「(火羅)Sir」陳豪至筍悶蛋

「視帝」陳豪生活幾乎只有拍戲及咖啡，他自認超級大悶蛋，但偏偏這位劇中的「火羅Sir」成為女星爭住吼的筍盤；樂瞳捨玉女形象，演寸嘴學生妹「中女」反而出位，搶登宅男女神寶座！

陳豪（Moses）與廖碧兒六年情告終，隨即升格做城中「筍盤」，無綫一線到七線花旦都爭住吼，可惜在巿場不到三個月，筍盤王已告封盤，被陳茵媺捷足先登！

陳豪被指是「唐僧肉」個個想嗒，他即使出招牌笑聲否認：「實在太抬舉喇！你話點收科吖？哈哈哈！」他又自認悶蛋，謙虛地說：「我唔係筍盤，只係普通Mo（Moses），仲係一名超級大悶蛋，平日生活單調，生命只有拍戲同咖啡，真係諗唔到自己有乜特別地方吸引女仔，可能傳媒太錫我，將我嘅形象提升得太好。」

玩人格分裂

陳豪自認是個怪人，具備多重性格，有時連自己也摸不透，他笑說：「我份人好沉默，但有時又玩得好癲，又Cool、又傻、又動、又靜、又成熟、又幼稚……講出嚟都尷尬。」生得高大威猛，難以想像昂藏六尺的大男人竟然會怕女人，陳豪每次提起緋聞女友或與索模合照，都會臉紅耳赤，他說：「係囉！真係好易面紅，其實我都係Model出身，應該習慣晒，仲要一副溝女格咁款，但實情我怕醜到死，都唔知自己想點！」

對於陳芷菁曾大爆被陳豪拒吻，令心靈大受打擊，他直言有時傷透異性心亦不自知：「我係一個好傳統嘅男人，男女授受不親，拍親熱鏡頭避得就避，好似喺《點解阿Sir係阿Sir》裏面，我同楊怡、鍾嘉欣都有感情戲，但好似冇咀嘴，盡量唔使好啲。」

四十出頭，陳豪自言仍未有成家立室的打算，還「例牌」表示要以事業行先。不過，他的感情一向受大眾關注，有傳舊愛廖碧兒戀上富二代林忠豪，令形象插水，被迫要「出招」反指有人做「小三」，矛頭直指陳茵媺，令事件峰迴路轉。陳豪淡然表示不欲多談：「算啦！過去無論啱同錯都唔想再提，最重要依家開心。」

相反，提起新歡陳茵媺，陳豪又變回開籠雀，有傳二人拍拖數月並已到訪女方寓所，陳豪笑住否認：「唔係拍拖，大家諗多咗，現階段只係啱傾、啱Key嘅朋友，但將來嘅事唔知。我承認非常欣賞佢性格，佢份人好簡單、冇機心、又聰明，絕對係一個好女仔，我同佢性格幾似，大家一樣鍾意飲咖啡。」

茵媺樣樣好

陳豪對陳茵媺有讚冇彈，還藉機出口術帶女方「上位」，他認為佘詩曼離巢後，最睇好陳茵媺有機會攀上一線花旦之位：「之前同茵媺合作拍《心戰》，佢進步得好快，雖然唔識睇中文，但會搵爹哋幫佢翻譯，記性好、吸收能力強，呢啲讚賞全部係我真心話。」

最近無綫熱播的《點》劇，爆紅了K4四位學生，連帶老戲骨「Old4」羅樂林、蔣志光、周驄及李國麟，和以黎彼得為首的縮骨親戚三人組亦掀話題，陳豪貴為視帝當然不會羨慕，反而希望在演技上更進一步：「做咗視帝唔代表好叻，依家觀眾好聰明，最重要係劇集質素，演得好唔好都要每部劇評分。我特別鍾意演喜劇，有時會參考外國棟篤笑節目或者笑片，雖然我未及周星馳嘅境界，但覺得自己有呢份喜劇感，希望帶畀觀眾會心微笑。」

後記：理財有道儲「磚頭」

廖碧兒被指拜金女，所以飛起陳豪，但貧與富每個人價值觀不同，Moses自有一套理財大計，在港開完甜品舖，又在馬來西亞開咖啡店，講起買樓更是眉飛色舞：「好耐以前已經有買賣村屋，依家鍾意儲磚頭（買樓），人大咗應該要為將來生活打算。」

