粵劇界人手不足，向影視界挖角，重金禮聘了米雪演出。7月17日至24日，米雪將假新光戲院跟蓋鳴暉與吳美英合演，最新編撰的《相如追夢》，「米記」首次粉墨登場經已向難度挑戰，除了演「茂陵公主」外，有一幕還會露肉性感演出，加埋眼神向司馬相如挑逗；另外，又有場反串做美少年大唱「平喉」。對於起用新手擔大旗，蓋鳴暉話冇問題，還力讚米雪好聰明。採訪：方騫平　攝影：李權威

「米記」整造型當天，蓋鳴暉亦專程前往為米雪度歌，改到簡單易唱，大家都錫住米雪。未登場，經已得到公主待遇的米雪笑說：「唔錫唔得啦，我對粵劇有興趣，但未真正演出過，最多化過大戲妝做《歡樂滿東華》，但唔算正式演出，只係上過速成班，以往登台都唱過小曲嘅。」

蓋鳴暉睇好

米雪早已開始練習聲線，但未上台還未有緊張情緒，之前到加拿大旅行時巧遇白雪詩妹妹白雪紅，對方有教她造手，單單學了兩招已感受到非想像中容易。不過，師父對她充滿信心，最想搵個劇目由她反串演出。至於蓋鳴暉就話米雪有舞蹈底子，又做過《白蛇傳》，以她的聰明機智一定冇難度，唔怕被拖垮之餘，仲相信合作有火花。蓋鳴暉說：「米雪唔係科班出身，觀眾要求冇咁苛刻，最重要出嚟得到整體效果。」

米雪的番邦公主造型非常養眼。

上片子有多痛？請看看米雪的表情。

米雪曾與視帝黎耀祥合作。