丁樂鍶靠實力唔賣波地

丁樂鍶（Janice）曾是「味之天使」中的腸粉，她最近與黃浩然合作拍攝護膚品廣告後，開始為人熟悉，又因張栢芝曾拍同一品牌廣告而被封「栢芝師妹」，不過Janice卻未感壓力：「我冇諗過同栢芝比較，希望有自己嘅形象，令人記得我係邊個！」

此外，曾出寫真的Janice坦言未有計劃再出寫真：「就算有都係Sell青春，雖然依家有好多女仔都靠性感路線上位，但我想靠實力獲得觀眾認同！」她表示除拍劇外，更報讀司儀課程希望投身司儀界，實行多線發展。

不怕捱苦的Janice認同多勞多得。

首次拍廣告的Janice表示獲益良多。

樂瞳俘虜宅男勁吸金

無綫藝員樂瞳因在劇集《點解阿Sir係阿Sir》飾演反叛學生妹，火速「升呢」，更成為新任「宅男女神」，其微博粉絲人數亦急升，而她近日更是工作不斷，成功吸金，她說：「依家每日起身有工開，已經覺得好開心，之前經歷過冇嘢做嘅日子，好頹同好迷失，依家多咗好多Job，收入亦多咗，但未正式計搵咗幾多。」問到會否擔心劇集播完後被打回原形？她說：「唔擔心嘅，嚟緊仲有劇集未播，最緊要保持曝光率。」

事業發展不俗，但感情生活依然空白，她渴望真命天子快點出現。談到擇偶條件，她坦言要有上進心、思想成熟，不需要很有錢，問到會否揀圈中人？她明顯抗拒：「千祈唔好，我妒忌心重，怕男友拍Kiss戲會呷醋同唔開心。」而樂瞳與《點》劇的「K4」三名男生朱敏瀚、羅鈞滿和黃得生朝夕相對，但居然沒有過電，她笑說：「佢哋當我『兄弟』，（揀朱敏瀚？）唔得，佢太嫩口。」

服裝：Collect Point　場地：gi+

樂瞳坦言妒忌心重，不會與圈內人拍拖。

樂瞳飾演反叛學生妹上位，工作量急增。

反叛學生哥Chok爆晒肌

無綫新進男藝員羅鈞滿（Moon）、黃得生（Dickson）及楊潮凱，因在劇集飾演反叛學生哥「升呢」，日前三子「港男」上身，齊齊掀開上衣鬥晒腹肌騷Quali，肌誘女生！

無綫男藝員羅鈞滿、黃得生和楊潮凱，因在劇集《點解阿Sir係阿Sir》飾演反叛學生而為人熟悉，他們與陳豪、楊怡和鍾嘉欣等合作愉快，又與新任「宅男女神」樂瞳老友鬼鬼。三個大細路因拍劇而成為老友，閒時愛踢波吹水聯誼，拍照當天還「港男」上身，掀開上衣擺出Chok爆甫士，兼且鬥晒腹肌騷Quali，場面搞笑。

不擔心被定型

三子不諱言希望《點》劇可以開拍續集，Moon說：「當然想開拍續集，不過最緊要班底喺番度，可以係一個新故事，帶畀觀眾新鮮感。」三子最近與師姐胡定欣合作新劇《拳王》，劇中三人飾演蠱惑仔，會有吸煙及打架戲份，問到是否突破形象？楊潮凱說：「本身我哋唔食煙，所以拍嗰陣都有啲辛苦，但算係一個突破。（上癮？）唔會啦！本身都唔鍾意食。」

接連演反叛及蠱惑仔角色，問到會否擔心被定型？Dickson說：「唔會，我哋都演過其他角色，做演員最緊要試唔同角色，咁樣先有進步。」Moon說：「我仲想演奸角呀！因為好有發揮。」

楊潮凱（左起）、黃得生及羅鈞滿攬埋一舊。

羅鈞滿（左起）、楊潮凱及黃得生「港男」上身，掀起上衣晒腹肌。

羅鈞滿於去年贏得無綫台慶百萬獎金和獎品，他表示仍未用晒。

陳偉洪視吳卓羲為目標

在《點解阿Sir是阿Sir》中飾演「蔣進」的陳偉洪，是09年港男少年組冠軍，廿歲的他身高6呎兼擁有40吋胸肌，小時候他十分瘦弱，到中四因為愛打籃球唔夠人撞，才開始練肌肉！

陳偉洪手瓜起墊，做引體上升可謂「easy執」。

最近陳偉洪連接《回到三國》、《ATF反恐》及《潛行狙擊》多套劇集，全部需要大量體能勞動，日日拍到周身汗，早前終不慎病倒。他視吳卓羲為奮鬥目標：「覺得佢黑黑實實又靚仔。（似佢咁多緋聞？）唔敢，暫時都係專心做嘢啦！」