陳豪自謙非筍盤，但其實外人一睇就知他這位「筍盤王」並非浪得虛名。

陳豪對陳茵媺有讚冇彈，句句真心。

充滿喜劇感的陳豪，最想令觀眾會心微笑。

筍盤賣點

陳豪被視為電視台「筍盤王」，其吸女能力有幾勁？訪問當日在街上他又輕易吸引多位女粉絲圍埋影合照，如此受歡迎，當然有其過人之處。

外形吸引
模特兒出身，身高182cm，不用開工便會健身操弗，難怪四十出頭仍保持健碩身形。

用情專一
自04年傳與廖碧兒拍拖後鮮有緋聞，去年傳與佘詩曼因合作《公主嫁到》撻着，但多屬煲水新聞。

視帝地位
07年憑《溏心風暴》得得地一角一箭雙鵰兼奪視帝及我最喜愛的電視男角色兩個大獎，成為雙料視帝。

現身街頭短短時間，陳豪（右一）已「誘」女埋身索合照。

「中女」樂瞳寸起童顏

娛樂圈是耐力大測試的地方，除了個人實力外，還要睇彩數。有新人甫入行已平地一聲雷；有人默默耕耘，捱足十年才得到「遲來的春天」。

入行逾五年的樂瞳，原名龔茜彤，06年已參加無綫遊戲節目，前年進軍樂壇推出專輯《短罪》，曾獲「叱咤樂壇生力軍女歌手銅獎」，直至最近憑劇集《點解阿Sir係阿Sir》的反叛學生妹「中女」一角人氣急升，成為追訪對象，其網上搜尋點擊率更創近期新高，風頭蓋過同劇主角陳豪、鍾嘉欣及楊怡等，令樂瞳大感意外，她說：「『中女』呢個角色咁好反應同咁受歡迎，絕對出乎意料之外，冇諗過大家咁鍾意，其實個角色好『八婆』同寸寸貢，估唔到有咁大回響。（惡女角色嚇親男士？）暫時睇好似冇乜，反而啲Fans估唔到我可以咁惡。」

感激劉家豪

樂瞳感激監製劉家豪讓她發揮，她認為角色夠寫實，易惹起共鳴。原來她求學時亦有被欺負經歷：「以前畀人『蝦』過，印象好深，試過匿入廁所喊。（得罪人？）唔知，可能我唔笑個樣畀人覺得好寸，咁我冇可能24小時都笑面迎人，所以畀人誤會我黑面囉！其實依家出街有陌生人走埋嚟，我都會有防備，可能我個人缺乏安全感。」

雖然即將25歲，但樂瞳飾演學生妹仍甚具說服力，全因「童顏」夠照，她笑說：「起初擔心夠唔夠說服力，好彩個樣細，着起校服都切合角色。（尷尬？）都有少少。（代表作？）都算係呀！我今次好畀心機演出，曾經試過企埋一二邊都冇人理，近排確係多咗好多訪問，好開心，多謝大家關注。」

K4唔過電

「升呢」後的樂瞳被網友大起底，連陳年龍照及泳照也相繼流出，她無奈地說：「都冇得控制，我諗大家係出於好奇，希望大家高抬貴手。（泳照？）以前都影過，但係健康性感為主，畀自己留念。」雖然角色受歡迎，但樂瞳仍貫徹「慳妹」性格：「梗係要慳住使，希望嚟緊多啲嘢做。」

談到感情事，樂瞳聲稱現時單身，即使置身劇中的學生哥堆，與K4另外三位男演員對手戲甚多，她亦笑言沒有因拍劇撻着：「大家稱兄道弟，感情好好，我易同男仔Friend，唔需要諗好多嘢。（緋聞？）唔怕嘅，但會盡量小心啲。」

後記：俘虜宅男勝在「高」

有指樂瞳取代宅男寵兒糖妹Kandy，成為新任宅男女神，樂瞳謙稱：「我同糖妹都認識，每次見面都雞啄唔斷，我哋唔會因為咁有芥蒂；佢唱歌好聽，又識作曲，充滿音樂造詣，而且Cute過我。（咁你有咩優點？）我高過佢少少，哈哈！」

樂瞳憑一劇彈起，現時把握每個工作機會，努力向上游。

港女十式表情難不倒樂瞳，她自嘲唔笑個樣最寸。

樂瞳一招踎低回眸加嘟嘴，宅男點頂？

「的骰」有市

外形「的骰」的樂瞳，憑藉反叛學生妹角色人氣急升，證明「的骰女」大有市場。

糖妹
組合糖兄妹成員之一，有「嫩版陳慧嫻」之稱，憑嬌小身形、甜笑及無限Chok樣，成為宅男女神。

阮小儀
細細粒但周身刀、張張利，DJ、主持、電視劇、電影、舞台劇及出書等，瓣數極多。

G.E.M.
巨肺女聲，唱功了得，昨晚的紅館處女個唱已告爆滿，人氣有增無減。