天意弄人。米雪正值拍攝《女人最痛》之時，卻遇上自己一生中的最痛。今年 2月 16日，尹志強不幸病逝，米雪向劇組請假整理情緒，一天後旋即投入工作。
「當然我最痛就係親人離世，好似我男友離世。」但是再痛也得面對，米雪在《生命美學》一書中勉勵大家：「面對痛苦，所有老掉牙的人生觀和大道理都派不上場，好像被人摑一巴掌，你必然會痛，我們只可以接受這個痛，不能說堅強就不會痛。面對病痛、死亡也是一樣，流淚、擔憂是人之常情，但我們在痛苦中還可以保持樂觀。」——節錄自《生命美學》第四章：迎接疾苦
性格樂觀的米雪表示：「我會苦中作樂，忙中作樂。」叫人不要再為她擔心
米雪談起尹佬會自我安慰：「我覺得家佢好似喺度咁，只係去咗個好遠嘅地方。
工作填滿時間空間
在尹志強的惜別會上，米雪深深地向尹佬的遺照鞠躬告別，深情難捨盡在不言中
米雪續說：「唔知係咪我性格樂天，生老病死係人生必經，事情發生係有心理準備。二十幾歲嗰時爸爸過身，都未識諗傷心，到幾年前我媽媽唔喺度，都係好痛，細個就話要搵錢顧家，家乜都安定晒，想畀佢哋有好日子過，過吓天倫樂，點知好似冇機會咁！」
正當大家還擔心米雪的體力和精神是否撐得住，米雪便用身體語言告訴大家「我很好」，還衷心感謝各位同事關心，她說：「我知道同事錫我，我都唔想佢哋擔心，當大家見到我拍劇時嘅表現，就知道我唔會有事，亦唔會擔心我有事，拍吓膊頭同問候一句，其實已經明白。」
米雪還理性地、勇敢地面對傷痛：「就算我留喺屋企，休息一個禮拜，咁又點？之後我唔會停止傷心，過幾日我都係要面對，咁點解我唔返回自己工作崗位？第一，工作可以填滿我嘅時間同思想空間；第二，我想盡快完成工作，對我嚟講休息一日已經夠！」
「我好樂觀容易適應」
尹佬跟米雪相戀多年，兩人互相信任關懷，只欠形式上的一紙婚書
此時此刻，工作的而且確是良藥，除了暫忘傷痛，遵守作為演員的專業精神對她來說同樣重要，她說：「私事同工作唔可以放埋一齊，我盡量唔想麻煩人，我一個人休息，好多人要等我，其他同事都會有工作等住做，人哋係冇責任分擔你嘅問題，好似有人遲到，要成班人等咪唔好囉！總之盡量唔好麻煩人。」雖然米雪心仍在痛，但還能顧己及人，確實令人欽佩。
人非草木，表面的堅強，其實掩飾不了內心的軟弱。米雪只會在不影響其他人的情況下獨自悲傷：「我個人好樂觀，喺佢（尹佬）走之前，我哋已經有共識，佢只係要我開心，所以佢唔會擔心我，因為佢知道我會好易適應。」
米雪嘗試用不同的角度去解釋尹佬的離開，希望能令自己釋懷，她說：「其實我覺得家佢好似喺度咁，只係去咗個好遠嘅地方，以前我哋兩個相處方式都好自由，好似我會去一個月拍戲，會打電話畀佢，有個心就得，咁佢又好忙，我又好忙，我哋嘅性格就係咁，所以結婚對我哋嚟講只係形式，一紙婚書對我哋係冇意思。我哋又唔係要小朋友，又唔係要分身家，兩個人一齊要對方開心，我哋就係鍾意呢種生活，佢知我好忙，所以佢一啲都唔擔心我。」
擬開公司助失業人<
