紀念晚會續章 阿梅錫錫 哥迷瘋狂
今日喺紅館舉行嘅《繼續寵愛·十年·音樂會》舉行第二晚演出，噚晚台前擺咗18張VIP枱，不過今日已經唔見晒。是夜雖然冇演藝人上台演出，但仍然坐無虛席。
紀念音樂會甫開始，全場起身默哀一分鐘，悼念哥哥。是夜由李浩林同陳貝兒擔任司儀，甫開始即重播噚晚陳淑芬所指嘅嗰個「謎的聲音」，即平地一聲雷嗰一段；緊接再播哥哥由細到大嘅相，配以《最愛》一曲，歌迷掌聲不絕。
緊接播出黎小田嘅預先錄影嘅片段，佢話:「佢好blue blood，好貴族，因為英國讀書英文好好，好有品味，第一次見佢好靚仔五官精緻。18、9歲返嚟唱首英文歌，好fresh。」
之後現場播出《少女心事》、《第一次》、《Monica》、《Stand up》等MV。歌迷又叫又唱又拍手。特別係播大頭時，fans更加大叫。到播出《為你鍾情》MV，有哥哥同梅艷芳錫錫片段，哥迷更是反應熱烈。
《為你鍾情》(影片截圖)
《為你鍾情》哥哥阿梅錫錫片段，現場歌迷見狀為之瘋狂。(影片截圖)
林夕：佢知創作最大境界 係冇性別存在
播完一連串MV後，大會播出顧嘉煇錄影片段，佢話：「佢走咗10年，每次聽《當年情》都諗起佢，多謝佢唱呢首歌唱得咁好。」緊接嘅林夕就話：「Leslie係造物者嘅光榮，佢好執著，又好包容，同佢合作要小心，但又好放心………佢話我知乜嘢叫『信任的珍貴』，聲音入邊有演技，可以係寧采臣、程蝶衣，可以係著高踭鞋長髮中性形象。佢大家知創作最大境界冇性別存在。」一語即畢，緊接即播出哥哥MV《左右手》。
林夕續說：「原來佢嘅造手、造型、個人學養，舉手投足，都可以係音樂。聽佢唱片，可以清楚搵到『張國榮』三個字。佢講明事物可以消失，事件先係永遠存在，佢留畀香港流行樂壇好多重要財富。」
《左右手》MV(影片截圖)
《霸王別姬》程蝶衣﹕「我本是女嬌娥，又不是男兒郎……」
華仔憶哥哥 南華會最後見面
林夕懷念完哥哥之後，輪到播出劉德華嘅錄影片段，佢話:「唔係大家問起，唔覺佢走咗十年。人哋話畀我知時，好突然。佢走之前，我喺南華會打保齡，佢打羽毛球，仲有見過面。」
華仔續說:「哥哥喺演唱成日送《月亮代表我的心》畀媽咪同唐生(唐鶴德)，都好影響自己日後演唱會唱歌，佢0依家喺另一個地方，都想我哋開心，因為佢都係一個自己會尋開心嘅人。」
劉德華﹕「佢0依家喺另一個地方，都想我哋開心…。」(劇照)
《新上海灘》
左起﹕劉德華、張國榮、陳慧琳，同剛剛開始發力嘅楊千嬅。
哥哥說：呢個moment，我係你朋友
夏永康(小圖)最近為哥哥出寫真，左圖早已曝光，右圖為夏永康噚日放上互聯網。
至於初戀情人毛舜筠，亦於今晚錄影片段懷念哥哥，佢話：「哥哥佢每拍一套電影，都同我講呢部最好，佢連搬屋都係咁；又鍾意裝修，每搬一次都話最好，我同所有人一樣仍然好掛住你。」畫面上見到毛毛語畢即眼紅紅；緊接的鍾楚紅亦謂：「《日落巴黎》(無綫音樂電影)係哥哥親自邀請我拍，佢話想我做女朋友，巴黎係我哋鍾意嘅地方，又靚又浪漫。」
至於最近為哥哥出寫真集嘅夏永康，亦有錄影片段：「佢每分每秒都係一個明星，影寫真時敲門，開門已好有魅力，係一個明星。哥哥連用乜嘢紙都想知，佢成日話自己都係一個artist，好尊重攝影同藝術。
「有次去書店，門口好多歌迷，佢幫我買咖啡，我話唔好啦，你係一個star。哥哥話：『呢個moment，我係你朋友，我幫你買咖啡。』佢係一個star但可以咁close，佢係一個人。」
至於張艾嘉念及與哥哥的友情，亦謂:「好朋友就係好朋友，我覺得佢冇離開過。我哋朋友開party，覺得佢仍然喺度，當喺心中有份量，係永遠唔會離開。哥哥好奇怪，唔止有美麗面孔，仲有美麗嘅心。」此時舞台升起一張導演椅，video wall播出哥哥首部執導短片《煙飛煙滅》片段。
哥哥話﹕「呢個moment，我係你朋友。」
《煙飛煙滅》
《煙飛煙滅》
唐唐電台點播《你在何地》念哥哥
哥哥張國榮生前摯愛唐鶴德十年以來，在哥哥死忌正日（4月1日）均選擇一人靜過，但今晚鮮有地神秘現身紅館，與萬人「哥迷」參加紀念會，一改以往閉關的慣例。唐唐為表達對哥哥的愛意，下午更首度公開悼念摯愛，在DJ雲妮主持的電台節目中私人點播《你在何地》送給哥哥。透過歌詞「從今方知 是多麼愛你 思想早已與你一起」向天上哥哥再次示愛。唐唐亦代表哥哥點歌送給哥迷，他開腔說：「我想用《共同渡過》呢首歌送畀Leslie所有朋友同歌迷。」希望天上的哥哥會收到唐唐為他而點播兩首歌。
唐唐再度現身 三鞠躬致謝
唐唐方才現身哥哥紀念音樂會，並上台拖實陳淑芬三鞠躬致謝。
今晚於紅館舉行嘅《繼續寵愛?十年?音樂會》續章，於尾聲時段，播出了陳淑芬嘅聲帶。陳淑芬話﹕
「你最唔放心嘅Daffy(唐唐)，佢依家好好，佢好勇敢咁出席紀念展同音樂會，代表你接受歌迷嘅心意。你放心享受你嘅悠長假期，你得閒就發個訊息俾我，我忙完所有嘢，就會嚟join你。」
說畢，陳淑芬就拖著唐唐出場，向全場觀眾三鞠躬致謝，唐唐更不停向台下揮手，全場拍掌。之後唐唐由後門離開，未有受訪。
