《求愛大作戰》盛男出戰KO港女

無綫去年播出《盛女愛作戰》,熱玩真人騷,收視旺場,全城追看盛女下場,無綫今年乘勢添食製作盛男版《求愛大作戰》,打算下個月10日出街,連播三星期,相信又會掀起熱爆話題。上次《盛女》得5名參賽者,最終排骨盛女Suki成功降服媾女王Zion,佢哋拍咗年幾拖,感情幾穩定,日前仲影到佢哋十指緊扣睇戲。

《求愛》繼續由《盛女》嘅編導岑應操刀,佢呢次搵咗8個參賽者,佢哋由20幾歲到40歲,個個有專業資格,條件唔錯,衰在冇時間同冇橋媾女,所以節目中再搵人生教練向佢哋過招。


■《求愛大作戰》嘅參賽者Rocky(左)同Cyrus最鍾意做gym操弗身形。互聯網圖片


■Rocky(左二)、Cyrus(右)同埋今次嘅評判、堪輿師陳定邦(左)一齊出征,大冧女觀眾。互聯網圖片


■《求愛》將會喺下個月10日播出,今次參賽者條件都唔錯。


■排骨盛女Suki同男友Zion拍拖年幾,兩人仍如膠似漆。資料圖片

無綫送機票

據知除咗將盛男進行地獄式大改造,仲會安排佢哋同8位港女speed dating,盛男有權KO佢哋,最終8盛男爭同4港女配對。今次盛男進取好多,唔止一個成功脫離剩男行列,無綫仲大手筆送上機票,等佢哋可以甜蜜出埠旅行,增進感情。

《盛女》事後被爆做媒,無綫否認,呢次盛男有幾名參賽者Rocky、Guy、Cyrus、Chris同Alan等,外在條件唔差,參賽者喺節目出街必定又俾人大起底,好快就知佢哋係咪做媒。好多參賽者都喺facebook貼咗自己嘅拍攝花絮,連岑應都忍唔住貼咗佢同最受速配港女歡迎嘅Rocky合照,佢仲留言:「Rocky BB,I am so proud of u。」如果呢班盛男可以再幫節目吸收視,岑應絕對要為佢哋而驕傲。