嘢，最好梗係遇到啲以前未合作過嘅傑出電影人，等我又試吓另一種經歷。」他笑稱未有為今次遊歷定下時限：「千祈唔好俾呢樣去框住自己，我覺得係好儍。」

膽大包天

■天華坦言期待新工作的來臨，尤其那種患得患失的心情，令他有重拾初入行的感覺。

天華與太太Tina識於微時，雖然期間曾經有風波，但無損兩人的感情，對於今次外闖的決定，天華說：「我老婆成日都話我好大膽，乜都走去試，連街邊賣啲蟲都走去買嚟試食，基本上我有乜嘢決定佢都支持，如果我冇呢個膽去試，咪會原地坐番喺呢度，咪變咗人哋進步，你咪退步？始終國內市場仲未嘗試過，對我嚟講係一個新領域，香港做咗廿幾年咁多，想趁自己仲行得，咪繼續行。」

場地提供：別府九州地獄拉麵專門店（The ONE）

■天華憑「Laughing哥」狙擊到內地視帝，可惜狙擊不到無綫的獎項。
資料圖片

■天華與太太Tina識於微時，兩人一直互相扶持。資料圖片