一年一度的選美盛事《2013香港小姐競選》準決賽及決賽將於8月25日及9月1日舉行。時光飛逝，不經不覺二十位佳麗一起經歷了一段日子，相信她們之間一定建立了深厚的友誼。於今日較早前，大會舉行了「友誼小姐互選」活動，並由陸浩明(六號)擔任大活動司儀，讓一眾佳麗投選她們心中的友誼小姐。大會還邀請了2012年度香港小姐冠軍及國際親善小姐張名雅小姐擔任活動嘉賓。經過佳麗們即場投票，最後由張名雅小姐宣布13號歐陽巧瑩奪得今屆「友誼小姐」這項殊榮，而獎座將於8月26日準決賽當天頒發。
歐陽巧瑩奪友誼小姐 蔡思貝突然喊爆：佢受咗好多苦！
無綫《2013香港小姐競選》將於今個星期日舉行準決賽，20位候選佳麗今日喺電視城入面投票選出友誼小姐，結果由是非纏身嘅13號歐陽巧瑩奪得，企喺後排嘅15號蔡思貝同5號朱智賢就突然泣不成聲，搞到唔少佳麗亦被感染，令在場人士嚇親。
事後眼紅紅嘅蔡思貝解釋：「我真係戥佢開心，我覺得佢受咗好多苦。」又突然再度嚎哭，令訪問一度要中斷，冷靜過後，佢再話：「我覺得啲報道好似針對佢，世界好殘酷。」問到佢有冇因此而唔入娛樂圈?佢話：「如果有機會我都會試，不過睇吓條路會係點樣，如果做人頂天立地，我冇乜嘢要心理準備。」
同樣有喊嘅5號朱智賢就話：「佢真係我揀嗰個，佢好為大家，好主動去幫我哋，而且我好唔捨得，我哋又唔可以一齊！」莫非因為拎親友誼小姐嘅佳麗，大多數會落選，所以唔捨得？佢話：「贏同輸都會分開嘛，以後好難20個女仔走埋一齊，而且我哋亦經歷過好多嘢，所以諗起都會唔捨得。」
《2013香港小姐競選》友誼小姐得主歐陽巧瑩
投票時蔡思貝好好哋。
大合照
最後由是非佳麗歐陽巧瑩奪得。
喊，原來女人真係會傳染。
嗚嗚嗚….
蔡思貝仲要做做下訪問又喊。
朱智賢喊到走晒樣
選完都可以見面o架嘛，傻豬嚟嘅。
人生有個真正朋友~的確好~極~
歐陽巧瑩見到班佳麗為自己而喊，應該會心頭一暖。
歐陽巧瑩否認13歲失身：嗰陣冇人對我有興趣
今日一班準港姐喺電視城內投票選出友誼小姐，結果由是非纏身嘅13號歐陽巧瑩奪得，但15號蔡思貝同5號朱智賢突然喊爆，分別話歐陽巧瑩「受咗好多苦」同好唔捨得佢喎。
而攞獎嘅歐陽巧瑩就反而好冷靜，佢話係因為呢想整花個妝而忍住眼淚，對於有佳麗戥佢慘，佢話：「我唔覺得自己慘，亦都唔驚，我又冇做錯事，有啲野我都覺得好荒謬，無中生有，睇到我都唔識點回應。」
講到有報道話佢13歲失身， 歐陽巧瑩就話：「呢個又係一件好恐怖嘅事，我媽咪睇完之後都即刻打電話畀我，係完全冇咁嘅事，嗰陣我一啲都唔靚，唔會有人對我有興趣。」問到佢對報料者身份係咪心裏有數，佢就話：「我諗唔會好多人，但係唔會特登去諗，我人緣唔差，不過我相信生活咗20年，唔多唔少都會得罪人。」
歐陽巧瑩被一眾佳麗票選成為友誼小姐。