新一屆港姐明晚踏上準決賽擂台，賽前已爆發攬仔豪放史、退選與錢銀糾紛等連串是非，但其實當選後才是EQ考試之始。身為港姐大師姐的李嘉欣自88年加冕起緋聞不絕，是非未有隨嫁給許晉亨而終結，婆媳不和、人工受孕追女與婚變新聞層出不窮，她只以笑面對，但想不到嘉欣一直以來未能生女，原來是因老公亨亨下了封肚令。

撰文：林嘉慈

李嘉欣誕下許建彤（Jayden Max）後，曾傳過她尋求人工受孕追女，嘉欣說她是有意再生B，但老公卻唱反調，她說：「我成日撩佢生，因為一個女人生BB有限期，限期將到，但我老公話諗都唔好諗！咁有次我見到一樣嘢，諗緊應唔應該買嘅時候，我突然同佢講：『唔好買呢樣嘢，我哋生個女好唔好？』佢話：『我情願送樣嘢畀你，你千祈唔好生呀！』」

■李嘉欣是香港小姐的幸福模範，美貌智慧集一身，事業家庭兩得意。攝影：葉君海

■嘉欣與許晉亨兩年前誕下愛子Jayden Max，組織三人家庭。資料圖片

放大亨亨優點

嘉欣覺得老公不是被囝囝嚇怕而要她封肚，責任感才是關鍵，她說：「係時間同精神，除非你唔理佢，好多男人覺得又唔使我生，又養得起咪生，但佢覺得負擔唔到，何必呢？有次去旅行，我小朋友唔要工人抱，淨係要爹哋媽咪抱，佢去到動物園冇行一步路，全程扭抱。大家庭好多都係我唔生，就搵多幾個同你生，如果佢push我，我會生。」

有時囝囝表哥到訪，令嘉欣發現兩個小朋友的威力好驚人，故意識到一個小JM已是他們能控制的極限，她說：「當然我有家姐係一件好事，但以前同o依家養一個小朋友，分別都幾大，demanding好多，同埋我覺得佢都算好彩，有個表哥同佢搶吓嘢，玩吓，變咗佢喺屋企唔會覺得個個聽晒佢講，自我中心得咁緊要。」

小JM出世也影響父母轉變，嘉欣說：「我冇咁任性，o依家考慮多啲人感受，同埋知道要努力達到一個開心家庭嘅目標，唔難做到，但呢個世界冇嘢係唔使經營，無限放大對方優點係好緊要，因為係長遠嘅關係。」老公的優點如是者被嘉欣無限放大，她說：「佢幾盡責做一個好好嘅爸爸，犧牲瞓覺時間，做你冇辦法想像佢會做嘅嘢，六點幾起身，帶佢去公園同坐普通交通工具，咁多年圍繞自己為中心嘅人，o依家變咗圍繞太太同小朋友生活。」

■嘉欣與Jayden相處時，即慈母上身，打扮隨意，投入親子生活。資料圖片

■嘉欣（右）說奶奶簡劍勳已到了人生化境，二人相處並無不和。資料圖片

擬送囝囝出國

嘉欣沒有催谷囝囝學習，她說：「我覺得講嘢流利啲就OK，唔需要佢係神童，睇佢長大，帶畀我開心，緊要過佢攞啲乜嘢兩歲半嘅冠軍。」香港教育制度與沸騰的社會戾氣，會否令她考慮送囝囝出國讀書？她說：「教育冇啱定唔啱，唔係死讀書，中文好緊要，香港學校一係偏重中文，一係變鬼仔，一路諗點取捨。邊個文化都有正面同負面影響，我做到嘅係畀佢喺冇乜壓力環境下長大，將來都係要自己面對，社會環境唔會就你，我覺得你應該有個堅韌度去唔同社會度搵到自己個位置。」

嘉欣現時很享受湊仔與一周運動五日的生活，遇到囝囝叫她不要見教練而離開他，已甜在心頭：「男仔好快唔黐媽咪，得兩歲幾先黐你。」問可有待囝囝長大就復出拍戲的心癮？她說：「冇呀，佢喺唔同階段都有唔同事情，戲我又拍過咁多喇，never say never，但我o依家睇唔到，先生唔支持，覺得咁辛苦，你諗都唔好諗呀！」

■嘉欣近日迷上了空中瑜伽，keep得一副完美好身形。

「奶奶明白我」

嘉欣婚後一直傳與奶奶不和，最近又鬧出隔絕嫲孫見面的傳聞，她說：「奶奶生我先生時仲大年紀過我生我個仔，佢好明白我，花邊新聞成日話我哋唔啱，但講真，唔啱就結唔到婚啦，佢見到囝囝係開心，但叫佢湊小朋友，無論精神上，體力上都未必支持到，佢自己嗰個都係工人湊啦，點會爭住湊？相處上，佢哋已經喺人生嘅化境嗰度，食得、飲得，生活又開心，冇乜話刻意點相處，做啲乜嘢，正常家庭食飯，如果我有日年紀大咗，我都希望見到所有人返嚟食飯，好平淡，但對佢哋講好緊要。」整個許家絲毫不受新聞影響，她再說：「爺爺嫲嫲o依家唔喺香港，佢哋鍾意視像，叫小朋友唱吓歌，小小生活細節，老人家已經開心。」

化妝：鎌田由美子of Shiseido
場地：French Window