死者已矣，在世的人應該積極面對人生，開開心心的活下去。米雪繼續努力工作，用工作填滿所有空間，對於感情，她只會聽天由命，她說：「家都唔會諗呢樣嘢，都係順其自然，聽天由命。家我唔需要呢啲嘢，我最鍾意就係做嘢，我好鍾意工作，雖然好多時好忙，忙到冇時間休息，我仍然好 enjoy，我會苦中作樂，忙中作樂。」
除了拍戲賺錢，米雪不停做義工、做善事，她說：「我都好想開公司，做環保，環保再用物件或者工人，一啲冇人用嘅嘢回收再轉贈畀人，冇嘢做嘅人，可以培訓再用，總之幫到人嘅事我都好想做。」米雪真的教人佩服，她從不打算帶着傷痛沉溺，相信積極正面的人生態度，才可以活得精采。米雪身上發出的正能量，正要告訴大家，痛，請不要害怕，只要勇敢面對，一定可以衝得過去。
重現經典：穿越古今不老之雪
米雪自 1976年以《射鵰英雄傳》打響名堂，成為香港電視史上第一代俏黃蓉，時至今日她還可以穿上古裝扮黃蓉與朱茵鬥嬌俏，超越 30年艷光不減，不得不相信，心美的連外表也會越看越美。
第一代黃蓉 1976年
佳藝電視的鎮台之作《射鵰英雄傳》，每晚聽見「絕招，好武功，十八掌一出力可降龍……」人人爭睇俏米雪戲弄大懵白彪。
俠女顯柔情 1981年
《大俠霍元甲》霍元甲是傳奇，男主角黃元申也是傳奇，要看米雪和黃元申的好戲，只有翻煲劇集，才可以重溫舊情。
小青登舞台 1982年
經典舞台劇《白蛇傳》，羅文演多情許仙，汪明荃飾白素貞，雖然小青並非第一女主角，但嬌俏可親的米雪依然搶鏡。
一后配兩王 1996年
亞視邀得謝賢拍《千王之王重出江湖》惡鬥劉松仁，當然要找一個美艷如米雪的女主角，才能為他們的激鬥火上加油。
警花鬥小花 2003年
客串演《龍咁威》扮師姐，站在鄧麗欣隔籬，米雪英姿煥發，絕不比小花遜色，而且眼神凌厲，倍顯威嚴。
重遇舊拍檔 2008年
米雪憑《家好月圓》榮登視后寶座， 30年前舊拍檔白彪任頒獎嘉賓時，驚嘆不老黃蓉，風采更勝當年。
黃蓉爭仔戰 2010年
米雪和朱茵分別在 76年和 94年扮演黃蓉，兩代黃蓉日前在內地節目中再披戰衣爭郭靖，各具美態。
戲裏戲外承受百樣痛
戲裏戲外米雪要投入不同種類的痛，壓力不是一般人可以想像，尹佬過身時，她要接受摯愛離世的痛，同時又要投入《女人最痛》角色，感受女強人汪海鯨高齡產婦失婚之痛。
米雪扮演女強人汪海鯨，在事業搏殺期懷孕，身邊的作戰夥伴，也不知這個消息是喜還是憂
汪海鯨高齡懷孕壓力已經不輕，還發現摯愛的丈夫感情出軌，怎叫她不心痛神傷
高齡懷孕夫有外遇
米雪飾演的汪海鯨，是國際化妝及護膚品牌的高級品牌經理，一人之下萬人之上的女強人，有家財千萬的老公（林嘉華飾），還於事業高峯期懷孕，本來萬千寵愛在一身，可惜同樣天意弄人，米雪說：「所以話唔同時間有唔同需要，戲入面係做女強人，兩公婆事業有成，後生嗰時協議唔要小朋友，到年紀大又有唔同諗法，於是博老命去生，大住個肚先發現自己老公有外遇，仲要面對離婚問題，幾重打擊，呢個角色同時間要接受多種痛，真係幾難受，其實呢個角色反映家嘅社會問題，好多時女性遇到問題，都唔肯同人講，有困難都會死忍，而家庭破裂對於女人嚟講就係最痛。」