李克勤歡迎亞視藝人參加遊戲
[13:55] 2012/11/28

由歌手李克勤主持的TVB遊戲節目《決戰一分鐘》首播收視高開，平均30點，暫時成為今年遊戲節目收視之冠，更成為過去3年周日同時段首播收視最高的遊戲節目。

有見及此，TVB亦迅速為這節目舉行祝捷，克勤昨晚出席活動時表示感謝觀眾支持：「我初初諗住有28點都幾好，冇諗過會有3字頭，好開心，不過我攝製組都預計到遊戲係大細都想睇，會追、會玩，我諗住觀眾會睇完先玩，點知大家在廣告時段已經玩緊，香港人真係快。」他希望不同類型的觀眾都能參與：「家庭主婦、司機、按摩師都得，各行各業都可以玩。（亞視藝人都有得玩？）已經去到亞視？多謝多謝，觀迎參加。」

李克勤噚晚喺電視城出席《決戰一分鐘》嘅祝捷儀式，節目喺25號首播，收視高開，平均30點，觀眾人數192萬；最高係31點，觀眾人數197萬。

克勤話冇諗過首播會有咁好收視：「真係要多謝觀眾，我哋都冇諗過呢個成績，只係預計有28點收視。對我自己嚟講已經過咗關，任務完成咗大半，對人工有交代。」

喺節目裡面，好多網民同觀眾都疑問「蘋果疊羅漢」呢個遊戲究竟玩唔玩到，克勤就話：「係可以做得到嘅，基本上好多遊戲我都試玩過，10萬蚊樓下嘅遊戲唔難玩，我有信心就算我自己玩，都可以攞到7至8萬蚊走。」

克勤又話﹕「我依家強烈呼籲嗰啲家庭主婦、的士司機大佬呀，希望玩嘅人變化可以多啲，真係各行各業都可以玩。」