《2015香港小姐競選》進行第二輪面試，40位覆試佳麗於電視城進行面試會見傳媒，不少極品及騎呢參加者均被叮出局，全場焦點就落在十優狀元、劍橋大學法律系靚女麥明詩（Louisa）身上，這位高材生未入圍已被起底，更被封為女神扣上「光環」，之前有指她壓力大到喊，今日她亦不諱言：「是有點壓力！」亦可能因為壓力，Louisa狀態稍為下跌。

不少明星臉也成功進入複試，包括「翻版陳加玲」Celine ，「翻版朱晨麗」Kristi、「少女版林嘉欣」Iris、「翻版龔嘉欣」Gloria、 「翻版楊洛婷」Mandy 等。上次谷胸的Celine今次卻玩清純，染了一頭黑髮兼封胸；Mandy就繼續騷腰晒健康性感。被指整容雙嬌的「G奶官恩娜」Judy及間尺鼻的Ashley也有現身面試。

「谷胸心悠」Celine，今日以黑髮示人，兼且收起「胸器」。之不過面試完結後，Celine竟在下午五時多突然在Facebook宣布退出比賽：「因為私人原因，未能繼續參加比賽。雖然感到可惜，但都好多謝大家一直以黎既（嘅）支持。」

複試挑選十六位佳麗參賽，佳麗會以泳裝及便服見評判。無綫高層余詠珊接受訪問時，表示會金睛火眼挑選佳麗：「今年佳麗有一樣特色就係身材好，有四、五位佳麗身材好好，可能今年係歷屆最好身材一年。（會唔會造假？）入圍會check吓佢哋有冇造假。」

講到「十優狀元」麥明詩是否必定入圍？余詠珊說：「同佢傾過偈，佢對答好得體，但係啱啱先開始選，唔好畀咁大壓力所謂嘅熱門人選，對佢哋唔係好事，比賽好長遠，要鬥耐力、體力、意志力。」余詠珊透露決賽前會舉行一次淘汰賽，形式仍在構思中。