葉璇近年北上發展，投資工作室拍內地劇賺人仔，專注工作，能幹的她更惹火，現年33歲的她坦言不恨嫁，也不急造人，原來她早已替自己計劃好，早前秘密到美國進行冷凍卵子，沒有變高齡產婦的後顧之憂，更可慢慢挑選理想伴侶。

葉璇先後被爆迷暈不少內地男星，連內地劇《鐵齒銅牙紀曉嵐》男主角張國立的兒子張默都收歸緋聞表，兩人合作內地劇《叫一聲媽媽》傳撻着，還被拍到同遊香港迪士尼樂園，其後葉璇自資開拍內地劇《第9個寡婦》，又被指跟同劇拍檔、有「國產宋承憲」之稱的李東學在片場表現親暱，對於緋聞，葉璇日前接受專訪時說：「都唔係真，我太忙，工作場合遇到嘅都唔啱，我身為老闆製片人，唔主張辦公室戀情，或者佢哋想同我交往，但我一定唔會接受。」

■33歲的葉璇早前低調到美國進行冷藏卵子手術，不會受年齡限制生BB。攝影：葉君海

「生幾多冇問題」

隨着閱歷多了，葉璇的擇偶條件都訂出新標準，她要求有三：「對方要有才華，有胸襟同有智慧。」除愛才也愛財嗎？她說：「唔使，擁有上面三個條件嘅男人都唔會窮得去邊。」單身的葉璇不缺異性約會，但礙於工作太忙而分身乏術，她說：「我信緣份未到，係嘅話我死都仆出去。」其實經營一段恒久愛情，未嘗不算終身事業？葉璇說：「當家庭係事業嚟經營，咁都係一生一世，但o依家好多人40歲就離婚，呢啲係太早結婚嘅後果，女方離婚要帶住小朋友生活，女人教好個老公就拱手畀咗人，所以我都係修心養性做好自己，再搵另一半都未遲。」

港女急於脫離剩女行列，33歲的葉璇卻大膽把結婚計劃延至50歲前，不怕做高齡產婦嗎？她心中有數說：「小朋友我唔會生，我前年花咗十幾萬人民幣喺美國雪咗卵子，即使我到80歲仲可以生。我知女人最好生理期係30歲到40歲，過咗就好難有BB。有時即使後生想生都唔係話生就有，何況o依家嘅人生活壓力大，最好係冷藏卵子，然後製造試管嬰兒或搵代母，咁樣生出嚟嘅小朋友一樣好優秀，我有咗呢個計劃就冇有怕，卵子數量好多，想生幾多都冇問題。」

修讀碩士課程

葉璇謂即使將來升呢做媽咪，都堅持事業和家庭維持平衡，她說：「好多父母會將仔女當成一切，我尊重佢哋咁嘅決定，但我覺得仔女唔係全部焦點，我愛錫佢哋，但一部份時間空間仍會留番畀自己。」葉璇暫時一邊工作，一邊修讀EMBA碩士課程，相當充實。

教港女揀老公

■葉璇表示要先專注事業，感情事順其自然。

■首次演出舞台劇的葉璇，重新學習演繹技巧，希望上台時可以表現理想。

葉璇最愛新挑戰，近日她被邀踏上大舞台，處女參演舞台劇《如此長江》，扮演歷史傳奇人物宋美齡，而資深男舞台劇演員辛偉強演劇中丈夫蔣介石。葉璇幽默說：「宋家三姊妹咁叻揀老公，港女真係要入場睇吓學嘢。」

舞台劇演繹技巧有別影視，即使葉璇99年選美入行，至今累積14年演藝經驗，但這次她需重新學習當中竅門，她說：「舞台劇講對白要用丹田同冇NG，我要記熟對白，由於呢套係有歷史成份，所以對白較長同難記。」葉璇表示首肯接演，主要是恩師潘嘉德力薦，她說：「我希望挑戰新嘢，喺藝術造詣上有提升。」

場地：TAPAGRIA（The One）
化妝：CoCo
髮型：Chris of IL Colpo
服裝：Paule Ka