噚晚7點至11點全城罷睇電視，以表達市民對政府黑箱作業之不滿。好喇，噚晚大家嘅fb都被一個個黑箱洗版——當中好多仲係喵星人或狗狗相，甚至樣衰阿闊都有。個個擋住喺黑箱前面，目的只有一個，就係唔俾你開電視。

好喇，一覺瞓醒，究竟噚晚全城熄電視對無綫收視有冇影響呢？有。有冇跌到單位數甚至0收視，好似電影《精裝追女仔2》咁呢？唔好充意思，冇。不過講明先，呢個收視，係對比番上個禮拜三，即係10月23日來比，而唔係同前日(29號)嚟比。點解？同女性生理周期一樣，無綫逢周三收視就會差少少。因為，呢日跑馬呀嘛。無綫官方收視表下面有一句：「注釋:每一收視點:64,200，根據過往收視報告，每逢周三夜馬賽事，收視會較平日稍低(約2至3點)。」對比番前周，周二、周三及周四收視率，以《巨輪》為例，前周二同四、8點半至8點45分時段，都比星期三同一時段高1點。不管你是否接受呢個解釋，最重要還是廣告商接受。

睇番噚晚TVB收視，7:30至11:00收視如下:

7:30PM《東張西望》平均17點(約109萬人次收看)
8:00PM《愛‧回家》平均21點(約135萬人次收看)
8:30PM《巨輪》平均24點(約154萬人次收看)
9:30PM《法外風雲》平均24點(約154萬人次收看)
10:30PM《最佳女主角》平均18點(約116萬人次收看)